ACTS 10 - Lacid Common Language Bible

Petru yo' Koneli Khyoo:

¹ Kesare voogung mo «Itali dab» ga: da" Roma gyidab, dadab ri vhoeb, da" - gyizoug: phoo koneli ga: su: dayug nyid.

² Nyang: gi Mangso khyoo: ri kang: lung bu, su: nghoid wigi nyang: yo' nya: ikoin deungkhu: byu yi dangain" mo, gi Mangsoo ri Noku nyid ago". Nyang: gi sho" jhen: da" Yuda byu yi ri myoo" sho' pang" thoug byid: wigi Mangsoo ri beung abyid' akyu" mho' nyid su: nghoid.

³ Danyed" mo da" myenthang: soem" nayi: koo: moo Mangso moug: lagyoo: dayug gi nya: jang" moo ju" re" lho: «Koneli we"» ga: re" yoid ziri yoeb, myang moo bang bang za: shau" myang kaid.

⁴ Nyang: gi gyoug ziyo' Mouglagyoo: ri yu" zhug to" lho: «Aseing: we" ce: noem lha"» ga: myed: Mouglagyoo: nyang: ri «Mangsoo gi re" da" akyu" mho' thui: yo' re" alu jhung: shug ri, , ngei yoomo tu" byid: wa zi jen" jen" nghoid bye-

⁵ Houg: yoomo akhid" Yopa voogung khyoo: byu nhang: kaid' lho: Simun Petru ga: su: ri yhe: khe: shu" loo nhang: we'.

⁶ Nyang: gi panglai gyid yam, mo shoo" yid' moo" zei: su: Simun ga: su: yhoem: moo theung: nyid da» ga: tid.

⁷ Hau: moug: lagyoo: lo" byug thang: ri koneli gi nya: yhoem: mo dei zoo: eig yug yo' Mangso khyoo: ri kang: lung bu nyid da- Nya: gung jung" gyizoo: dayug ri khe: yu lho:

⁸ Bue" lid loo bye: da" khyoo: dangain" ri nyangnu" ri tid kyo" lho: nyangnu" ri Yopa voogung khyoo: zheung: nhang: kaid.

⁹ Hau: thang: nyid" moo nyangnu" yhe: lo" wigi Yopa vooyam, moo ju yhe: lo" nyid boem bye. bid gung tu: ri" yo, moo Petru gi akyu" mho' wa shid mo yhoem: atho' pyam: khyoo: do, lo.

¹⁰ Nyang: zooyoid loo yoomo zoo: noem, zoo: nau, lo da. Zoo: noem nyheung joung nyid da" uri nyang: gi yoeb myang daja: ri myang bye.

¹¹ Hau: da" yoeb, myang gi moug: khung: bang" lo" wigi myed: khyoug: goin" jang" moo zei: ci: da" mi, join' yo' du da ja: ri myed, jang: tho' khyoo: yhoin" khyo' kaid' ziri nyang: myang.

¹² Hau: akhoug: moo myed: khyid: dab, da- gougnyhoug acang: joeb, sho' do: yu: yen" da" gougnyhoug ja: yo' siyoo mo ngho' zoo: yen" zoo: acang: joeb, sho' bo nyid.

¹³ Houg: lang" Petru gi to' lho: said' zoo: we' ga: da" thui: da thui: ri shaug" gyoo: bye.

¹⁴ Nghoid loug we' Petru tid zigi Aseing: we" hau: zigi dajhi we' age bui" nghoid da- houg: yhang: te" aco' ajhoid' ja: ri ngoo khanham we' alhoung: zoo: ga: phoug tid.

¹⁵ Doem phoug tid lo da" thui: gi " Mangsoo gyeungshang: ga: ziri nang agyeing" ashang: ein: asoin: yu, ga: doem tid.

¹⁶ Soem" lheing: ju" sho' houg: su" bue" nyid lho: thang: rigi hau: ziri moug: khung: khyoo: doem to' yu pyam' bye.

¹⁷ Petru gi he: da" yoeb, myang ri myid mau" nyid shi" uri koneli wigi nhang: kaid' da" byu yi gi Simun da" yhoem: ri sho: myed: yu" lho: nyangnu" gi yhoem: pain' khoem" moo" duang: moo re" yab, jo, boem bye.

¹⁸ Nyang: nu" tid zigi " Simun Petru ga: da" being: voo, dayug anyed la"., ga: myed: ago".

¹⁹ Petru gi hau: da" yoeb, myang yo' sen: wigi damyed yu" nyid shi" uri gyeungshang: da" Venyi gi nyang: ri yu" we' - hid: moo byu soem" yug gi nang ri sho: nyid boem ago".

