COUNG" NGHEI 110 - Lacid Common Language Bible

Aseing Yo' Nyang: Khyen: Yu Da" Khokham

¹ Aseing gi re" gyivoo joem ri re" da" khoovoo khoug: moo: kaid pyam da" ayo, ju" sho' hid: nga" da" lo, yo shoid moo: zhoung: jo, we' ga: wigi: nga" Aseing khokham pho ri tid bye:.

² Ziun mo Aseing gi re" da" khokham yoem: so' ri ce" lam: kaid wa zi nghoid- re" da" gyivoo joem da" atho' moo vhoebkhang" nyid we' ga: Aseing tid nyid.

³ Re" da" gyivoo joem ri: nang khaid zain: da" bidnyid moo re" da" byumyu" yigi yhoem: seung: myid khyo" bo vang pang" lo boem wa nghoid. Nab soin no' re khyo' da" nghain: jhu" yhang: ti" re" da" zoolu yigi nang nyid da" gyeung" shang: boem tho' khyoo: ju" lo boem wa zi nghoid.

⁴ Nang gi Melkhizedeg da" khainjung azuang zhoug yu da" apyaid atoo: mo khainjung dayug bue" loo wa nghoid, ga: wigi Aseing gi geung: teung da" dangsoo" byid: to" lho: hau: ziri doem tau" yu loo wa zi anghoid.

⁵ Aseing gi re" da" lo, yo shoid moo: nyid nyid nyang: nheig yo: lo da" uri nyang: gi khokham yiri: soem" joem: loo" nhang: wa zi nghoid.

⁶ Nyang: gi byumyu" yiri tarha" dang: phyed wa ziyo' meing: zain: pa: mo byu shid mang yo' byeung" loo" nhang: wa zi nghoid. Nyang: gi mougmyid gyab, goin" jang" mo khokham yiri soem" joem: lo" nhang: wa zi nghoid.

⁷ Khokham phoo gi khyoo: yam, moo: yau, da" gyid gyung: mo shug wa zi nghoid lho: nyang: gi yoem bo lo wigi oung: lo" khyoo: joem moo to' yab loo wa zi nghoid.