COUNG" NGHEI 101 - Lacid Common Language Bible

Khokham Da" Dangsoo" Khoin"

¹ O" Aseing we" nga" da" jikhoin" dang: gi nheigloem: zung" ziyo' nyeung vho, nyid yoomo ngoo nang ri jihkoin" yo' khoin" nyid.

² Nga" asam" aved, moo shoid vhang: khyoo: ci: we' aboo wa nghoid nang gi nga" jang" moo kha: yo, ri ju" ri" wa ein: lha". Ngoo gi ngoo nya: yhoem: khoug moo younglho' khyo" kangso' dei lho:

³ Akhyeing" ashoeb khyoo: ri ngoo khanham we' bo cang zei: yen" wa zi anghoid. Mangso shidkhoin" mo myonhoo: goo" khyoo: lheung: loo" bang- sham: go" khyoo: ri ngoo ngheung" nyid. Ngoo gi nyangnu" yo' ci: we' asen wa.

⁴ Ngoo gi mhau, fain" da" byu bui" wa zi anghoid- akhyeung" da" byu yi yo' ngoo ci" we' shoin" koid wa zi anghoid.

⁵ Byu dayug yug da" age khyoo: ri dang: so, so, loo mo, yugkhang" moo" ri ngoo shang: thu' pyam wa zi nghoid. Phau: khuang ziyo' nghoid boin: nheigloem: myhang: nyid bang: ri ngoo gi kham zeung: nyid wa zi anghoid.

⁶ Mangsoo moo: loem: jeung" nyid mo, ri ngoo lhoem: yu lho: nga" khokham vang" moo: nyid nhang: wa zi nghoid. Nheigloem: bain sho' phyu: yung" mo, nyangnu" gi nga" dei zoo: bui" wa da" akhang" yo" yu boem wa zi nghoid.

⁷ Mhoug mo, fain" mo, gi dayug we' nga" khokham vang moo: shoug" nyid wa zi anghoid- ayid void mo, hang" we' nga" shidkhoin" moo: yo" nyid nyid wa zi anghoid.

⁸ Ngoonu" da" mungdain: khoug: mo akhyeung" bang: ri danyid" thang: moo: danyid- ngoo phyo' shoin' pyam wa zi nghoid. Ashoeb mo, dangain" ri Aseing da" voogung moo ngoo khaid thu' pyam wa nghoid.