COUNG" NGHEI 2 - Lacid Common Language Bible

Mangsoo Khyen: Yu Da" Khokham

¹ Byumyu" yi ciyoomo tu: lhoin" wa soin' nyid go" lha". Byumyu" yigi: nyangnu" shid re" ce" akyu" we' abo da" gau" koid moo" ri cikoid soin' nyid go" lha".

² Aseing ri nyangnu" da" khokham yi tu: lhoin" lo wigi mung" zoug: yi we' lhoem: thougtheung wa shid re" zheung: gau" sham: go" nyid boem lho: nyang: khyen: soin' to" da" khokham phoo ri we' thougtheung nyid boem.

³ Nyangnu" gi «Nyangnu" vhoeb ci: da" akhoug: mo nyangnu" gung du: nyang: yo" loid loo" baja". Nyangnu" myheug zei: ci: jang" mo nyhang" byeig lhei" pyam, boem shang» ga: wigi tid nyid boem.

⁴ Mougkhung: tho' moo: nyid da" nyangnu" Aseing gi nya: da" zhungtang mo wigi ci: anghoid da" nyangnu" soin' khyoo: ri yu" juang" yi nyid.

⁵ Hougsu" nyang: gi nyangnu" ri nheug yo: ziyo' zid" nhang: lho: nya: nheug yo: ziyo' nyangnu" ri kyug nhain' nyid.

⁶ Nyang: gi «nga" gyeung" shang: Ziun boem tho moo nga" khokham phoo ri myonhoo: ngilang: ngoo ab byid: bye:› ga: tid» ga: tid nyid.

⁷ Khokham phoo ri «Aseing khasu" ga: tid nyid da" khyoo: ri ngoo tid fu" byid: wa zi nghoid» ga: tid. Hau: lho: nyang: gi ngoo ri ‹nang gi nga" zoo: nghoid nyid da:. Akhid" nyid" ngoo gi re" phoo bue" nyid bye:.

⁸ Mho' we' ngoo nang ri byumyu" yi yo' nyangnu" da" mungdain: dangain" ri ab byid: wa zi nghoid. Moug: gyab, goin" re" da" moug: bue" loo wa nghoid.

⁹ Nang gi nyangnu" ri jo, to' lhamdung: yo' baid sain" kaid wigi nang nyangnu" ri myidzhoo" yam: daloem: ri yhang: ti" ajab, amoin' bue" loo" sho' youg khyoeb sain" pyam wa nghoid.»

¹⁰ Khokham yi we"- hid: akhid" zid" nhang: da" khyoo: ri tam" gyo: yu" ge'. Mougmyid da" zoug: ludaid yi we"- he: lhed zed" nhang: da" dang: ri jhau" yu ge'.

¹¹ Aseing ri gyoug phau" myang: ziyo' noku coung" nghei nyid ge'.

¹² Gyoug nain" ziyo' nyang: ri goeb pid nyid ge'. Hougsu" akoid zigi nya: nheigloem: nge" loung ziyo' myab" myab, to' lo" wigi nanu" gi nyeigdain tung" shed: lo' boem wa zi nghoid. Zung" lhoug byid: wa shid re" nya: jhang ju" yhi: bang: gi ngilhoo' wa nghoid.