2 SAMUELA 13 - Lacid Common Language Bible

Amnon yo' Tama

¹ David da" nya: zoo: Absalom moo Tama ga: myheing wigi gung du: young" lho: yhoem: ayoo" shi" nya: nhung" myiyi: zoo: dayug nyid da:. Gootu: David da" nya: zoo: yi mo Amnon gi nyang: ri yu" vho: ngei nyid da:.

² Nyang: gi hau: myiyi zoo: ri gye" yu" jheddab nghoid loug we' hau: myiyi: zoo: gi zoomyi: zoo: shi" danghoid ziyo' dayhang: ti"- yuggi zoo: yi yo' ashoug" goo" nhang: noug shi" nghoid da:. Hougsu" nghoid yoomo myiyi: zoo: yo' nyang: shoug" goo" wa alei wa yhang: ti" myid wim wigi nya: gung moo noo vang lo da:.

³ Nghoid loug we' nyang: moo David da" nya: mang: Shamma da" nya: zoo:- Yonadab gi yeig da" byencang" dayug nyid da:.

⁴ Yonadab gi Amon ri «Nang gi khokham da" nya: zoo: nghoid nyid nghoid loug we' danyid" tho' moo danyid" nang moo myid apyo: da" khyoo: ri ngoo shau" myang nyid. Hau: zigi ciwim yoomo nghoid la"» ga: myid. Nyang: gi «Nga" nhung" Absalom da" nya: nhung" Tama ri ngoo yu" jheddab nyid zi nghoid» ga: doem phug tid bye:.

⁵ Yonadab gi nyang: ri «Nang noofa" fa" lho: yhoeb yoo moo lo" yhoeb jo, we' re" phoo gi nang ri re" koem" yu" lang" nyang: ri je" ju" mo nga" nhung" Tama ri nga" jang" moo re" wigi dei dei byid: nhang: we'- ngoo nyang: ri yo" myang da" he: joyoo mo nyang: ri zoo: shug soin' nhang: nau da- hau: thang: ri nyang: ngoo ri soin' zhoo" soin' jhug baja"» ga: tid da:.

⁶ Houg: yoomo nyang: we' yhoeb yoo khyoo: vang lo" wigi noo fa" fa" nyid. Khokham David gi nyang: ri «Re" koem" yu" uri Amon gi nyang: ri jeju" yo' Tama ri ngoo yo" myang da" he: joyoo moo zooyho' dajhi' re" koid nhang: we' hau: thang: hau: ziri nyang: gi ngoo ri byid: zhoo" nhang: we» ga: tid.

⁷ Houg: yoomo David gi «Khokham vang" moo nyid da" Tama ri Amon da" yhoem: khyoo: yhe: wigi nyang: ri zoo: shug dajhi' yhe: soin' byid: we'» ga: pyeung: kaid.

⁸ Nyang: gi hau: joyoo khyoo: yhe: yu" ri Amon gi yhoeb yoo tho' moo jhang" jo, ziri yhe: myang bye:. Nyang: gi cen: moin" dajhi' ri yu wigi Amon myang da" joyoo moo zooyho' dajhi' ri koid bye:. Hau: thang: nyang: gi zooyho' ri phoid lho:.

⁹ Amnon zoo: wa shid re" bain moo kaid byid: nghoid loug we' azoo: nghoid da:. Nyang: gi byu dangain" bang: thu loo" bye:» ga: tid. Nyangnu" dangain" bang: we' thu lo" byug boem bye:.

¹⁰ Hau: thang: nyang: gi Tama ri «Zooyho' joem ri nga" yhoeb yoo khyoo: ci: lo lho: hau: ziri nanyang: ngoo ri lo byid: zhoo" we'» ga: tid da:. Nyang: we' zooyho' joem ri yu ci: lho: nya: jhang khyoo: ci: loo" bye:.

¹¹ Hougsu" nyang: ri lo" byid: zhoo" lang" Tama ri lhoem: myheug yu lho «Ngoo yo' dage" yhoeb shang lha"» ga: tid bye:.

¹² Nyang: gi «Anoug- hid: yhang: ti" shang pyang: da" moo" zoo" koid wa shid re" ngoo ri akoid atho' sham: nyid- he: zigi gyoug pho" moo" zoo" nghoid.

