COUNG" NGHEI 104 - Lacid Common Language Bible

Phain" Too" Su: Ri: Coung" Nghei Dang:

¹ Nga" soozoo: we' Aseing ri coung" nghei nyid we'. O" Aseing nga" Mangsoo we"- nang gi khayhi' gyi sheung: nyid lha". Nang gi: zoug: myeing" yoem: so' yo' myonhoo: phung" yoeb ri: void, ci.

² Nang gi re" da" gung moo: bidbang ri void ci: da- nang mougkhung mougdi ri zoem" yhang: ti" pei: khang" to" wigi

³ Moug: laid moo: jo, da" gyid thoem" tho' moo re" yhoem: ri koid to" da- nang gi jhoemmoug" joem ri re" da" myang: rheing" yhang: ti" nang ci: yhoung: nyid wigi lid da" dung tho' moo nang jui: lo" da:.

⁴ Nang gi lid joem ri re" da" lagyoo: yi koid lho: moug: lhab' myeug da" myisham: joem ri re" dei zoo: yi yhang: ti" nang ci: yhoung nyid.

⁵ Nang gi: mougmyid ri hau: da" jo, gyab tho' moo: geung: teing sho zhoug to" lho: hau: zigi khanham we' tu: lheung: pyam zi shoug" wa anghoid.

⁶ Hau: da" mougmyid tho' moo nammugdara ri nang void ci: yhang: ti foid, to" lho: gyid we' boem joem ri nghoeb to" da:.

⁷ Nang gi gyid lang joem ri gyikoid kaid lang" gi houg: bang: gi phang: gyoo" lo" byoug lho: nang yoid tid da" amyeing" dang: ri houg: bang: shoug" gyoo: lang" gi myab, myab, yau, shang lo" byoug ago".

⁸ Gyid yigi boem joem da" atho' mo wigi koolhang lang: khoug: khyoo: houg: bang: shid re" nang nyheung too" bye: da" joyoo khyoo: yau, gyo" lo" nyid boem bye:.

⁹ Aseing gi mougmyid ri tigyid dalheing: adoem shi, loo baja" gyid yi ayo" yau, lid loo" wa da- kyoo" doem ri koid too" byid: bye:.

¹⁰ Nang gi lang: khoug: yi moo gyid bug joem yi: yau, loo" nhang: lho: boem joem agyoo: khyo" gyid moo" lang joem ri yau, loo" nhang: nyid da:.

¹¹ Hau: zigi siyoo mo gougnyhoug goug: doo: joem ri gyid byid: jhoug wigi hau: jang" moo: kyang: da" loo zei: joem gi nyangnu" da" gyid shed khyoo: ri ge loo" nhang: nyid boem.

¹² Moug: moo: dang: yen" da" ngho' joem gi hau: gyid yam, moo: youg jo seiggam joem da" atho' moo soid soid, lho: jikhoin" khoin" myheung nyid boem ago".

¹³ Mougkhung: mougdi mo wigi boem joem tho' moo: nang moug ri vo, shoin" kaid byid: nyid yoomo mougmyid gi re" da" mainkaid jeju" yo' byeung" jo.

¹⁴ Goug nyhoug joem shid re nang vufu" ri youg loo nhang: nyid. Nang gi xangsu: byu yi ci: wa shid re" agam' joem ri youg loo nhang: nyid. Houg: yoomo xangsu: byu yigi shivoo: nug: loem joem ri yo" sho" yhoug nyid boem.

¹⁵ Nyhang" nyang: za: ngei pyo: khyoo: yoo" wa shid re" zabyid yeung yi noug soem" si bui" wa shid re" zhainloin: xu: yoem byeung" loo wa da" shid re" cenmoin" zooyho, ri nyangnu" yo" koid thu nyid.

¹⁶ Aseing sho" to" nya: seig yoo ein: da- Lebanon mo shamu gam joem we' moug gyid ri gyi" sho' shoug" kham: yu nyid boem.

¹⁷ Hau: joyoo moo ngho' joem we' nyangnu" nya: shid re" ngho' soid soid lho: gyid ngho' joem we' shithang: gam joem da" atho' moo ngho' soid koid to" boem.

