COUNG" NGHEI 148 - Lacid Common Language Bible

Mangsoo Ri: Coung" Wa Shid Re" Mougkhung: Myidjang: Dangain" Ri Khe.

¹ Aseing ri coung" byid: we'. Myhang: thang da" joyoo moo: nyid nyid mo, we"- Nya: da" moug: lagyoo: joem dangain" mo, we"- nyang: ri coung" byid: ge'.

² Nya: da" moug: lagyoo: joem dangain" mo, we"- nyang: ri: coung" byid: ge'- mougkhung: mougdi gyizoo: yi dangain" bang: we"- nyang: ri coung" byid: ge'.

³ Bid yo' lhammoo" nyang: ri coung" pid ge'- bang nyid da" kyi: joem we"-nyang: ri coung" byid: we'.

⁴ Myhang: thang da" mougkhung: mougdi joem yo' moug tho' moo: jo, jo, da" gyid phung: joem we" nyang: ri: coung" byid: we'.

⁵ Aseing da" myeing khyang" ri nyangnu" dangain" mo, coem, coung" nghei nyid goo" baja". Re" da" mungdang: khyo" jo, moo: jo, gi phain" so: to" zi shau" nyid wigi

⁶ Re" da" amyeing" mungdang: yo' dakhyoo" ti"- nyangnu" da" joyoo joem moo: pyaid didu dageung: teung jo, boem ago". Houg: bang: gi nya: amyeing" dang: ri ayo" lid nghoid ago".

⁷ Panglai: main jung: joem yo' no, thang da" nammugdara dangain" we' Mougmyid mo wigi Aseing ri coung" ge'-

⁸ lhab' myeug ziyo' leigvoo- gyu: yo' jhoemmoug" joem. Nya: amyeing" dang: ri tam" gyo: da" thain: uglid, zoo" joem we" nyang: ri coung" nghei nyid ge'.

⁹ Boug gung joem yo' boem lang joem shigam joem yo' siyoo sigam: joem

¹⁰ Me" da" gougnyhoug joem yo' kyang: da" gougnyhoug joem dangain" do: yu: yen" ja: yo' ngho' joem dangain" nyang: ri coung" nghei nyid we'.

¹¹ Khokham yi yo' byumyu" yi dangain"- Khokham yug gi zoo: yi yo' gootu: da" zoug: khoin" voin mo, dangain"- nyang: ri coung" we'.

¹² Zoolu: yi yo' zoomyi: yi zookho' yi yo' zooshang: mi" we"- nyang: ri coung" byid: nyid we'.

¹³ Aseing da" myeing khyang" ri nyangnu" dangain" mo, coung" nghei nyid goo" baja"- nya: myeing khyang" gi gootu: tho' moo: je gyi: jo- Nya: myonhoo: bug thu' sheing: jhu" khyoo: gi mougmyid yoosoo" yo' mougkhung: mougdi tho' moo byeung" jo.

¹⁴ Nyang: gi: nya: da" mungdain: ri yoem: boo nhang: nyid. Hougsu" nghoid yoomo nya: da" byumyu" yi dangain" mo, gi nyang: ri coung" nghei nyid boem. Nyang: ri gye" jheddab da" Israela byumyu" yigi nyang: ri: coung" nghei nyid boem. Aseing ri coung" nghei byid: we'.