2~KORINTHU 9 - Lacid Common Language Bible

¹ Yuda mung" mo Mangso da" byu yi yo" sen: da" bo pang" thoug khyoo" yo' sen: lho" wigi nanu" jhang khyoo: ngoo mougsoug" lhid" kaid anoo" loo.

² Nanu bopang" bothoug nau da" jheddab e" myed bo nyid ziri ngoo se' nyid. Houg: su" nghoid yoomo nanu" da" khyoo: ri Mawkedoni mung" byu yi jang khyoo:- phau: khuang fu" kaid bye. Akhaia mung" mo da" mang: nhung" yi gi anheug mo wigi lang" pang" thoug wa shid re nyheung soin jen" to" nyid bye- ein: wigi Makedoni bang: ri ngoo tid bye. Nanu" myid loem: vho: ngei nyid yoomo nyangnu" myoo: looboug bang: da" nheigloem: ri lhu: nhau" tu: to' byid: kaid nyid.

³ He: khyoo: yo" sen: lho: nanu" da" khyoo: ngoonu" phau: khuang zigi-dang: soem: abue" loo" baja"- he: da" mang: nhung" yi ri nanu" jhang khyoo: nhang" kaid. Houg: yoomo ngoo tid bye: ziyo' dakhyoo" ti"- nanu" bo pang" thoug wa shid re" jen" jen" nyheung: to" goo" wam: bye.

⁴ Hougsu" anghoid lang" gi Makedoni byu dayham" ngoo yo' dage" bo cang re" wigi nanu" ajen" jo, ziri re" shau" myang ri nanu" za: sho' thu' wa zi anghoid- ngoonu" we' nanu" ri gye" myid loem too" bye- khayhi' gyeung: sho' thu' wa zi asi!

⁵ Hougsu" nghoid yoomo nanu" jheddab da" alu jhung shug dang: lang" bo jo, bye: ziyo' dakhyoo" ti" hau: ziri nyheung soin' jen" too" wa shid re" he: mang: nhung" yi ri nga" shid vho" khyoo: nhang: kaid wa ca" nyid ein: ngoo myid nyid. Ngoo ju" re" uri alu joem ri bain soin' nyheing too" gu: nghoid wa shid re" nanu" byid: ca" da alu gi agoin: za: te: koid pyam' zi anghoid loo: za: - byid: nau da" emyid, yo: byid: da: aved, thu' nyid ge'.

⁶ Gug myoug: dajhi' za: te" sain: su: gi dajhi' za: date: shau" yham" yu wa, gug myoug: myoo" sho' sain" kaid su: gi gug myoo" sho' doem shau" yham yu wa ein: ziri myid boin: zid" lhid" yoem: kaid nyid ge'.

⁷ Vhoo" byed' ziyo' anghoid -byid: ca" yoovoin, boo yoomo we' anghoid loo: za: yug khang" moo" gi nyang: nya: emyid moo myid kho' ziyo' dakhyoo" - byid: goo" baja". Khasu" wim gari Mangsoo gi gau yi e" myed, yo' byid: su: ri jheddab nyid.

⁸ Mangsoo: gi nanu" vho" nyid tho' moo jain" sho' yo" byid: nyid.Houg: yoomo nanu" gi nyang: tu: nya: shid re" vho' ca" nyid gu: dangain" ri yo" yu boem va zi nghoid. Hou: tho' moo ge da" moo" zo" ja: khang" mo" shid mo ca" nyid hto' moo jan" sho' yo" yu wa.

⁹ Jhoem: mungdang: moo we"- Nyang: gi ca" yo nyid bang: ri amyung shaoo" loo: gam byid: bye: yoomo nya: da" nheig khyeig shoo" myen: khyoo: gi apyaid atoo: moo dajo, jo, ga: tid to".

¹⁰ Amyoug: sain" su: ri amyoug: byid: wigi zoo: noem shug phoo" bue" loo nhang: nyid da- Mangsoo gi nanu" moo vho: nyid da" amyoug: ashi" myoo" sho' ri we' byid: nyid tho' moo gootu: hau: amyoug: ashi" ri -youg gyi: loo nhang: wigi ashi" myoo: sho' zei: loo nhang: nyid. Houg zigi nanu" jheddab e" nyid mo byid: da" alu jhung: shug: da" gug shi" mei: shi: ri tid nyid zi nghoid.

¹¹ Nanu" da" lo, mo nyangnu" shau: kham yu da- nanu" byid: kaid da" alu jhung: shug joem yoomo Byu myoo" sho' bang: gi Mangso da" jeju" ri coung" nghei byid: boem wa nghoid. Nanu" ayo, loem: khang" moo" - Alu jhung: shug agoin ayu: yo" byid: sho' Aseing: gi nanu' ri khanham we' yo" loo jo, loo nhang: wa zi nghoid.

¹² Khasu" wim gari hid: nanu" koid da" zei: zhoo" zei: jhoug da" moozoo" - Mangso da" byu yi ca" yo nyid jang" mooyo" pyeung byid: tho agoo" Mangso da" jeju" ri boin: so" coung" nghei da" thui: gi byeung" shoin: lo nyid bye.

¹³ Hidsu" nanu" da" doo" zho" da" moozoo" ge da" aved alhoo: yoomo byu yi myoo" sho' gi Khristu da" ngei bu: ngeilho, da" ludang: ri nanu" loem" jeung" lhoem: yu ci: bye: yoomo we' nanu: da" jheddab emyed yo" nyangnu" ri we' gootu: byu yi ri we' agoin ayu: alu: byid: bye: yoomo we' Mangso da" myonhoo: phung" yoeb ri coung" nghei nyid boem wam: bye.

¹⁴ Nanu" gi atho' tid goo ki" lid da" Mangso jeju" ri yo" kham, zo: boem bye: yoomo nyangnu" gi nanu" ri gye" jheddab da" emyid, yo' nanu" shid re" akyu' bo mho' byid: nyid boem wa nghoid.

¹⁵ Aphoug" atho' phyed da" Kangso da: jeju" jhung: shug jhung: lang: joem yoomo nyang: ri coung" nghei nyid boem shang o".