¹⁸ Layoo: joem gi myhang: da" boem tho' cang moo nyid yen" boem ziyo' lapyu: ceuglhid" joem gi lug ug joem moo: gau" loung" jo, ago".

¹⁹ Nang gi nghab, youg yo, boin: yoo" wa shid re" lhammoo" ri phain" so: to" lho: bid we' nyang: vang wa ayo, ri se nyid.

²⁰ Myen" ri nang phain" so: to" wigi siyoo mo gougnyhoug goug: doo: joem thu so" yen" ago".

²¹ Khang khyi nu" joem gi nyangnu" shoo" ri lhoem nyid uri gyab, nyid boem ago". Nyangnu" gi Mangsoo byid: to" da" zoo: noem ri cang sho: yen" ago".

²² Bid thu ri" lang" gi nyangnu" da" lug ug khoug: khyoo: doem tau" vang lo" wigi vhoeb jo, ago".

²³ Byu xangsu: yigi nyangnu" da" moo" ri zei: wa shid re" thu lo boem lho: myen" thang ju" sho moo" ri zei: nyid boem ago".

²⁴ Aseing we" nang koem gi ja: khang" moo" ri koid nyid da- nang gi jo, moo: jo, ri phajhi" bo khyo" koid too" nhung: lha". Mougmyid yoosoo" gi nang phain" so: to" da- dei moo: dei joem yo, byeung" jo.

²⁵ Gyid khoug: moo: we' nghab, loo aoung: da- dei noem gyi: zi nge zi zheung: byeung jo, da nammugdara we' lam: lho: gyi: jo, da:.

²⁶ Hau: nammugdara da" gyid tho' moo sangphoo lhid joem so" yen" ziyo' hau" joyoo moo: nang phain" so: to" da- mainjung: zeing ein: da- Leviathan we' shab gu: yen

²⁷ Houg: bang: dangain" gi ca" da" ayo, moo: zoo: noem shug phoo" byid: zhoo" wa shid re" nang ri nghe: khau: lang" nyid ago".

²⁸ Nang gi houg: bang: ri zoo: noem byid: wigi nyangnu" gi hau: ziri shoug" zo: boem ago". Nang nyangnu" ri zoo: noem shug phoo" byid: yoomo nyangnu" gi nheugdeug nyid boem ago".

²⁹ Re" da" myonhoo: lheung: loo" lang" gi houg: bang: gyoug nyid houg: bang: da" kangso ri nang yoeb, yu pyam lang" gi nyangnu" gi shid: lo" lho: nyangnu" thu' lo da" hau: myidzhoo" phei" khyoo: doem tau" lo" byoug ago".

³⁰ Nghoid loug we' nang koem gi nyangnu" ri kangso' moid kaid byid: ziyo' Nyangnu" ri phain" so: to". Nang gi mougmyid ri kangso' aseig byid: nyid.

³¹ Aseing da" myonhoo: phung" yoeb gi apyaid atoo: moo: dateung: jo, baja". Aseing gi nyang: koid bye: da" moo" zoo" jid: zoo" moo ngeibu: nyid baja".

³² Mougmyid ri nyang: lheung: yu" kaid lang" houg: gi nain" lo nyid boem joem ri nyang: thau" zhuang" kaid lang" houg: mo myid khoug" joem nge" thu' lo nyid.

³³ Ngoo dei nyid da" gyoo: ri Aseing ri jikhoin" dang: yo' coung" nghei nyid wa nghoid. Ngoo dadei nyid nyid gi nga" Mangsoo ri coung" nghei jihkoin" khoin" nyid wa nghoid.

³⁴ Nga" gau yi ngei bu: khyoo: gi nya: jang" mo yo" yu yoomo nga" da" coung" nghei jikhoin" gi Aseing vho: ngei zi bui" baja" o".

³⁵ Yooboo dab, mo rigi he: mougmyid mo jhoid phyo' shoin' pyam baja" akhyeung" bang: gi byoug shang loo" goo" baja" nga" soozoo: we' Aseing ri coung" byid: nyid we'.