2 SAMUELA 1 - Lacid Common Language Bible

Sholu Shid: Ziri David Shau" Gyo: Khyoo:

¹ Sholu shid: thang: ri David Amaleg byumyu" moo eig nyid" nyid da:.

² Thang: nyid" ri Sholu dab mo yuggi zoo: dayug David jhang ju" lo wigi phau" myang: ziyo' myidjang khyoo: goeb pid bye:. Nyang: gi nheig koug nheig nge ziri ci: shug wa shid re" nya: byi: ri lang: ceig ziyo' nya: vhoo" loem ri myidzhoo" phei" geug gyoin: ci: da:.

³ David gi «Khakhyo" lo lha"» ga: myid: lang" nyang: gi «Israela dab mo phang: thu lo» ga: tid.

⁴ David gi «Ciwim ziri ngoo ri tid kyoo" we'» ga: tid lang" nyang: gi «Nyha" gyizoo: yigi meing: zain: jang: mo zheing: phang: bug bye: ziyo' gye" myoo: sho' ri we' said pyam shau" boem abye:. Sholu yo' nya: zoo: Yonathan: ri we' said pyam bye:» ga: tid.

⁵ David gi nyang: ri «Sholu yo' Yonathan shid: ziri nang khasu" se' lha"» ga: myid:

⁶ Nyang: gi «Ngoo gi Gilbea boem moo nyid nyid uri Sholu gi nya: lham: moo nghe: nyid ziri shau" myang. Gyivoo joem da" myang: rheing" yo' myang: ju: bang: gi nya: jhang khyoo: je tab lo nyid da:.

⁷ Hau: thang: ri nyang: lheing: yu" kaid ri ngoo ri myang yoomo ngoo ri khe: kaid da:. Ngoo gi ‹Shoug" gyoo: bye: aseing:› ein: tu" bye:.

⁸ Nyang: gi ngoo ri hang" nghoid ga: myid: yoomo ngoo gi nyang: ri ngoo gi Amaleg byumyu" nghoid ein: phoug tid bye: zi nghoid.

⁹ Houg: lang" nyang: gi ‹Hid: khyoo: re" wigi ngoo ri re" said pyam we' ngoo gye" gyi: da" dam dab bye: wigi kang: gyoo" loo: wa ti" ga: kyi' bye:› ga: tid.

¹⁰ Hougsu" nghoid yoomo nyang: gi khasu" nghoid nghoid leung loo" yo' dage" kang: gyoo" wa zi ngoo se' yoomo ngoo nya: jhang yhe: wigi nyang: ri said pyam bye:. Hau: thang: nya: vhoo" loem mo bidmug yo' nya: lo, mo lo, theing" joem ri ngoo khyoid yu wigi hau: joem ri re" jhang khyoo: ngoo ci: re" zi nghoid aseing we"» ga: tid.

¹¹ David gi nheig koug ziyo' nya: byi: ri lang: ceig pyam wigi nya: byu yi dangain" hougsu" cang koid boem ago".

¹² Meing: zain: pa: moo gye" myoo: sho' said pyam shoug" bye: da:. Sholu yo' Yonathan: shid re" we' Aseing da" byumyu" nghoid da" Israela byumyu" yi shid re" we' nyangnu" gi nheig koug nheig nge ngoug byid ngoug nab' yo' myen" thang: ju" sho' zoo: noem zeung: nyid boem ago".

¹³ David gi nya: jhang khyoo: lu dang: ci: re" da" yuggi zoo: ri «Nang khamo nghoid lha"» ga: myid: bye:. Nyang: gi «Amaleg byu dayug nghoid- nghoid loug we' re" mungdain: moo nyid su: nghoid» ga: phoug tid.

¹⁴ David gi nyang: ri «Aseing khyen: to" da" khokham ri nang voem" said zigi khasu" lha"» ga: myid:.

¹⁵ Hau: thang: ri David gi nya: byu dayug ri khe: yu wigi «Nyang: ri said pyam we'» ga: tid. Hau: yuggi zoo: gi Amaleg byu ri said pyam da:.

¹⁶ David gi Amaleg byu ri «he: zigi nanyang: ci: loo bye: zi nghoid. Nang gi Aseing khyen: to" da" khokham dayug ri said pyam bye: ein: ziri yen: yu bye: yoomo nanya: gung nanyang: tarha" dang: phyed zi nghoid.»

Sholu yo' Yonathan: Shid re" David da" Ngoug Ji:

¹⁷ David gi he: ngoug ji ri Sholu yo' nya: zoo: Yonathan shid re" ji: byu: bye: zi nghoid ziyo'

¹⁸ Hau: zigi Yuda byumyu" yiri jhau" byid: wa shid re" amyeing" dang: byid: kaid bye:. (he: ziri Yasha da" soug" pug moo lhid" xoem" too" bye: zi nghoid)

¹⁹ Israela boem joem atho' mo ngoonu" da" vhujhung: ri said pyam bye: goo" nhung:. Ngoonu" da" seing" yang" thang da" gyizoo: joem leung bye: goo" nhung:.

²⁰ Hau: ziri Gad voogung yo' Askhelon voogung khyoo: cang afu" yen" goo". Philisti myhi' zeing yi agoug nhang: goo". Yu phara" no' bang: da" myiyi: zooshang: yiri abu: nhang: goo"

²¹ Gilboa boem moo moug: we' avoo nhang: baja" Nghain: we' akhyoo' nhang: baja" hau: boem yam cang shivoo: khanham we' agi baja". Ciwim gari seing" yang" bang: da" goo joem ri aphau" akhyoid she: pyam to" ziyo' Sholu da" goo ri we' xu: agyoid looza: she: pyam too" bye: zi nghoid.

²² Yonathan da" lid: gi kangso' yo" said da:. Sholu da" Shamcoin" gi nheig khyeug shoomyen: zi aboo nghoid da:. Yoem: gyi: bang: ri tu: lheing: pyam wigi gyivoo yiri said pyam ago".

²³ Sholu yo' Yonathan nyid ri we' dage" shid: ri we' dage" nghoid yoomo gye" mau" ziyo' jheddab myid nghoid da:. Zoin bung: tho' myab wigi khangkhyi tho' yoem: je gyi: da:.

²⁴ Israela myiyi: myhi' yi we"- Sholu shid re" ngoug ge' Nyang: gi nanu" ri gyo, suid" void bo da" phoug" dab phe" pain" byimi ri byid: foid bye:. Nanu" ri lug nyoug sheing: zi yo' shoung: byid: bye:.

²⁵ Seing" yang" da" gyizoo: yi leung bye: goo" nhung:- Nyangnu" meing: zain: jang: moo said pyam zi shoug" bye: goo" nhung:. Boem gung cang Yonathan leung shid: bye: nhung:.

²⁶ Nga" nhung" Yonathan we"- re" shid re" ngoo nheig koug nheig nge nyid. Nang ngoo ri khayhi' jheddab nyid lha" Nang ngoo ri jheddab zigi khayhi' mau" phoo" zi nghoid lha". Hau: zigi myiyi: myhi' yi da" jheddab myid tho' re" je gyi: nyid da:.

²⁷ «Seing" yang" da" gyi: zoo: yi leung bye: goo" nhung:. Nyangnu" da" gyizi gyikhoo: joem du" pyam khoo' bye: wigi akyu" aboo bue" byug bye: nhung:» ga: ji: byu: bye:.