2 SAMUELA 22 - Lacid Common Language Bible

David da" Oung: Doid Jihkoin"

¹ Aseing gi David ri Sholu yo' nya: da" gootu: gyivoo joem lo, mo khyoid uri David gi he: jikhoin" yo' Aseing ri coung" bye:.

² Aseing gi ngoo ri lhoug zung" su nghoid. Nyang: gi yoem: gyi: da" nga" gyidab nghoid.

³ Nga" Mangsoo gi ngoo khoug: nghi: jang: nghoid. Nyang: yo' dage" ngoo goem loem nyid. Nyang: gi ngoo ri goo yhang: ti" goo byid: Nyang: gi ngoo ri lhoug zung" ziyo' goem loem nyid nhang: da:. Nyang: gi ngoo ri khyoid yu su: nghoid. Nyang: gi ngoo ri pyi: joem: sho: khaid said jang" mo lhoug zung" ziyo' goem loem byid: su: nghoid.

⁴ Ngoo gi Aseing ri mho' yoid- nyang: gi ngoo ri gyivoo joem da" lo, mo khyoid yu nyang: gi coung" nghei byid: zi shoug" moin: nyid.

⁵ Gyug pho" shid: gyoin gi ngoo ri: dangain" lheung khoem to"- lhu: phyo' pyam wa da" beung: mhoid joem gi nga" atho' moo: doin: lhoem" too" bye:.

⁶ Gyug pho" shid: gyoin gi ngoo ri lheung khoem too" bye:. Loeb duang: gi nga" shid re" gyoin: kham: to" abye:.

⁷ Ngoo gi nga" kyi" khyeug khoug: mo Aseing ri yoid bye:. Ngoo ri pang" yu wa shid re" nga" Mangsoo ri ngoo yoid bye:. Mangsoo gi Noku Yhoem: Moo" khoug: mo nga" thui: ri shoug" gyoo: bye:. Pang" thug wa shid re" ngoo ngau yoid thui: ri nyang: tam" gyoo: byid: bye:.

⁸ Houg: lang" Mangsoo nheug yo: wigi mougmyid gi nain" lho: lei" loo bye:. Boem joem we' apoem: mo nyang: yoid yoid ga: wim lho: lei" nyid.

⁹ Nya: nhoo: duang: mo myi: khoug" nghoid loug we' nya: nhoid mo nge" dab, nyid da" myiyham: yo' myigyu: joem ri: moid thu' kaid nyid.

¹⁰ Nyang: gi mougkhung: ri lang: khyo' kaid lho: ceug yo' no, da" jhoemmoug" thei" ri nya: khoovoo: khau: moo: kaid ci: lho: nyang: gyoo" lo.

¹¹ Nyang: gi dung dab gougnyhoug tho' moo: zhung: lho: gye" myab, sho' dang: lo. Nyang: gi lid zoo" dung soo" yo' gyung: so" lo.

¹² Nyang: gi nya: gung ri moug: coid yo' nghoeb too" nhang:- gyid byeung" sho' bo da" joem" moug" yo' nyang: ri lheung khoem to" nhang: nyid.

¹³ Nya: da" shidkhoin" mo leug voo yo' myiyham: joem gi lhab' myeug nyid jang" mo thu lo lho: teung: no, da" jhoemmoug: khoug: mo kyang thu lo.

¹⁴ Houg: lang" Aseing gi mougkhung: khyo" moug: goem: myeung thui: yo' myeung thu lo lho: myhang: thang su: da" thui: ri shoug" gyo.

¹⁵ Nyang: gi myoo: ri beug tang" kaid nyid wigi gyivoo joem ri byo sain" loo" nhang:. Lhab' ri myeug nhang: lho: wigi nyangnu" ri phang: thu loo" nhang:.

¹⁶ Aseing we" nang gi gyivoo joem ri gyi koid lho: nyangnu" ri nheug khoo" yo: nhain' nyid da" uri panglai: gyid thoem" thi" gi akoem: bue" lo" byug bye:. Mougmyid da" apoem: ayang: gi yhoin" thu' lo nyid bye:.

