ACTS 27 - Lacid Common Language Bible

Gyid Sang Phoo, Khyo" wigi Roma Voomoo" Khyoo: Polu Gu: lo" Khyoo:

¹ Ngoonu" ri Itali mung" khyoo: gyid sang phoo khyo" re" de" kaid' wa shid mo bain myed phyed' lang" Polu yo' thung: byu dayham" ri Khosen" pho, gyidab, ga: da- Roma gyidab, daloem: mo gyizoug: phoo Yuli ga: su: lo, khyo" wigi nyangnu" ri ab, byid: kaid.

² Ngoonu" gi Asia mung" thoem" yam, gukhuang" khyo" gu: yhe: loo" wa soin' nyid boem- Adramuti mo gyid sang phoo tho' moo yhe: do, zhoung lho: gu: yhe: lo" boem bye. Thesaloni voogung mo Makedoni byu- Aristaku gi ngoonu" yo' dage" bo cang re.

³ Hau: thang: nyid ri ngoonu" gi Sidon voogung khyoo: ju" yhe: lo" boem bye. Gyizoug: phoo Yuli gi Polu ri nheig yu" khyeug wigi Nya: da" bidnoem byen cang" yi jhang khyoo: yhe: shau" goo" nhang: lho: Nyang: moo ca" yo, da" khyoo: dangain" ziri yu" coung: wa da" akhang: byed.

⁴ Ngoonu" gi houg: mo doem to' lo" ri lid' agi yoomo Kupru gugyoo: kang: lid' yo" jang" khyoo: gu: yhe: lo" boem bye.

⁵ Kiliki yo' Pamphuli mung" tu, tab'- pang lid thoem" ri gu: phyed' yhe: lo" wigi luki mung" mo Mara voogung moo ju" yhe: lo" boem bye.

⁶ Gyizoug: phoo gi hau: voogung moo I tali mung" khyo" yhe: loo" wa da" Alexandru voogung mo gyid sang phoo ri yhe: myang wigi nyang: gi ngoonu" ri hau: sang phoo tho' moo do, zhung: nhang.

⁷ Ngoonu" gi myoo" sho' nyid" yen, yen, za: gu: yhe: lo" lho: gye" yau: khe" khyoo: joem ri thoung" shau" ziyo' lo" thang moo gi kidu voogung tu, tab' khyoo: ju" yhe: lo" boem bye. Lid' agi yoomo shid' khyoo: ayo" xo' gu: loo" loo: wigi ngoonu" gi Salmone gyid' koin: khyo" gu: phyed' yhe: lho: Kreti gugyoo: kang: goo, jo, jang" khyo" gu: yhe: lo" boem bye.

⁸ Gugyoo: kang: gyid yam, tab' khyo" gu: yhe: lo" wigi yau: khe" khyoo: gye" shau" ziyo' - Lasea voogung yo' atoung" vi: go" da" - Gau: da" gu: khuang" ga: da" joyoo khyoo: ju" yhe: lo boem bye.

⁹ Ngoonu" gi hau: joyoo moo myo" sho' nyid" theung: nyid lho: Yooboo khyoid' da" xoin" to' pui" bidnyid lid lo" byug bye: yoomo gyid sang phoo khyo" gyung: xo' soo" wa shid' re- gyoug ca" da" ayo, ju" loo bye- Houg: yoomo Polu gi ngoonu" ri Ludaid' sooyen" yi we"- ngoonu" gi he: joyoo mo

¹⁰ Xo, gu: yhe: lo" rigi gyoug ca" wam: bye: myang- gyid sang phoo yo' kid" xoin: joem soem" lo" byug ziyo' ngoonu" da" kang: so' joem lang" joem: lo" byug wa da" khyoo: ri ngoo myang bye"- ga: phajhi" byid: tid poin" bye.

¹¹ Nghoid loug we' gyizoug: phoo gi Polu tid da" tho' moo Gyid sang phoo khang" su: yo' sang phoo yhoem: seing: tid da" dang: ri je loem" jeung" da.

¹² Hau: gu: khuang" gi ngam" yo, lid sho' theung: nyid wa zi agi yoomo Byu myoo" sho' gi hau: gu: khuang" mo to' lho: ge, bue" nghoid rigi Phonig voogung ju" sho' yoem: kaid' gu: yhe: lo" wigi hau: voogung moo ngam" ayo, gu: moo yhe: theung: nyid nau, ago". Phonig gu: khuang" gi Kreti gugyoo: kang: moo nghoid wigi bidvang moug: thang: shoid' yo' bidvang moug: zhoung: shoid khyoo: myonhoo: shu: to" da" gu: khuang" nghoid nyid.

Panglai Gyid Thoem" Tho' Moo Ug Lid' Hau, Lo Da" Khyoo:

¹³ Gyid byeung: shoid khyo" lid jham" hau, loo yoomo gyid sang phoo khang" mo, gi nyangnu" myed to" ziyo' dakhyoo" ti" yo" koid wa"- ga: zheung: jho: boem yoomo nyangnu" gi joto' nghui" ri she: to' yu boem lho: sang phoo ri kreti gugyoo: kang: ayam, khyo" cang igi- yo" tab' yhi' mo tab' lho: gu: yhe: boem ago".

