ACTS 6 - Lacid Common Language Bible

Bo, Pang" Thoug Wa Shid, Mo Byu Nyhed' Yug Khyen: Yu Khyoo:

¹ Hau: thang: atoung" myang" ri cangzoo: yi: gi myo: loung: lo nyid wigi Grid" myeing" kaid da" Yuda byu yi yo' Yuda myeing" kaid' da" Yuda yi da" agyoo: moo myeing" myoo: goo" wa khyoo: thu' lo da. Khasu" wim gari Grid", myeing" kaid da" Yuda yi gi nyid" khang" moo" nyangnu" da" coung" moo" myhi, yi ri gam, byid: da" zookhoo: ngei ri ngab, sho' - agam byid: boem ga: tid nyid ago".

² Houg: yoomo lagyoo: yi da axe: eig youg bang: gi loem" jeung" da" phung: byu dangain" bang: ri khe: yu lho: ngoonu" gi Mangso da" mungdang: ri kho" kyoo" wa ayo, ri shu' to" lho: Alu ngei zoem: pyoo: gam, byid: da" moo" ri zei: wa shid re" gi ayo, aboo nghoid da.

³ Mang: nhung" yi we" hougsu" nghoid nyid yoomo gyeungshang: da" Venyi byeung" ziyo' phajhi" bo da" byu nyhed yug ri nanu" da" phung mo khyen: thu yu ge'. He: da" moozoo" ri Aseing: koid lho: zei: nyid wa shid re" ngoonu" gi nyangnu" ri nyheung too" ca" wa zi nghoid.

⁴ Ngoonu" koem gi akyu" mho' ziyo' kho' kyo" da" moozoo" voin vu, da" jang" moo ayo, byeung" sho' byid: pyam' ca" nyid ga: tid ago".

⁵ Loem khoug: bang: daphung goin" gi lagyoo: yi tid fang da" dang: khoin" ri gyo: ngei boem bye- houg: yoomo nyangnu" gi loem" jeung" da" nheigloem: gyi: ziyo' gyeungshang: Venyi byeung" da- Stephain ga: su- Philib, Prokuru- Nikanora- Timun- Parmena- yo' Nikola ri khyen: yu boem ago". Hau: Nikola ga:" su: gi Antioki Voogung mo, Yuda noku thung" khoug: mo wigi phung: vang lo da- tungbau byumyu" nghoid.

⁶ Phung byu yi gi hau: khyen: yu too" bang: ri lagyoo: yi da" shid' khoin" moo nyid nhang: to" ago- lagyoo: yi gi houg: bang: tho' moo lo, ke" lho: wigi Akyu" mho' byid: ago".

⁷ Houg: yoomo Mangso da" mungda in: gi xo' loo: xo' je" fu" nheung loo" bye- Yerusalem voomoo" mo da" cangzoo: yi gi je" je, myo: tham: lo wigi khainjung agyi yi myoo" sho' mo, we' - loem" jeung" lo boem ago".

Stephain Ri: Myheug Lo" Zi Shau" khyoo:

⁸ Stephain rigi agoin ago" da" mainkaid jeju" yo' yoem: vhoo" byeung" sho' byid: too" yoomo mung" byu yi da" shid khoin" moo mau" pho" da" alhoo: again joem yo' mau" pho" moozoo" gyi sho' koid shug byid: bye.

⁹ Nghoid loug we' Alesandru yo' Koreni voogung mo Yuda byu yi we' bo da- lhoid pyoin kaid' zi shau" mo, da" tarha" jung moo bo nyid mo, dayham" gi Stephain ri ngeug pyam boem ago". Nyang: nu" yo' kiliki- Asia meing: mo mo, Yuda byu yi gi Stephain yo' coem, tid byo, go" nyid boem.

¹⁰ Nghoid loug we' gyeungshang: Venyi gi Stephain ri phajhi" zeing byid: too" yoomo Stephain tid kaid' da" dang: ri nyangnu" ayo" phoug tu" nghoid ago".

¹¹ Houg: yoomo nyangnu" gi byu dayham" ri khoug: vhoid' byid: lho: byu he: yug gi Moshe ri we' Mangsoo ri we' - juang" gei, sang: dang: tid nyid ziri ngoonu" shaug" gyoo: bye- ga: tid nhang: ago".

¹² Hougsu" wigi nyangnu" gi mung" byu yi mo vhu" jhung: koid da" ludaid' yi yo' tarha" sara yi ri lu: to' loo nhang: ago". Nyang: nu" gi Stephain ri myheug yu lho: tarha" yab, do' khyoo: shu" yu to" ago".

¹³ Hau: thang: ri nyangnu" gi Stephain da" Khyoo: ri mhau' da" sagsi: kham, wa da" byu dayham" ri we' khe: to" ago". Hau: sagsi: kham, wa mo, gi Byu he: yug gi hau: noku yhoem: moo" ri we' Moshe da" tarha" ri khanham we' juang" yi gei sang: nyid.

¹⁴ Nazared mo Yesu gi hau: Mangso da" yhoem: moo" ri phyo' pyam' lho: Moshe ngoonu" ri byid: to" da" thung" tarha" ri thed' pyam' byid: loo wa ga: he: yug tid nyid ziri ngoonu" shaug" gyoo: bye:- ga: sagsi: kham, byid: boem ago".

¹⁵ Tarha" yab, do' moo zhoung: jo, mo, dangain" gi Stephain ri zheung: yu" zhoug to" uri Stephain da" myonhoo: gi mauglagyo: myonhoo: yo' du, lo" ziri shau" myang yu ago".