COUNG" NGHEI 10 - Lacid Common Language Bible

Nyeung Veung" Khyo: Shid re" Akyu" Mho' Khyoo:

¹ O" Aseing we" ciwim wigi ve: jang" moo: nyid nyid lha". Ngoonu" gyoug dain' zi shau" nyid uri ciwim wigi re" myonhoo: goo" khyoo: shoung: pyam, lha".

² Akhyeung" bang: gi phau: khuang lho: sho" jhen: mo, ri: shen" yhen nyid boem. Nyangnu" du: to" da" gyoin: moo: gyoo" nhang: we' o".

³ Akhyeing" su: gi: nya: da" akhyeung" moo" zoo" mo phau: khuang nyid. Myo, no, vhoo: boo su: gi Aseing ri nheung" lho: she: pyam, nyid.

⁴ Akhyeing" ashoeb su: gi Aseing ri cishu: anhang:. Nya: da" nghoid boin: nheigloem: moo Mangsoo gi ce: yhoug: agyen: ga: myid nyid.

⁵ Akhyeing" ashoeb su: gi nyang: koid da" moo" zoo" dangain" jang" moo oung: loo" wa zi anghoid. Mangsoo dang: phyed khyoo: ri: nyang: gi atho' oung: gyoo- nya: gyivoo joem ri: juang" pyam nyid.

⁶ «Ngoo gi khanham we' joem: loo" wa zi anghoid- ngoo gi khanham we' gyoug dain' zi shoug" wa anghoid» ga: wigi: nyang: gung nyang: tid go" nyid.

⁷ Nya: da" nhoid moo: gi nheing" myeing" joem mhau. Da" khyoo: kyug nhain' khyoo: joem yo' byeung" jo. Nyang: gi ngheung" da" dang: akhyeung" da" dang: tid wa zi myab, nyid.

⁸ Nyang: gi voogung moo: gau" jo, lho: ce" yooboo we' abo mo, re: said pyam wa shid mo lang" nyid. Nyang: gi nghe: khoug: jang: ayoo" lo: mo, ri kuang nyid.

⁹ Nyang: gi khangkhyi yhang: ti" nyang: gau" joyoo moo: lang" nyid. Nyang: gi sho" jhen: mo, ri gau" lang" nyid wigi nya: gyoin: moo: myhi' yu lho: nyangnu" ri she: phang: lo.

¹⁰ Pang" thoug zi ayoo" mo, gi mhoin' pyam zi shoug" nyid ago". Nyangnu" ri yoem: joem: khyo" oung: pyam, zi shau" boem abye:.

¹¹ Akhyeing" ashoeb su: nya: gung nyang: tid nyid zigi «Mangsoo gi ce: yhoug: agyen- nyang: gi myo, coem" ci: lho: ngoo ri khanham we' myang loo: wa zi anghoid» ga: tid nyid.

¹² O" Aseing we" hau: akhyeing" ashoeb mo, ri yooboo dam kaid byid: we'. Phu" zoo: shoug" nyid mo, ri: myid soin: we'.

¹³ Akhyeing" ashoeb su: khasu" wim lho: Mangsoo ri yo" she: lhei" wa «Ngoo ri: nyang: khasu" yooboo dam yo" kaid wa zi anghoid» khasu" wim yo" tid nyid.

¹⁴ Nghoid loug we' nang ri gyoug nain" khyoo: yo' phu" zo: khyoo: ri myang se' lho: pang" thoug yu wa shid re" khanham we' nyheung soin, too" gu nghoid. Pang" thug wa zi ayoo" su: gi nyang: gung nyang: nang moo: ab lang- nang gi: ca" yo nyid mo, ri khanham we' pang" thoug nyid.

¹⁵ Akhyeing" ashoeb mo, yo' byugang: yi da" yoem: so' ri khyau" pyam byid: we'. Nyangnu" da" shoid vhang: moo" zoo" yoomo hau: moo" ri: adoem yo" koid lo bidnyid ju" sho' yooboo dam, kaid byid we'.

¹⁶ Aseing gi apyaid atoo: mo khokham" nghoid- gootu: phara joem ri no" mo, dangain" gi he: mougmyid mo byoug shang loo" wa.

¹⁷ O" Aseing we" nang gi nheigloem: nyhoem: khyo' khyo" mho' da akyu" mho' dang: thui: ri tam" gyo: nyid. Nang gi nyangnu" ri: yoem: foin: byid wa zi nghoid.

¹⁸ Nang gi doin: zeig shoug" nyid bang: yo' coug" zoo: yi da" mho' yoid thui: ri tam" gyo: nyid. Nang gi nyangnu" shid mo dang: phyed byid: loo wa. Houg: yoomo shid: loo" se' da" byu xang: su yigi ayo" kyug nhain' boem loo: wa.