²⁰ Nyang: nu" yo' shau" goo" wa soin' nyheung lho: gyoo" loo" we' - khasu" wim gari ngo wigi nhang: kaid' zi nghoid yoomo ug vho" zi aboo loo: za: nyangnu" thang: moo cang yhi: we' ga: tid.

²¹ Houg: yoomo Petru gi gyoo" lo wigi nyangnu" ri nanu" sho: nyid su: gi ngoo nghoid-nanu" cikoid ju" ri" go" ga: myed.

²² Nyang: ri" tid zigi ngoonu" ri gyizoug: phoo koneli wigi nhang: kaid' zi nghoid, nyang: gi byugi dayug nghoid lho: wigi Mangsoo ri coung" nghei nyid su: dayug we' nghoid ziyo' - Yuda byu yi dangain" mo, coem phau" myang: nyid su: nghoid. Re" da" mungdang: ri nyang: shau" tam" gyo: yu wa shid re-mau: lagyoo: dayug gi nang ri nya: yhoem: khyoo: khe: yu wa shid re" nyang: re" tid bye.

²³ Houg: lang" Petru gi nyang: ri khe: yu lho: hau: myen, yhoeb wa shid mo nyangnu" ri lhoung: to. Thang: nyid" ri Petru gi to' wigi nyangnu" yo' dage" cang yhe. Yopa voo moo nyid da" loem" jeing" bang: dayham" we' Petru yo' dage" cang yhe: lo" boem.

²⁴ Hau: thang: nyid" moo koneli gi kesare voogung moo nya: byumyu" mang: nhung" bidnoem yi yo' nyang: khe: to" da" bidnoem yi yo' dage" Petru ri lang" nyid boem ago".

²⁵ Petru ju" vang loo lang" -koneli gi nyang: ri yhe: tau, yu lho: Petru da" khyid: yang: moo goeb, gyo" lo" wigi nyang: ri pid.

²⁶ Nghoid loug we' Petru gi to' yab, we' ngoo we' byu za: danghoid- ga: tid lho: nyang: ri she: to' kaid.

²⁷ Petru yo' koneli gi doem, go" zoore yhoem: khoug: khyoo: vang lo" boem ri yhoem: khoug: moo mung" byu yi myoo" sho' - zeung: foem: nyid ziri Petru lo" myang.

²⁸ Petru nyangnu" ri tid zigi Yuda byu dayug gi tungbau byu yi yo' age zoem" goo" - dage" age nyid ga: ziri nya: noku thung" khyo" toung: to" zigi nanu" nyang: voin: tang: si' gu nghoid bye. Nghoid loug we' hang" ri nghoid loug we' Noku thung" khyo" agyeing" ashang: yung" alhoo, ein: wigi hang" ri we' ngoo age myed lo: khyoo: ri Mangsoo gi ngoori toin" shid' too" bye.

²⁹ Hougsu" wigi nang ngoori khi: nhang: kaid' da" uri ngoo gi ci" we' ahi: loo: za: cang ri" bye- Houg: yoomo nang ngoori khi: nhang: kaid' da" khyoo: ri akhid" tid kyoo" we' - ga: tid.

³⁰ Houg: lang" Koneli gi lid lo" da" soem" nyid" koo: moo myenthang: soem" nayi: yo, ri ngoo gi yhoem: khoug: moo akyu" mho' nyid uri nyid' dain' tung" lo, lo, bang da" byimi, void, ci: da" - byu dayug gi nga" shid moo re" yab, jo, lho:

³¹ Koneli we" re" da" akyu" mho' thui: ri Mangsoo shau" gyo: abye:- Re" da" khoug: loem, alu: gam, byid: da" khyoo: ri we' - myang abye:.

³² Houg: yoomoo Yopa voogung khyoo: byu nhang: kaid' lho: wigi Simun Petru ga: su: ri khi: nhang: kaid' we'. Nyang: gi panglai gyid yam, mo shooyid' moo" zei: da- Simun ga: su: yhoem: moo being" do, nyid da- ga: ngoori tid.

³³ Houg: yoomo ngoo gi houg: jang: nyang- re" jhang khyoo: byu nhang: kaid' bye- nang ju" ri" yoomo gye" goug bye. Nyang: nang ri tid nhang: kaid' da" mungdang: dangain" ri tam" gyo: yu wa shid mo akhid" ngoonu" dangain" mo, gi-Mangso shid' khoin" moo lang" nyid boem- ga: tid kyo.

Petru Kho" Kyo" Da" Mungdang:

³⁴ Houg: lang" Petru gi Mangsoo gi yug khang" moo" ri myonhoo: vhuzung akhyen: loo: za: koid nyid ziri akhid" ngoo gyeing" nyang: si' bye.

