COUNG" NGHEI 1 - Lacid Common Language Bible

MOUGSOUG" DA PUG Cng 1—41 Deungmain" Da" Gau Yi Ngei Pyo: Khyoo:

¹ Akhyeung" da" byu yi phajhi" khyau" da" khyoo: ri he: pyam bang:- yooboo dab, mo, da" akhyoo" again moo abo cang bang:- Mangso shid re" ce: akyu" aboo mo, yo' dage" abo zhung: bang: gi ngilho' nyid boem.

² Hau: tho' moo: agoo" Aseing da" tarha" ri goug goug yi yi tam" gyo: wigi hau: tarha" ri nyid" ri myen" ri phoid: sho: yu" nyid mo, gi ngei pyo: khyoo: yo" yu boem.

³ Nyangnu" gi gyid yam, moo yug jo, lho: nya: da" ayo, moo ashi" zei: wigi afu' we' akyoug lo" da" seiggam yo' du nyid. Nyangnu" zei: da" moo" zoo" dangain" moo oung: doid lo.

⁴ Nghoid loug we' akhyeung" da" byu yigi hougsu" anghoid. Nyangnu" gi lid hau' tang" lo" da" pheipyang" yo' du nyid ago".

⁵ Yooboo dab, mo, gi Mangso tarha" dang: phyed khyoo: ri shoug" wa ziyo' Mangso byumyu" yi jang" mo kho' thu pyam zi shau" boem wa nghoid.

⁶ Deung: byeung" bang: rigi Aseing mo wigi khyoo: shu" vhu" she: ziyo' lhoug zung" goem coung: zi shoug" nyid boem. Akhyeung" bang: koem gi joem: lo" byug boem wa zi nghoid.