ACTS 26 - Lacid Common Language Bible

Khokham" Agripa Shid' Moo Polu Gi: Nya: Gung Ri: tid Ve Yu Da" Khyoo:

¹ Khokham" Agripa gi Polu ri Re" shid mo nang dang: tid wa da" akhang" yo" ga: tid. Houg: lang" Polu gi nya: lo, ri yoin" kaid' lho: nya: gung ri nyang: tid ve, yu da.

² Khokham" Agripa we"- ngoori Yuda byumyu" yi yooboo foin: boem da" khyoo: dangain" - akhid" nyid" re" da" shid' khoin" moo ngoo nya: gung ri yo' tid ve, yu da" khyoo: gi nga" shid' mo gye" gyi: da" amyeing" akhang" nghoid bye" - ein: ngoo myed yu bye.

³ Khokham" Nang gi Yuda byumyu" da" thung" ri yo' sen: lho: tid ngeug go" da" khyoo: dangain" ri voin: tang: za: si' su: nghoid. Houg: yoomo nga" da" dang: thui: ri nheigloem: sheing: sheing: za: tam" gyo: yu byid: wa shid re" ngoo mho' nyid.

⁴ Ngoo gi zooyam, pyaid mo khasu" kang: so' dei nyid lid lo da" khyoo: ri Yuda byumyu" yi dangain" se' boem ago". ngoo gi xang: shed" ayo, moo ngoo nyang: khu: lo da" meing: moo nyid lho: hau: thang: rigi Yerusalem voomoo" moo- nga" da" pyaid goin" nyid lo da" khyoo: ri nyangnu" se' ago".

⁵ Ngoo gi xang: shed" mo nyang- ngoonu" nya: da" noku thung" moo gye" thain: khyo" kang: so' dei nyid lid loo bye: su: dayug nghoid. Hau: khyoo: dangain" ri nyangnu" se' too' gu zheung: nghoid boem wigi nga" khyoo: ri nyangnu" sagsi: kham, nau rigi yo" kham, boem wa zi nghoid.

⁶ Mangso wigi ngoonu" da" phoug" phyid" yi ri byid: to" da" dang: soo" ri" ngoo myed, byu nyid yoomo akhid" ngoo gi he: joyoo moo yab, jo, wigi myed: ca: yu" ziri shau" nyid da.

⁷ Daxe: eig kung: mo nyangnu" ko' bang: gi hau: dang: soo" ri yo" Kham: yu sho' myed byu nyid boem wigi nyid ri myen" ri Mangsoo ri noku nyid boem. khokham" phoo we"- hid: su" myid byu nyid boem da" gang mo ngoo gi Yuda byumyu" yi wigi yooboo foin: zi shau" nyid.

⁸ Mangso wigi byu yi shid' re" dei to' loo nhang: ziri age loem" ga: he: khyi, moo nyid to" da" nanu" gi khasu" ein: jho: nyid go" la".

⁹ Ngoo nyang: we' - Nazared mo Yesu da" myeing ri gyi, koid da" moozoo" ri ngoo yo" koid yhi' mo koid eung: su: nghoid ein: jho: lo yu" da" byu dayug nghoid.

¹⁰ Ngoo gi Yerusalem voomoo" moo houg: su" nyang: koid lid loo bye- Ngoo gi khainjung agyi moo" yi jang" mo amyeing" ri mho' ci: lho: - Mangso byu yi myoo" sho' ri thung: tei" lhoung wigi nyangnu" ri said' pyam' wa jang" moo we' myed veung" da" lo. bo tu: lo yu" bye.

¹¹ Yuda tarha" jung joem moo we'=nyangnu" ri myoo" sho' lheing: yoobo dam, kaid' wigi nyangnu" da" loem" jeung" khyoo: ri ngeug pyam' boem wa shid re" ngoo gi gye" yoem: kaid' loo bye. Ngoo gi nyangnu" ri nheig soung yoo: noug yoomo gootu: da" mungdain mo voogung joem khyoo: lang" ju" yhe: wigi nyangnu" ri shen" yhen yu" bye.

Polu Nyang: Yesu Ri: Loem" Jeung" Lo Da" Khyoo: Ri: tid Kyo".

¹² Houg: su" koid wa shid re" ngoo gi khainjung agyi moo" yi jang" mo amyeing" ri mho' ci: lho: wigi Damasku voogung khyoo: do, loo" bye.

¹³ Khyoolaid' moo do, lo" nyid uri nyid" khyoug bidnyid" gung tu: ayo, moo Khokham" phoo we" - Bid' tho' moo je bang da" bidbang daloem: gi moug: khung: khyo" bang thu' lo wigi nga" da" ayam, aqei: yo' ngoo yo' dage" nghoid mo, da" ayam, aqei: moo bang jo, ziri ngoo myang.

¹⁴ Ngoonu" dangain" bang: gi myidjang: moo leung lo" byug boem wigi Hebre" myeing" khyo" Sho" lu- Sho" lu Nang ngoori cikoid shen" yhen nyid lha". Nujung loo: gi nya: Aseung: da" voosi" zucoin: moo khyid: peig peug yu ziyo' dakhyoo" ti" nang gi ngoori gyi, koid wigi - nanya: gung ri nanyang: noo nhang: da- ga: tid da" thui: ri ngoo shau" gyo.

¹⁵ Houg: lang" ngoo gi Aseing: we"- Nang hang" su: nghoid lha". ein: myed: kaid. Aseing: gi nang shen" yhen nyid da" Yesu nghoid - ga: tid.

