COUNG" NGHEI 140 - Lacid Common Language Bible

Goem, Loem Byid: Wa Shid Re" Akyu" Mho' Dang: David da" jikhoin".

¹ Aseing we"- akhyeing" ashoeb mo, lo, mo ngoo ri khyoid yu we'. athoug" akhyoug: koid nyid bang: da" lo, mo ngoo ri: gau: nyu: nyid nhang: we'.

² Nyangnu" gi khanham we' akhyeing" ashoeb da" moo" ri dasoin' go" nyid ziyo' khanham we' myeing" myoo: yhoo: she: khyoo: joem za: lhu: pau: thu' nyid boem ago".

³ Nyangnu" da" yhoo: joem gi yo" shid: loo" nhang: da" lhangmyu, joem yhang: ti" we' nyangnu" da" dang: khoin" thui: joem gi lang byau, dug yhang: ti" we' du nyid boem ago".

⁴ Aseing we"- akhyeing ashoeb, mo, da" yoem: so' mo ngoo ri goem loem yu byid: we'. Ngoo ri: joem: gyo" loo" wa shid mo nyheung soin nyid da" athoug akhyau koid mo, lo, mo- ngoo ri: goem loem gau: nyu: nhang: nyid we'.

⁵ Nghoid boin: lho: phau: khuang nyid bang: gi nga" shid re" tei" khyo' to abye: go"- nyangnu" gi ngoo ri myheug yu wa shid mo khyoo: thang sho' moo: lhid thoung: to" abye: go".

⁶ Ngoo gi Aseing ri «Nang gi nga" Mangsoo nghoid nyid da» ein: tid nyid. Aseing we" pang" thoug yu wa shid mo nga" da" ngau, yoid thui: ri gyoo: byid: we'.

⁷ Nga" myhang: thang da" Aseing yo' nga" yoem: moo" bo da" gyivi su: nang gi ngoo ri meing: zain: jang: moo: goem loem byid: loo bye:.

⁸ Aseing we"- akhyeing ashoeb mo, Nyangnu" vho: ngei nyid khyoo: ri abyid. Nyangnu" da" soin nyheung khyoo: joem ri we' oung: doid lo" da" khyoo: ri abyid: nyid.

⁹ Nga" gyivoo joem ri aoung: loo" nhang:- nyangnu" koid da" ngoo ri kyug nhain' thougtheung da" khyoo: joem gi nyangnu" moo: doem tau" zang" loo" goo baja".

¹⁰ Nge" ne, jo, da" myigyu: joem gi nyangnu" da" tho' moo: gyo" gyoin: goo" baja" nyangnu" gi duang: khuang" khoug: moo: du" khyo' kaid zi shau" boem wigi khanham we' ayo" doem thu' ri loo: goo" baja".

¹¹ Subi" ri shoid vhang: khyo" yooboo zhoug nyid mo, ri aoung: doid loo" nhang:- akhyeing" ashoeb da" moo" zoo" gi athoug" akhyoug: da" byu yiri: khaid myhi: lho: nyangnu" ri phyo' shoin' pyam, goo" baja".

¹² Aseing we"- nang gi sho" jhen mo, da" sei: yo' ca" yo nyid mo, da" yoo" moin: da" khyoo: joem ri goem loem byid: nyid khyoo: ri ngoo se' nyid.

¹³ Deing: byeung" mo, gi nang ri deing" deing nyang: coung" nghei lo boem. Nyangnu" gi re" shidkhoin" moo: danyid nyid boem wa zi nghoid.