2 TIMOTHI 4 - Lacid Common Language Bible

¹ Mangso da" shid' khoin" moo we' dei nyid bang: yo' shid: jo, mo, ri tarha" dang: phyed' wa da" Khristu shid' khoin" moo we' hau: Aseing; gi vhoeb, khang" wa da" kho: kham" khyo" ju" ri" wa zi nghoid wigi

² Hau" mungdang: kho" kyoo" wa shid re" se' gyoo: nhang: wa shid re" yooboo toin" shid' lhoo: gyikoid wa shid re" yoem: foin, byid: wa shid re"- nheugloem: sheing:' sheing: jhoug" byid: mhoo, byid: wa shid re" ayo, aboin: eung: nghoid loug we' acoung: nghoid loug we' yoem: dakhaid nyid we ein: ngoo nang ri doin: nyhen" nyid.

³ Byu yi gi hau" deingmain" ziyo' ca yoo abo da" jhoug" myeing" jhoug" thui: ri atam" gyo: boem wigi nyang: tu: nya: nheigloem: aco' ajhoid khyoo: moo za: te: cang lo" boem ziyo' nyangnu" da" nheigloem: moo yo: phoin: loo" sho' nyang: tam" gyoo: nau da" se' jhoug" byid: da" sara: yi je" je, myo: lo boem sho' khyu: zheung" yu da" ayo, gi ju" loo wa zi nghoid.

⁴ Nyang: nu" gi hau" deingmain" da" khyoo: ri tam" gyo: nyid jang" mo phoug lo" boem wigi byu yi da" byuxeig mhoo: myid: ri tid nyid bang: jhang khyoo:- tam" gyo: lho: nheigloem: vang zo: lo" byug boem wa nghoid.

⁵ Nang koem gi khayhang: te" da" akhyoo: again thoung" shau" loo nghoid loug we' re" da" gung du: ri zei: zeung" ci: lho: wigi kyi" khyeug khyoo: ri kham' zeung: nyid we'. Hau: ngei bu: lu dang: ge ri kho" kyo" da" sara: moozoo" ri voin, vu, nyid wigi Mangso dei zoo: dayug khyo" wige- re" da" yoovoin, jo, moo jo, ri joeb, byeung" sho' voin, vu, nyid we'.

⁶ Nga" shid' re" koem gi ngoo nya: kangso' ab, byid: pyam wa da" ayo, ju" loo bye- akhui" hid: moo lang" nga" mougmyid' kangso' ri to" pyam' khoo, wa yo, gi ju" lo nyid bye.

⁷ Ngoo gi gei, shi go" pui" moo yoem: so' bain sho' gei loo" bye. gei, wa shid re" ke' to" da" lake, bain: zeing: moo ju" sho' gei bye. Hau: loem" jeung" khyoo: ri ngoo bain' cang bye.

⁸ Akhid" mo wigi deingmain" da" tarha" agyi ein: da" hau" Aseing: gi tarha" dang: phyed' da" bidnyid moo ngoori byid: wa nghoid da" hau: deing byeung" da" kangso' dei khyoo: yo' sen: da" oung: doid lo" bidmug gi nga" shid re" shoung: too" bye- ngoori za: we' anghoid- nyang: doem, ju" ri" wa da" khyoo: ri vho: ngei ziyo' lang" nyid bang: dangain" ri we' ab, byid: wa zi nghoid nyid.

Polu Nyang: Yo' Sen: Da" Pyeing: Dang: Khoin"

⁹ Nga" jhang khyoo: myab, myab, yo" ju" ri wa shid re" yoem: bain' sho' kaid' yu" we'.

¹⁰ Dema gi he: da" mougmyid' ri jheddab yoomo ngoori she: pyam' khare" lho: Thesaloni voo khyoo: loo" khari" bye. Kareka gi Galati mung" khyoo: Titu gi dalamati mung" khyoo:- zheung: yhe: lo" boem bye.

¹¹ Luka za: ngoo yo' dage" nyid nyid Marku ri khe: yu lho: nang yo' dage" shu" ri" we' khasu" wim ga: ri he: moozoo" moo nyang: ngoori yo" bo pang" thoug wa zi nghoid.

¹² Tukhiku ri koem gi Ephesu voo khyoo: ngoo nhang: kaid.

¹³ Nang re" lo da" uri Troa voo mo Karu moo to" da" nga" byi sheing: we' mougsoug" joem ri we' hau: lho: je" yhoug: gyen: da" shooyid' mougsoug" joem ri we' bo yu ci: ri" byid: we'.

¹⁴ Ngei byug: koid su:- Alexandru gi ngoori age khyo" myoo" sho' ja: koid bye- nyang: koid ziyo' dakhyoo" ti" hau: Aseing: gi nyang: ri latoo: doem, phug wa zi nghoid.

¹⁵ Nanyang: hau: yug ri lhed' lho: jang" pyam' nyid we' Khasu" wim ga: ri hau: yug gi ngoonu" kho" kyo" da" mungdang: ri gye" tu: lhoin" thoutheung nyid su: nghoid.

¹⁶ Xang: shed" lheing: ngoo tarha" dang: phyed zi shau" nyid uri nga" da" gung ri ngoo tid goem, yu nyid uri nga" thang: khyoo: bo yab, lho: hang" we' abo tid byid: boem, byu dangain" bang: gi ngoori she: pyam' to". boem, bye- Mangsoo ri we' nyangnu" hid: su" koid boem yoomo latoo: aphug byid: baja".

¹⁷ Nghoid loug we' Aseing: gi ngoo yo' dage" nyid nyid yoomo ngoori yoem: lung: byid: nyid wigi ngoo gi tungbau byumyu" yi dangain" bang: shaug" gyoo: sho' hau" ngei bu: lu dang: gi ri joeb joeb, byeung" byeung" yo" tid kyoo" baja"- said' pyam wa ga: dang: phyed' too" bye: jang" mo khyoid yu ziri ngoo shau" kham: yu bye.

¹⁸ Hau" Aseing: gi akhyeing" ashoeb khyoo: dangain" jang" mo nya: moug: khoung: mungdain: moo ju" sho' goem, loem byid: wigi shu" loo" wa zi nghoid nyid. Nyang: moo apyaid' atoo: mo myonhoo: phung" yoeb, gi dabo, jo, nyid baja" o". Amen.

Lo" Thang Movhu" Kaid' Da" Dang:

¹⁹ Priska yo' Akula eig yug we' Onesiphura da" yheom: byu yi ri bo vhu" byid: kaid' ago".

²⁰ Erastu gi Korinthu voo moo nyid nyid Trophimu gi noo yoomo Melitu voo moo ngoo nyhed: too" kho' bye.

²¹ Xung gung ngam" yo, aju" shi" uri yo" ju" ri" sho' yoem: bain' sho' kaid' we'. Ubulu Puden Linu Klodia yo' gootu: Khristain mang: nhung" yi gi nang ri vhu" kaid' boem ago".

²² Hau" Aseing: gi re" venyi yo' dage" dangyi nyid baja"- Mangso da" Venyi gi nanu" yo' dage" dajo, jo, baja" o".