¹⁶ Nghoid loug we' to' lho: so" yhe: loo" we' nang ri nga" dei, zoo: khyo" nyheung too" wa shid re" nga" gung nang ri toin" shid' bye. Akhid" nyid" ngoo nang ri ce: noem toin" shid' bye: da" khyoo: yo' Thang: phyang" ngoo nang ri toin" shid' shi" wa khyoo: ri Nang gi subi" gooji yi ri sagsi: kham, byid: ca" wa zi nghoid da.

¹⁷ Ngoo gi Israela byumyu" yi da" lo, mo we' - nang ri ngoo nhang: kaid' wa da" - tungbau byumyu" da" lo, mo we' nang ri khyoid yu wa zi nghoid.

¹⁸ Nang gi nyangnu" da" myojid" ri bang" loo nhang: lho: nyangnu" ri moug: coid' khoug: mo zi bidbang khoug: khyoo: Satan da" yoem: so' khoug: mo wigi Mangso yoem: so' khoug: khyoo: phoug loo nhang: wa nghoid. Hougsu" nyangnu" gi ngoori loem" jeung" lo boem khyo" wigi nyangnu" da" youg: noo yooboo joem ri khyoid pyam byid: zi shau" lho: Mangsoo khyen: yu to" da" mo, phung: moo yo" boo mo, bue" loo goo" wa zi nghoid.

Polu Gi: Nyang: Zei: Lo Da" Moozoo" Ri: tid Kyo" Da" Khyoo:

¹⁹ Hougsu" nghoid yoomo Khokham" Agripa we" - moug: Khung: khyo" toin" shid' da" myo, myang ri ngoo gi angeug pyam.

²⁰ Ngoo gi xang: shed" ri Damasku voogung moo Yerusalem voomoo" moo hau: thang: ri yuda mung" goin" jang" moo we' tungbau byumyu" yi ri we' nyangnu" da" yooboo mo nheigloem:" thed' lo boem wigi Mangso shoid khyoo: lheung: loo ca"- houg: su" nyangnu" nheigloem: thid' bye"- ga: ziri lo, moo" khyo" - aved, asam" yo' zei: shug khyo" toin" shid' ca- ein: ngoo cang kho" kyoo" bye.

²¹ He: khyoo: yoomo Yuda byumyu" yi gi ngoo noku yhoem: moo" moo nyid to" uri re" zheung: myheug yu lho: ngoori said' pyam' wa ga: soin' lo ago".

²² Nghoid loug we' akhid" nyid" ju" sho' Mangsoo gi ngoori pang" thung byid: nyid yoomo hid: moo yab, jo, lho: - gyi: su: ngisu: a ein: loo: yug khang" moo" ri sagsi: yo" kham, byid: nyid zi nghoid.

²³ Meshia gi dayam, dayoo: kham, zo: wigi nyang: gi shid: jang" mo xang: shed" doem dei to' loo su: nghoid ziyo' - Yuda byumyu" yi yo' tungbau byumyu" yi ri khyoid yu khyoo: ri tid fu" loo" goo" wa ga: Meshia yo' lapi: yi tid too" khare" ziyo' dakhyoo" ti" ngoo kho" kyo"- ga: tid.

²⁴ Polu gi hid: su" nya: gung ri tid ve, yu nyid uri Phestu gi Polu we" «Nang ko" abye:. Nang gi phajhi" sung jhau" ci: wigi ko" lo" byug bye: nhung:» ga: nyho: tid kaid.

²⁵ Houg: lang" Polu gi phau" myang: da" zoug: phoo we"- ngoo gi akoo" -deingmain" da" khyoo: ri gyeing: gyeing: za: da tid nyid.

²⁶ Khokham" Agripa we" - hau: khyoo: joem ri nang si' gu nghoid yoomo ngoo gi re" da" shid khoin" moo agyug avoem, looza: tid nyid zi nghoid. Khasu" wim gari he: da" moozoo" gi ajhoin: ajhab, mo khoug" soo" lanyham" bue" lo da" moo" anghoid ziri Khokham" phoo nanyang: se' too" gu nghoid wam: bye"- ein: ngoo myed loem, nyid.

²⁷ Khokham" Agripa we" - Lapi: yi da" jhoem: mungdang: ri nang loem" jeung" la". Nang loem" jeung" nyid ziri ngoo se- ga: tid.

²⁸ Houg: lang" Agripa Polu ri tid zigi daso' dadam da" agyoo: moo nang ngoori Khristain yo bui" nhang: wa ein: jho: la"» ga: tid.

²⁹ Polu doem tid zigi daso' dadam ga: nghoid loug we' - myang" sho' nghoid, nghoid hau: zigi yhoug: gyen: khyoo: anghoid - Khokham" phoo Nang yo' dage" akhid" nyid nga" dang: ri tam" gyo: nyid bang: dangain" gi Hid: nga" jangcoo" doem' ri atid noug- ngoo yo' dakhyoo" ti" bue" lo boem wa shid re" Mangsoo ri ngoo akyu" mho' nyid ga: phoug tu.

³⁰ Hau: thang: ri Khokham" Agripa gi mung" zoug: phoo Bernike yo' gootu: dangain" mo, gi joyoo mo thu yhe: lo" wigi

³¹ Nyang: nu" gi hau: joyoo mo thu' yhe: lo" boem thang: ri Byu he: yug gi shid: moin: da" yooboo anghoid lang" myheug lhoung too" wa da" yooboo gi ci: ashoid nghoid da- ga: nyang: cang" nyang: tid go" nyid ago".

³² Agripa gi phestu ri tid zigi - Byu he: yug gi Khosen" pho, jhang khyoo: lhai: to' kaid' ge" ga: nyang: amho, to" nghoid rigi - nyang: ri ge, phoid: nhang: kaid' bye" - ga: tid.