³⁵ Ce: noem byumyu" nghoid sho" loug we' Nyang: ri coung" nghei lho: deingmain" da" khyoo: moo cang loo su: rigi Mangsoo lhoem: kham: yu nyid.

³⁶ Dangain" mo, da" aseing: nghoid- Aseing Yesu khristu khyo" wigi Israela byumyu" yi ri Mangsoo tid fu" byid: da" ngei pyoo: yug yo ludang: seig nghoid mungdang: ri nanu" nyang: se' abye: go.

³⁷ Yohan gi nya: babtisma mungdang: ri bain kho" kyoo" lang" Galile meing: mo bue" shed" lho: wigi Israela mungdain goin" jang" moo bue" ju" loo" bye: da" khyoo: ri nanu" nyang: si' gu nghoid bye.

³⁸ Houg: yoomo Nazred mo da" Yesu ri Mangsoo gi gyeungshang: da" Venyi yo' yoem: so' khasu" foid, shoin" kaid' byid: bye: da" khyoo: ri nanu" si' abye: go. Khasu" wim gari Mangsoo gi nyang: yo' dage" nghoid wigi ge, da" moozoo" ri zei: lho: yu, join: yoem: so' khoug: moo loung" jo, mo, dangain" ri cang ge, loo" nhang: yen" bye.

³⁹ Yerusalem voogung yo' Israela mungdain goin" Yesu koid da" lo, moo" dangain" yo' sen: lho: wigi ngoonu" gi sag si: nghoid nyid. Hau: tho' moo nyangnu" gi Yesu ri pyang" zeing moo jen" said' pyam' abye: go.

⁴⁰ Nghoid loug we' soem" nyid" kyo: thang: ri Mangsoo gi nyang: ri shid: bye: jang" mo doem dei, to loo nhang: wigi

⁴¹ Yug khang" moo" ri anghoid loo: za: sag si: joem ga: Mangso wigi khyen: yu too" mo ngoonu" ri za: toin" shid' lho: nyang: doem dei, to' lo thang: ri- nyang: yo' dage" zoo: noem shoin" zo: boem bye.

⁴² Nyang: gi byu dangain" mo, ri ngeibu: ludang: gi, ri kho" kyoo" byid: wa ziyo' Kangso' dei nyid shi" mo, yo' shid: loo" bye: mo, ri tarha" dang: phyed' wa shid re" Mangso wigi nyheung to" da- tarha" agyi zeing nghoid da" khyoo: ri sag si: kham' wa shid mo ngoonu" ri nyang: amyeing" byid: too" bye.

⁴³ Nyang: ri loem" jeing" bang: yug khang" moo" gi nya: myeing mo amyeing" akhang" khyo" wigi yooboo khyoid pyam' byid: zi shau" wa shid re" nya: khyoo: yo' sen: lho: lapi: yi dangain" bang: gi tid boem abye: go" ga: tid.

Tungbau Byumyu" Yi We' Gyeungshang: Venyi Yo" Kham: Yu Khyoo:

⁴⁴ Houg: su" Petru gi dang: da tid nyid shi" ri nya: mungdang: ri tam" gyo: nyid da" byu dangain" mo, atho' moo gyeungshang: da" Venyi gi ju" gyo" loo bye.

⁴⁵ Tungbau byumyu" yi da" atho' moo we' - Mangsoo gi nya: gyeungshang: da" venyi jhung: shug ri foid shoin" kaid: byid: bye: yoomo Yopa voo mo Petru yo' dage" ju" ri" mo, Yuda byumyu" yi mo loem" jeing" mo, gi mau" hang" to" boem ago".

⁴⁶ Khasu" wim gari nyangnu" gi myeing" aja: ja: kaid' wigi Mangso da" gyi: thang phung" yoeb, ri gyisho' coung" nghei byid: nyid ziri nyangnu" shau" gyo: boem yoomo nghoid da.

⁴⁷ Houg: lang" Petru gi Hid: bang: gi ngoonu" yo' dakhyoo" ti" gyeungshang: Venyi: ri yo" kham: yu boem ago- Houg: yoomo nyangnu" gi gyid' moo babtisma kham: yu boem wa ziri we' hang" yo" toem, too" wa go" lha"» ga: tid thu' kaid' da.

⁴⁸ Houg: yoomo Petru gi nyangnu" ri Yesu khristu da" myeing khyang" mo wigi babtisma kham: yu boem wa shid re" amyeing" byid: bye. Hau: thang: ri nyangnu" gi Petru yo' dage" dayo, zoo: theung: nyid wa shid mo mho' ago".