COUNG" NGHEI 139 - Lacid Common Language Bible

Mangso Joeb, Byeung" Lasi, Phajhi" Yo' Pang" Thoug Goin Coung: Khyoo:

¹ Aseing we"- nang gi nga" khyoo: ri phoid: sho: yu" lho: si' bye:.

² nang gi ngoo koid khyoo: dangain" ri myang se' nyid. Vi: mo nyang:- ngoo myid soin: khyoo: dangain" ri se' gyo: nyid.

³ Ngoo, moo" zei: nyid ziyo' doug no: nyid ziri nang myang nyid. Ngoo cenoem koid nyid ziri nang dangain" si' bye:.

⁴ Aseing we" ngoo ci" we' atid shire- ngoo ce: noem tid wa ga: ziri nang dangain" si' gu nghoid.

⁵ Nga" da" gung yam gung qei: moo: nang khanham we' lheung khoem to" wigi re" yoem: moo" yo' ngoo ri nghoeb shung ci: bye:.

⁶ Hid: yhang: te" re" da" lasi phajhi" gi nga" shid mo no, thang zi nghoid yoomo ngoo gi atho' se' gyoo: loo.

⁷ nang yo' ve: gang: loo' sho' ngoo khakhyoo: se' loo" wa lha". re" da" myo, shid ti: mo ngoo khakhyoo: se' phang: loo" wa

⁸ Ngoo gi mougkhung: khyoo: to' yo" do' loo" nghoid loug we' nang gi hougmoo: nyid nyid. Moovo moug: moo: lo" leung jo, nghoid loug we' nang hougmoo: nyid nyid.

⁹ ngoo gi bid thu' shoid khyoo: dang: phang: lo"- hougsu" anghoid lang" bidvang shoid mo ve: thang joyoo moo: nyid nghoid loug we'.

¹⁰ nang ngoo ri khyoo: shed wa shid re" hau: joyoo moo: nyid wa, nang gi ngoo ri pang" thoug wa shid re" hau: joyoo moo: nyid nyid wa zi nghoid.

¹¹ Ngoo gi moug: coid" ze wigi ngoo ri nghoeb ci: we' ein: tid lho: nga" ayam, aqei: moo: jo, jo, da" bidbang ri we' myen" bue" loo" we ga: tid.

¹² Nghoid loug we' re" da" shidkhoin" moo: gi moug: coid teing: no, da" khyoo: ajo, myen" we' nyid khyoug yo' dakhyoo" ti" bang jo wa zi nghoid. Re" shidkhoin" moo moug: coid yo' moug: boo" gi dakhyoo" ti" za: nghoid.

¹³ Nang gi nga" da" gung goin" ri phain" so: too" bye:. nga" myhi' da" ung: khoug: mo nyang:- nang gi ngoo ri azuang zhoug zhoem: too" bye:.

¹⁴ Nang gi gye" gyoug pho" ziyo' mau" pho" da" phain" so: too" shoug" yoomo nang ri jeju" boin: so" nyid. Re" da" lo, moo" joem gi gye" mau" pho" khyoo: nghoid- hau ziri nga" nheigloem: dangain" yo' se' nyid.

¹⁵ Nga" shooyoug: joem gi nga" myhi' oung: khoug: moo: goolhoo: za: zhoug zhoem: bue" loo nyid da" ayo, moo: we' ngoo gi yhoem" shoung: to" joyoo moo: nyid gyi: lo da" ayo, moo: we' ngoo hougmoo: nyid nyid ziri nang si' bye:.

¹⁶ Ngoo akhu: loo shi" re, nang ngoo ri myang bye:- nga" bidnyid khyeing: thoem" shilo, joem ri ngoo cilang" atho' bui" shire re" da" mougsoug" pug moo: dangain" ziri lhid" xoem" too" gu, nghoid bye:.

¹⁷ Mangsoo we"- nga" shid mo, nang myid soin' to" da" khyoo: joem ri- ngoo atho' oung: si' loo. Hau: khyoo: joem gi nghab, loo a-ung: myo: tham: jo, bye:.

¹⁸ Hau: ziri to' nghab, yu" nghoid rigi midcoo: tho' moo: je, myoo: wa Ngoo boin: so" lo da" uri ngoo gi nang yo' dage" nyid lang".

¹⁹ O" Mangsoo we"- nheigloem: guid" da" akhyeing" bang: ri said pyam we'. Athoug akhyoug: koid mo, ri ngoo yo' ve: gang: loo" nhang: we' ein: mho' nyid.

²⁰ Houg: bang: gi re" khyoo: ri akhyeing" khyo" tid nyid lho: re" myeing khyang" ri ashoeb, khyo" thougtheung dang: tid nyid boem ago".

²¹ O" Aseing we"- nang ri ngheung" nyid mo, rigi ngoo we' bo ngheung" nyid. nang ri tu: lhoem" thougtheung mo, rigi ngoo gyisho' nyang: co' ngheung" nyid.

²² Ngoo gi nyangnu" ri ngheung" thang bye:- ngoo gi nyangnu" ri nga" gyivoo khyo" nyang: soin" too" bye:.

²³ O" Aseing we"- nga" nheigloem: ri se' wa shid re" ngoo ri phoid: sho' kyo" yu" we' nga" myid soin: khyoo: ri myang wa shid re" ngoo ri ca: yu" we'.

²⁴ Nga" nheigloem: khoug: moo: age zi daja: ja: bo nghoid rigi phoid: sho: yu" lho: wigi apyaid atoo: mo kang: so, khyoo: moo ngoo ri shu" yhe: loo" we'.