¹³ Ngoo gi mung byu yi shidkhoin" moo vhuloem khakhyo" se' yo" nghang wa lha". Hau: lho: nang we' Israela byumyu" yi shid moo dajhi' we' yu" did adab loo: sho' shang ze" pyang: zi shoug" wa nghoid. Jeju" mo khokham ri dated yu" shang- nyang: gi re" shid mo ngoo ri byid: zhoo" wa zi nghoid ein: ngoo loem" nyid zi nghoid» ga: tid.

¹⁴ Nghoid loug we' Tama tid da" dang: ri atam" gyoo: byid: nghoid da:. Amnon gi nya: tho' mo yoem: je bo zi nghoid yoomo nyang: ri doin: zeug to" lho: shoid vhang: bye: zi nghoid.

¹⁵ Hau: thang: ri Amnon gi nyang: ri gye" nheig no loo" khare". Shid re nyang: ri yu" vho: tho' re" je" wigi yu" ngheung" byug bye:. Houg: yoomo nyang: gi Tama ri «Thu' loo" we'» ga: tid bye:.

¹⁶ Tama gi «Anoug nang shoid vhang: da" moo" zoo" tho' re" nang ngoo ri khaid thu da" moo" zoo" gi je gyi: da" youg nghoid nyid da» ga: tid. Nghoid loug we' Amnon gi nyang: tid nyid da" dang: ri atam" gyoo: byid:.

¹⁷ Nyang: gi nya: dei zoo: yiri khe: yu wigi «He: myiyi: zoo: ri nga" shidkhoin" mo khaid thu pyam ge'. Nyang: ri she: thu pyam lho: khoem" kyang kyang too" ge'» ga: tid.

¹⁸ Dei zoo: yi we' hau: myiyi: zoo: ri she: thu pyam lho: khoem" kyang kyang too" bye:. Tama gi hau: pyaid mo yhoem: ayoo" shi" da" myiyi: void ja: khoo" kaid to" da" byisheing: ri void ci: da:.

¹⁹ Nyang: gi nya: vhuloem moo myiyab zhoeb gyoin: lho: byi: sheing: lang: ceug- myonhoo: moo lo, voo: nghoeb ci: lho: ngau thu loo" khari" bye:.

²⁰ Nyang: ri nya: mang: Absalom myang lang" «Absalom gi Amnon nang ri shoid vhang: bye: rhe". Nghoid loug we' nga" nhung" we"- jeju" mo hau: khyoo: yo' sen: da" ziri myid athei" myo: nyid. Nyang: gi re" mang: nghoid yoomo hau: khyoo: hang" ri we' atid kyoo" lhe"» ga: tid. Houg: lang" Tama we' nheig koug ziyo' Absalom yhoem: moo nyang: kyeing" nyid nyid.

²¹ Bui" bye: da" moo" zoo" ri khokham David shoug" gyoo: lang" nyang: gi gye" nheig yo: nyid bye:.

²² Absalom koem' gi nya: nhung" ri shoid vhang: bye: yoomo Amnon ri gye" yu" ngheung" pyam lho: nyang: ri khanham we' dang: aji loo: da:.

Absalom da" Latoo: Phug Khyoo:

²³ Thang: eig zain jain" ri Absalom gi Ephrim voo yam mo Bala Hazora joyoo moo nya: yang joem ri yang moug" yham" byid: nyid zi nghoid wigi hau: joyoo khyoo: khokham da" yuggi zoo: yi dangain" lam" re" wa shid re" khe: kaid bye:.

²⁴ Nyang: gi khokham David jhang khyoo: yhe: lho: «Aseing: khokham we" nga" da" yang joem ri yang moug" yham" pui" koid nyid zi nghoid. Hougsu" nghoid yoomo nang yo' re" gyizoug: yi hau: pui" moo re" yo" boo wa la"» ga: myid: bye:.

²⁵ Khokham gi «Age bui" wa myang- nga" zoo: we" ngoonu" dangain" mo, re" nghoid ri nang sung youg: wa zi nghoid» ga: tid. Absalom gi agyoo: atho' tid nyid loug we' khokham gi acang yhi: wigi Absalom ri thu loo" wa shid re" tid abye:.