¹⁴ Nghoid loug we' khamyhang amyang" shi" ri bid thu' mougzhung: ug lid' ga: da" - gye" yoem: bo da" ug lid' moo" gi gugyoo: kang: atho' shoid khyo" hau, gyoo" loo bye.

¹⁵ Hau: ug' lid gi gyid sangphoo' ri lo doin: wigi gyid sangphoo' gi ug lid' ri ayo" thoug shang" loo: yoomo ngoonu" da" yoem: kaid khyoo: ri no: pyam' lho: lid' wigi doin: lo" jang" khyoo: bo myu: lo" nyid boem bye.

¹⁶ Koda ga: da" gugyoo: kang: gyid byeung: shoid khyoo: myu: lid ju" gyo" lo" nyid boem bye. Ug lid' dajhi' tam" loo" lang" gi lid' goo dajhi' yo" yu boem bye- hau: khyi, moo gyid lhid' abyo, yoin" loo" wa shid re" ayoug: akhi" wim wigi gyid sang phoo mo kang: khyu: lhid' ri ayoin" sho' yo" zei: toem, to" boem bye.

¹⁷ Nyangnu" gi hau: da" lhid' ri - sang phoo tho' khyoo: she: to' yu lho: tei" shoem' joem yo' sang phoo zeing moo teing za: tei" tab' to" boem. Nyang: nu" gi Libyiya yo' tu, tab' mo da" mid' coo: doem: moo gyid sang phoo lo" thau" zhug too" wa ziri gyoug boem yoomo gyid sang phoo mo da" pain" luang: joem ri vhoo: khyoo: khyo' yu lho: lid' doin: lo" jang" khyoo: bo, cang myu: lo" ago".

¹⁸ Thang: nyid" ri we' lid' daxo, hau, nyid shi" yoomo nyangnu" gi sang phoo tho' mo lid: da" jonu" joem dayham" ri thoid' khyo, pyam' boem ago".

¹⁹ Hau: lho: hau" thang: nyid" ri nyangnu" gi gyid sang phoo yo' sen: da" ziyoo joem ri we' - thoid' khyo, pyam boem ago".

²⁰ Ngoonu" gi myoo" sho' nyid" - bid kyi: joem ri ashau" myang boem' loo- ug lid' gi gye" thain: khyo" dahau, nyid shi"- Houg: su" lo thang moo ngoonu" gi kang: so' loid' byoin, loo" wa da" khyoo: ri myed abyu lo: boem.

²¹ Gyid sang phoo moo zhung: bang: gi zoo: noem azoo: loo: myoo" sho' nyid" lid lo" boem thang: ri Polu gi nyangnu" da" shid khoin" moo to' yab, lho: Ludaid' sooyen" yi we"- nanu" nga" da" dang: ri tam" gyo: lho: Kreti gugyoo: kang: khyo" agu: lo" boem nghoid yoomo ngoonu" gi hid: su" soem" lo" boem ziyo' - byo, yoin zi shau" boem wa anghoid.

²² Nghoid loug we' nheig angi, goo"- nanu" hang" dayug we' kang: so' asoem" goo" wa gyid sang phoo za: date: soem" lo" byug wa.

²³ Khasu" wim gari Ngoo noku nyid da" nga" Aseing: - Mouglagyoo: dayug gi amain' nga" jang" moo ju" re" lho:

²⁴ Polu we" agyug nang gi Khosen" pho, shid khoin" moo shau" yab, jo, wa zi nghoid - Mangsoo gi nang ri nheig khyeug gi koid nyid su: nghoid wigi nang yo' dage" gyid sang phoo zhoung: lo nyid mo, ri kang: so' loid byoin, loo" nhang: wa"- ga: tid da.

²⁵ Houg: yoomo Ludaid' sooyen" yi we" - nheig angi, goo"- Khasu" wim gari ngoori re" tid to" ziyo' dakhyoo" ti"- bue" loo wa zi nghoid ein:- ngoo gi Mangsoo ri loem, khau: nyid.

²⁶ Nghoid loug we' ngoonu" da" gyid sang phoo gi gugyoo: kang: daloem: loem: moo lo" shau" ke" too" wa zi nghoid.

²⁷ Daxe: myed: myen, ein: da" myen" rigi ngoonu" da" gyid sangphoo' gi Medi panglai thoem" tho' moo gu' lid' doin: lo" shoid khyoo: bo cang myu: yen" da. Myen" gamgung myen: koo: moo ngoonu" gi gyid yam, joyoo daloem: moo tab' lo" kyi, ga- gyi sangphoo' khang" mo, gi shau" myed nyid.

²⁸ Houg: yoomo nyangnu" gyid' ri ke' yu" uri 120 pe: koo: no, ziri yo" se' boem bye. Hau: thang: daso' ri doem ke yu" boem uri pe: 90 za: date: no, lo: ziri yo" se' yu ago".

