2 SAMUELA 10 - Lacid Common Language Bible

David gi Amon Byumyu" yi yo' Suri Byumyu" yiri Meing: Zain: Oung: Khyoo:

¹ Akhid" zain void dajhi' myang" lo" thang: ri Amon khokham Nahasha shid: byug wigi nya: zoo: Hanun gi khokham bue" loo bye:.

² Khokham David gi «Hanun nya: phoo Nahasha ngoo ri koid ziyo' dayhang: ti" nyang: riwe' ngoo dangsoo" bo da" bidnoem khyo" wigi koid shug ca" zi nghoid» ga: tid. Hougsu" nghoid yoomo nya: nheig khyeug jheddab myid ri ci: shug wa shid re" lagyoo: yiri David nhang: kaid bye:. Amon mung" khyoo: nyangnu" ju" uri

³ Amon byumyu" vhujhung: yi gi khokham ri «Nang ri nheig khyeug jheddab myid ri ci: shug wa ga: David he: byu yiri nhang: kaid zigi re" phoo ri phau" myang: ziyo' koid zi nghoid ein: nang jho: nyid la". Gyeing" nyang: hougsu" anghoid. Nyangnu" ngoonu" ri meing: zain: oung: sho' ga: he: voogung khyoo: joo" yu" wa shid re" nyang: nyangnu" ri hid: khyoo: nhang: kaid zi nghoid» ga: tid da:.

⁴ Houg: yoomo Hanun gi David da" lagyoo: yiri myheig yu wigi nyangnu" da" nhoid mei: dashoid khyo" ziri yham" pyam wigi nyangnu" da" byimi ri cugnoug" moo ju" sho' yham" pyam byid: lho: nyangnu" ri nhang: kaid bye:.

⁵ Hougsu" yoomo nyangnu" yhoem: khyoo: doem tau" loo wa shid re" gye sho' nyid boem ago". Hau: bue" da" khyoo: dangain" ziri David shoug" gyoo: lang" nyangnu" nhoid mei: adoem yug cang cang gi athu loo looza: Yerikho voogung moo nyid nyid ge' ga: nyang: dang: pyeung: kaid da:.

⁶ Amon byumyu" yigi David ri nyangnu" da" gyivoo khyoo" koid pyam bye: ziri boin: loo lang" Berehoba yo' Zoba voomoo" mo Suri gyizoo: eig moin- Toba voomoo" mo damoin eig khyeing" yo' Mekha khokham yo' dage" gyizoo: dakhyeing" ri nyangnu" vhoo" lhung: yu bye: da:.

⁷ Hau: lu dang: ri David shoug" gyoo: lang" nyangnu" ri meing: yhe: zain: wa shid re" Yoab yo' gyizoo: dangain" bang: ri nhang: kaid bye:.

⁸ Amon gyizoo: yi jen thu re" wigi nyangnu" da" voomoo" nghoid da" Raba voomoo" khyam: khoem" duang: moo joyoo yu wigi gootu: byumyu" yi nghoid da" Suri byumyu" yi yo' Toba yo' Makha byumyu" yigi pa: cang joyoo zheing: yu nyid boem ago".

⁹ Yoab gi gyivoo gyidab yi nyang: ri shid khyo" thang: khyo" meing: zain: wa ga: soin' nyid ziri myang lang" Israela gyizoo: yi mo ge thang da" gyizoo: yiri khyen: yu wigi Suri byumyu" yi shoid khyoo: myonhoo: shu: nhang: lho: joyoo yu too" nhang: bye:.

¹⁰ Deing nyid shi" da" nya: gyidab joem ri nya: nhung" Abishai vhoebkhang" da" joyoo moo to" to" wigi Amon byu yi shoid khyoo: myonhoo: shu: nhang: lho: joyoo yu nhang: too" bye:.

¹¹ Yoab gi nyang: ri «Suri byu yi ngoo ri oung: lo nyid ziri nang myang: lang" ngoo ri re" bo pang" we' Amon byu yi nang ri oung: lo nyid lang" we' ngoo nang ri re" bo pang" wa zi nghoid.

¹² Yoem: kaid wigi thug shang" nyid ge'. Nyha" byumyu" shid re" we' nyha" da" Mangso da" voomoo" shid re" we' nyhang" yoem: kaid lho: zain: boem shang- houg: lang" Aseing vho: khyo" bue" loo wa zi nghoid» ga: tid da:.

¹³ Yoab yo' nya: byu yi xang: shi" khaid zain: wa shid re" to' yhe: lo" ri Suri byu yi phang: byug boem bye:.

¹⁴ Suri byu yi tang" phang: lo" ziri Amon byu yi myang lang" nyangnu" we' Abishai mo phang: loo" khari" wigi voomoo" khyoo: tau" loo" bye:. Hau: thang: Yoab gi Amon byumyu" yiri khaid zain: nyid jang" mo doem tau" wigi Yerusalem khyoo: tau" loo" khari" bye:.

¹⁵ Nyangnu" ri Israela byumyu" yi wigi meing: zain: oung: bye: ziri Suri byumyu" yi se' loo lang" nyangnu" da" gyiphung: dangain" ziri khe: zheing" wigi zoebphung: too" bye: zi nghoid.

¹⁶ Khokham Hadadeza gi Uphrad gyid lang bidthu shoid mo nyid da" Suri byu yiri khe: kaid wigi Zoba khokham Hadadeza da" gyizoo: yiri vhoebkhang" da" gyizoug: Shobag da" amyeing" khyo" Helam voomoo" khyoo: nyangnu" yhe: lo" boem ago".

¹⁷ David hau: lu dang: ri shoug" gyoo: lang" Israela gyiphung: joem ri zheing" yu wigi Yodan gyid lang gu: dab lho: nya: shoid khyoo: shu: wigi joyoo yu to" da" Suri byu yi nyid da" Helam voogung khyoo: to' yhe: loo" bye:. Meing: zain: shid" loo" bye: ziyo'

¹⁸ Suri gyizoo: yiri Israela byu yi wigi yo" khaid zain: tau" kaid boem ago". David yo' nya: byu yi koem gi Suri myang: rheing" koin" mo, nyhed shoo: yo' myang: jui: mo, myid: moin ri said pyam boem bye:. Hau: tho' agoo" gyi ri vhoebkhang" zoug: Shobag ri we' nyangnu" dam tab wigi meing: zain: pa: moo nyang: shid: byug bye: zi nghoid.

¹⁹ Hadadeza da" vhoebkhang" akhoug: moo nyid nyid da" khokham yigi Israela byumyu" wigi nyangnu" ri meing: zain: oung: ziri nyangnu" se' loo lang" nyangnu" yo' yug yoo myenjham" khyoo: koid yu lho: nyangnu" da" akhoug: moo nyid nyid boem ago". Xo' wigi Suri byumyu" yigi Amon byumyu" yiri xo' pang" wa shid re" gyoug nyid da:.