²⁶ Nghoid loug we' Absalom gi «Hougsu" nghoid lang" ri nga" mang: Amnon ri khyalang" gi ayo" nhang: kaid wa la"» ga: myid: bye:. Khokham phoo gi «Nyang: ci: yoomo yhi: ca" la"» ga: doem myid:.

²⁷ Nghoid loug we' Absalom gi David ri lo" thang moo Amnon yo' gootu: nya: zoo: yiri Absalom yo' dage" yo" yhi: sho' agyoo: atho' tid nyid da:. Absalom gi khokham dayug ri doo" zho" yhang: ti" zoo: shug ri soin' to" wigi

²⁸ Nya: dei zoo: yiri Amnon yhid: gye" yid nyid uri «Ngoo yu" lho: amyeing" byid: kaid lang" nyang: ri said pyam wa zi nghoid. Agyug goo"- ngoo yoovoin yu wa zi nghoid- seing" yang" ge'- voem, voem, akoid goo"» ga: tid kaid bye:.

²⁹ Hougsu" nghoid yoomo Absalom tid ziyo' dakhyoo" ti" nya: da" dei zoo: yi cang re" lho: Amnon ri said pyam bye: ago". Deing shi" da" David nya: zoo: yi dangain" bang: gi loo zei: joem moo zhung: wigi phang: lo" byug boem bye:.

³⁰ Nyangnu" da" yhoem: lo" khyoo: moo danghoid nyid shi" ri Absalom gi «Re" zoo: yi dangain" ri said pyam bye:- nyangnu" dangain" dayug ri we' ateung too" loo:» ga: David ri tid kyo" boem ago".

³¹ Houg: yoomo khokham phoo gi to' yab lho: nheig koug ziyo' nya: byi: ri lang: ceug wigi phyang" gung moo jhang" jo, da:. Nyang: yo' dage" nyid da" dei zoo: yi we' nyangnu" da" byi: ri lang: ceug pyam boem ago".

³² Nghoid loug we' David da" nya: mang: Shama da" nya: zoo: Yonadab gi «Aseing: khokham we' nyangnu" gi re" zoo: yi dangain" ri asaid pyam shi" go" nghoid da:. Amnon koem' gi said pyam zi shoug" bye: yoomo shid: lo" byug bye:. Amnon wigi nya: nhung" Tama ri shoid vhang: da" bidnyid mo wigi hougsu" koid wa ga: myid phyed too" bye: zigi Absalom da" avid ri yu" wigi nang yo" si wa zi nghoid.

³³ Houg: yoomo re" zoo: yi dangain" shid: bye: ga: da" lu dang: ri aloem" nyid. Amnon nyang: dayug kyeing" za: shid: zi shoug" bye: zi nghoid.

³⁴ Hau: ayo, moo Absalom koem' gi phang: lo" byug bye:. Hau: uri nyang: Horana-im boem gung khyo" byu daphung: moo" zeing gyoo" lo nyid ziri gyi zung" da" gyizoo: yigi myang kaid boem bye:. Houg: lang" khokham pho jhang khyoo: nyang: lo" wigi nyang: myang gu: dangain" ziri tid kyoo" bye:.

³⁵ Yonadab gi David ri «Nyangnu" nghoid wa ein: ngoo tid ziyo' dakhyoo" ti" akhid" re" zoo: yi doem lo boem abye: go"» ga: tid kyoo" bye:.

³⁶ Nyang: hougsu" bain tid kyoo" yo' dage" David da" nya: zoo: yi vang lo boem wigi yoid ngau lo boem ago". David yo' nya: gyizoug: yi we' atho' tid loo sho' ngau nyid boem ago".

^37-38 Absalom gi phang: loo" khare" wigi Geshura khokham Amihura da" nya: zoo: Talamai jang" mo soem" zain yhe: nyid byug bye:. David gi nya: zoo: Amnon shid re" ayo, myang" sho' nyang: nheig koug nheig nge zi shoug" nyid da:.

³⁹ Nghoid loug we' Amnon shid: lo" ziri to" myhid loo" lang" nya: zoo: Absalom ri nheig tei" da" myid gi ung: khoug: moo dabyeing" jo, da:.