¹⁷ Aseing gi tho mo lo, yhoin" kaid lho ngoo ri zei: ci: wigi gyid no, thoem" thi" mo ngoo ri she: thu' yu bye:.

¹⁸ Nyang: gi yoem: bo da" gyivoo joem lo, mo nghoid loug we'- yoem: moo" bo lho: ngoo ri ngheing" bang: dangain" mo, da" lo, mo we' khyoid yu bye:.

¹⁹ Ngoo kyi" khyeug shoug" nyid da" bidnyid moo nyangnu" gi ngoo ri khaid zain: lo nyid boem. Nghoid loug we' Aseing gi: ngoo ri lhoug zung" goem coung: byid: nyid.

²⁰ Nyang: gi ngoo ri gyoug dain khoug: mo pyoin yu bye:. Nyang: gi ngoo ri jheddab vho: ngei nyid yoomo khyoid yu bye:.

²¹ Ngoo gi deung byeing su: nghoid yoomo Aseing gi ngoo ri ngi: shab jhungshug byid: bye:. Ngoo gi ce: yooboo adab su: nghoid yoomo nyang: gi ngoo ri mainkaid byid: bye:.

²² Ngoo gi Aseing da" tarha" ri cang loo bye:- nga" Mangso jang" mo aphang: loo" yu".

²³ Ngoo gi nya: da" tarha" bain sho' ri zoem: ci:- nya: da" dangsoo" khoin" ri we' angeug pyam.

²⁴ Ngoo ce: yooboo ayoo" su: nghoid ziri we' yooboo joem ri jang" pyam' nyid su: nghoid ziri we' nyang: se' nyid.

²⁵ Ngoo gi deing byeung" su: nghoid yoomo we' ngoo gi ce: yooboo ayoo" su: nghoid ziri si' yoomo we' nyang: gi ngoo ri ngi: shab jhungshug byid.

²⁶ Nang gi nheigloem: zung" mo, tho' moo nheigloem: zung" nyid. Ce" yooboo foin: cang aboo mo, da" atho' moo lo" thang sho' ge nyid.

²⁷ Nang gi nheigloem: phyu: mo, ri nheigloem: phyu: khyo" koid. Nghoid loug we' akhyeing" mo, rigi gyi koid nyid.

²⁸ Nang gi nheigloem: nyhoem: khyoo' mo, ri khyoid yu nyid. Nghoid loug we' nghoid boin: nyid mo, ri koem gi doin: khyo' pyam nyid.

²⁹ O" Aseing we" nang gi ngoo ri bid bang byid: nyid. Nga" da" moug: coid ri bei: loo" nhang: nyid.

³⁰ Nang gi gyivoo joem yo' zain: goo" wa da" yoem: so' we' Nyangnu" da" dab zeing ri phyo' pyam wa da" yoem: vhoo" ri we' ngoo ri byid: nyid.

³¹ He: Mangsoo koid da" moo" zoo" joem gi gye" joeb byeung" nyid. Nya: dangsoo" khoin" joem we' loem ge" nyid. Nyang: gi nyang: ri loem khau: loo mo, dangain" shid re" goo yhang: ti" nghoid.

³² Aseing kyeing" za: Mangsoo nghoid- Mangsoo kyeing" za: ngoonu" da" gyidab nghoid.

³³ Nyang: gi ngoo ri yoem: boo nhang: da" Mangsoo nghoid. Nyang: gi gau: da" khyoo: ngoo ri soin' byid: nyid.

³⁴ Nyang: gi nga" da" khyid: ri xaid khyid: yhang: ti" geung: teung nhang: nyid. Nyang: gi ngoo ri boem tho' moo gau: nyu: nhang: nyid.

³⁵ Gye" kyung: da" lid: gi gyipui" moo: yo" yhung: wa shid re" nang gi ngoo ri jhau" byid.