²⁹ Nyang: nu" gi lug zeing yo' gyid sangphoo' lo" thung" goo" ziri ci' boem yoomo gyid sangphoo' thang: mo da" joto' nghui" myed: loem: ri zheung: khyo' kaid' boem lho: myo, phyed' myang loo: baja" ga: akyu" mho' ago".

³⁰ Hau: thang: ri sangphoo' mo moo" zei: mo, gi gyid shangphoo' mo lhid' nu" ri yen, zoo: she: khyo' kaid' boem lho: gyid sangphoo' shid' mo da" jo to' nghui" dayham" ri she: khyo' kaid' lho: nyangnu" gi gyid sangphoo' mo phang: loid' loo" wa ga: soin' nyid ago".

³¹ Nghoid loug we' Polu gi gyizoug: phoo yo' gyizoo: yi ri hau: gyid sangphoo' mo moo" zei: bang: gi gyid sangphoo' tho' moo azheung: nyid to" boem loo: lang" gi Nanu" da" kang: so' loid byoin loo" wa zi cilang" nyid cang aboo loo- ga: tid.

³² Houg: yoomo gyizoo: yi gi lhid' nu" joem tei" to" da" tei" joem ri zhaid' phyed' pyam' boem lho: lhid' nu" joem ri myhu" kaid' boem ago".

³³ Myo, myang yid' ri Polu gi nyangnu" dangain" bang: ri zoo: noem zo: boem wa shid re" tid bye. Nyang: nu" gi ce" zoo: noem shug noem we' azoo: ashug loo: lang" nyid boem zigi akhid" nyid" ju" ri daxe: myed: nyid" nyang: nghoid lo" byug bye.

³⁴ Houg: su" nghoid yoomo nanu" da" kang: so' zheung: yo" dei nyid boem wa shid mo zoo: noem daja: ri zoo: ge' - nanu" da" vhudi mo xam: dakhaid lang" byug wa zi anghoid- ga: tid.

³⁵ He: da" dang: ri bain tid lang" Polu gi zooyho' dayham" ri phe, yu lho: nyangnu" dangain" bang: da" shid khoin" moo Mangso Jeju" ri coung" nghei lho: zo da.

³⁶ Houg: lang" nyangnu" dangain" mo, gi yoem: yo" yu wigi nyangnu" yug khang" moo" we' - zoo: noem, bo zo: lo ago".

³⁷ Gyid sangphoo' mo da" byu yi dangain" bang: gi eig sho: nyhed xe: khyug yug nghoid.

³⁸ Nyang: nu" yug khang" moo" bain zo: gyi: thang: ri gyid sangphoo' soem" loo" wa shid re" nyangnu" da" sung: soo: cen: thung: joem dangain" ziri panglai gyid thoem" moo de" khyo, pyam' boem ago".

Gyid Sangphoo' Byo, Yoin" Lo" Da" Khyoo:

³⁹ Moug: bo" myo, myang loo lang" gi gyid sangphoo' ku" mo, gi nyangnu" kha: khyi, moo ju" nyid bye: ziri asi nghoid ago". nghoid loug we' nyangnu" gi mid' doem: daloem: ri shau" myang boem wigi ge, bue" nghoid rigi hau" joyoo khyoo: sangphoo' gu: dab, yhi: wa shid re" yoem: gye" kaid' nyid boem ago".

⁴⁰ Houg: yoomo ngoonu" gi joto' nghui" ri panglai khoug: khyoo: zhaid' phyed' khyo' kaid' lho: wigi hau: u" nyang: nyhab, cam" tei" ri we' phoid: pyam' ago". Hau: thang: ri nyangnu" gi sangpho, shid' vhu" mo pain" luang: joem ri we' tu: khyo' kaid' boem wigi panglai boug jhoin: midcoo: doem: khyoo: khang" lo" ago".

⁴¹ Nghoid loug we' sangphoo' gi mid' coo: doem: moo lo" thau" zhoug to". sangpho, vhuloem ayo" dei, lo: ziyo' sangphoo' thang: moo gi gyid being: mhoid' joem lo baid' nyid yoomo adu atoem byo, sain" loo" bye.

⁴² Houg: lang" gyizoo: yi gi thung: byu yi gi gyid shab, shab, lho: phang: loid lo" boem wa ziri seing" kho" boem yoomo thung: byu yi dangain" ziri said' pyam' wa ga: soin' lo boem ago".

⁴³ Nghoid loug we' gyizoug: phoo gi Polu ri khyoid yu nau, wigi Nya: gyizoo: yi ri houg: su" akoid wa shid' mo toem, pyam' da. Houg: yoomo gyizoug: phoo gi gyid shab, se' shab, bang: ri xang: shed" sangphoo' tho' mo byam, gyoo" nhang: lho: panglai boug jhoin: middeom: khyoo: shab, dab, loo" nhang: da.

⁴⁴ Hau: lho: deing shi" da" byu dayham" rigi seig thi" khyam" yo' dayham" rigi sangphoo' byo, da" adu joem moo zei: nhang: lho: shab, dab, loo" wa shid re" amyeing" byid: kaid. Ngoonu" dangain" mo, gi hau: joyoo khyoo:- houg: su" ci: aca" loo: yo" gu: dab, lo" boem bye.