³⁶ Nang gi ngoo ri lhoug zung" goem coung: khyoid yu nyid. Re" da" yu" goem khyoo: gi ngoo ri gyi: myhang: loo nhang: bye:. Re" da" yoem: so' gi ngoo ri gau: nyu: nhang: nyid.

³⁷ Nang gi ngoo ri subi" hang" we' ayo" re" myheug: loo" sho' lhoug zung" byid: yoomo ngoo gi khanham we' gyoeb gyo" loo" wa khyoo: ajo.

³⁸ Ngoo gi nga" gyivoo joem ri cang khaid lho: zain: oung: yu bye:. Nyangnu" ri yo" mhoin' pyam jang" moo: ju" sho' ayab atheing: loo.

³⁹ Ngoo gi nyangnu" ri yo" mhoin pyam yoomo nyangnu" gi ayo" to' yab boem loo. Nyangnu" gi nga" shidkhoin" moo: soem" leung jo, boem abye: go".

⁴⁰ Nga" gyivoo joem ri oung: pyam lho: meing: yo" zain: wa shid re" nang ngoo ri yoem: vhoo" byid: nyid.

⁴¹ nang gi nga" shidkhoin" mo gyivoo joem ri phang: thu loo" nhang: bye:. Ngoo we' ngoo ri ngheing" bang: ri mhoin' pyam bye:.

⁴² Nyangnu" gi pang" thoug yu wa shid re yoid nyho: nyid boem nghoid loug we nyangnu" ri hang" we' akhyoid yu boem. Nyangnu" gi Aseing ri yoid nghoid loug we nyang: gi nyangnu" ri atu" byid.

⁴³ Lid hau' tang" lo da" pheipyang" yhang: ti" bue" loo" wa shid re" nyangnu" ri ngoo mhoin' pyam bye:. Khyoogung mo thoem" boeb, ri yhang: ti" nyangnu" tho' moo: ngoo nang: pye" pyam bye:.

⁴⁴ Nang gi ngoo ri thougtheung lo da" mung" byu lo, mo khyoid yu lho: byumyu" bain sho' tho' moo ngoo ri vhoebkhang" nhang: bye:. Ngoo gi ngoonyang: ase' da" byumyu" yiri akhid" vhoebkhang" wa da" amyeing" yo" jo, bye:.

⁴⁵ Tungbau byumyu" yigi nga" shidkhoin" moo: vhu' pid goeb pid to" ago". Nyangnu" gi nga" amyeing" shoug" gyoo: lang" cang lo ago".

⁴⁶ Nyangnu" gi sarhi' anghoid byug loo: yoomo nyangnu" da" gyidab khoug: mo gyoug nain" thu' lo" byug boem abye:.

⁴⁷ Aseing gi dei nyid su: nghoid- nyang: ri lhoug zung" nyid su: ri coung" nghei ge'. Ngoo ri: khyoid yu da" Mangso gyi: thang khyoo: ri nyho: fu" nyid ge'.

⁴⁸ Nyang: gi ngoo ri nga" gyivoo joem da" tho' moo oung: loo" nhang: bye:. Byumyu" yiri nga" da" lo, zhoeb khoug: moo: vang loo nhang: lho: wigi

⁴⁹ Gyivoo joem da" lo, mo ngoo ri khyoid yu. O" Aseing we" nang gi ngoo ri nga" gyivoo joem ri oung: loo" nhang: lho: wigi akhyeung" byu yi da" gyi mo ngoo ri goem coung: yu bye:.

⁵⁰ Hougsu" nghoid yoomo ngoo gi byumyu" bain sho' mo, da" shidkhoin" mo nang ri coung" nghei nyid. Ngoo gi nang ri jikhoin" myeing" khyo" coung" nghei nyid.

⁵¹ Mangsoo gi nya: khokham ri gyi" sho' da" oung: doid lo" khyoo: byid: bye:. Nyang: gi nyang: khyen: yu to" da" David yo' nyang: byukung: byuko' yiri pyaid moo: too: moo: jheddab nheigloem: toin" shed nyid.