2~KORINTHU 8 - Lacid Common Language Bible

Khristain Alu byid: Khyoo:

¹ Jheddab, da" mang: nhung" yi we"- Makedoni mung" mo phungbyu yi ri Mangsoo gi cenoem jeju" byid: bye: ziri-nanu" ri ngoonu" si' nhang" nau nyid boem.

² Nyangnu" kham zo: lid loo bye: da" shid: gyoin, noogyoin, moo nyangnu" gi gye" kyi" khyeug jham" ca yu" shau" abye: go".Nghoid loug we' nyangnu" da" ngeibu: gau yi nheig loem: gye" gyi: jo, boem yoomo nyangnu" gi gye" asho" ajhen" bang: nghoid loug- nyangnu" byid gam khyoo: moo-laleig laki, aboo: loo: za: jheddab emyid, yo, byid: nyid ago".

³ Hau: phung: bang: gi nyangnu" yo" koid yhi' byid: nyid boem khyoo: ri ngoo nanu" ri sagsi" khyag" kham kyo" nyid.

⁴ Nyangnu" gi Yuda mung" mo Mangso da" byu yi ri pang" thoug khyoo: moo boo nau boem yoomo yo" bo vang wa da" akhang" yoo" wa shid' re" nyangnu" da" myid khyo" ayoo" ri yoo" sho'- mho' boem.

⁵ Nyangnu" gi ngoonu" myid to" tho' moo jain" sho' byid nyid nyangnu" gi xang: shed" moo nyangnu gungdu nyang aveing: moo xoin" to' byid: ago- Hau: thang: ri Aseing: myid vho: ziyo' dakhyoo"- pang" thoug byid: da" khyoo: moo to' byid: ago".

⁶ Hougsu" nghoid yoomo xang: shed" mo yoovoin, yu zei: so' nyid bye- Titu ri he: alu yo' sen: lho: nanu" da" goozu: zen' to' nung" byid: da: moo" bain sho' nanu" ri pang" thoug nyid baja" ngoonu" gi nyang: ri joug jhoin" nyid.

⁷ Nanu" gi loem" jeung" da" klhyoo: moo we dang: ji khyoo: moo we' Phajhi" leleig lasi, moo we'-nanu" da" pang thug nau emyid, moo we' ngoonu" ri jheddab da" khyoo: moo we' nanu" myo tham: joeb byeung" nyid boem bye. Hougsu" nghoid yoo mo-he: da" jheddab nheugloem: yo' doo" zho" da" moozoo" moo we' nanu" amyung ashoo" loo: za: Alu kaid wa ziri we' ngoonu" myid vho: nyid.

⁸ Hidsu" tid zigi amyeung" khyo" tarha" khyo, to" zi anghoid. gootu: byu yi da" pang thoug khyoo: moo jheddab nheig loem: khayhi' gyi: bo ziri"- tid kyo" ziyo' nanu" da" jhed kang: da" nheig loem: e" myed, ri se' yu wa shid re" tid zi nghoid.

⁹ Nanu" gi ngoonu" Aseing Yesu Khristu ri se' nyid boem ago" Aseing Yesu gi nyang: di su: nghoid loug - nanu" da" shid re" nya gungdu: ri sho" jhen: byu bue" loo" nhang: bye. Nyang: asho" ajhen: koid jang" mo nanu" yo" de, lo boem bye.

¹⁰ He: da" alu byid: ziyo' sen: lho: ngoo myid yu" khyo" nghoid rigi lailoo bye: zain nyid moo nanu' zei shed" to" da" moozoo" ri akhid" zei: kyoeb pyam rigi nanu" shid mo gi wa zi nghoid. Nanu" gi jheddab emyid yo' byid: nau da" nheig loem: shid' boo mo, za: we' anghoid Alu xang: sheda" kaid byid: mo, nghoid.

¹¹ Houg: yoomo hau: moo" ri xo' zei: pain, pyam ge". Nanu" gi hau: moozoo" ri myid soin' yhe" lo" jang" moo nheig loem: to' - vho: ngei boem ziyo' dakhyoo" ti" nanu" yo": hain: yhi' moo nheigloem: to' lho: zei: pyam ge".

¹² Nanu" moo byid: gam nau da" emyid, bo vho" ngei nyid boem rigi mangsoo gi nanu" yo" byid: yhi' mo byid: da" alu joem ri lhoem: kham yu wa zi nghoid. Nanu" age bui" ziri Mangsoo: gi mho' wa zi anghoid.

¹³ Khasu" wim gari nanu" ri yoovoin, lid: nhang: lho: gootu: byu yi da" yoovoin ri soem" nhang: wa shid re" ngoo koid nyid zi anghoid.

¹⁴ Nhgoid loug we' akhid" ayo, moo nanu" gi agoin agoo" yo'" yu nyid boem yoomo-ca" yo, nyid bang: ri pang" thoug wa shid re" gi_ young" du nyid zi nghoid. Danyid" bid nyid ri nyangnu" agoin, agoo" yo" lo wigi nanu" moo ca" yo, nyid nghoid rigi nyangnu" we' nanu" ri doem tau" pang" thoug byid: lo boem wa nghoid. Hid: khyo" wigi nyang: cang" dakhyoo" ti" yo" pang" yo" thug go.

¹⁵ Joem: mungdang: moo Myoo" sho' yo" zehung" young: too" su: we' ladu lid sho' jain" yoo" wa zi anghoid. za: te: yo" zheung" yu too" su: we' mala la, atham: wa zi anghoid- ga: wigi tid to" ziyo' dakhyoo: ti" nghoid.

Titu Yo Nya: Luzoem" Cang" Yi.

¹⁶ Nanu" ri pang" thoug byid: wa shid re" ngoonu" moo nheigloem: to' vho: ngei nyid ziyo' dakhyoo" ti"- Titu ri we' boo nhang: da" Mangso jeju" ri khayhi' coung" nghei, joyoo nghoid lha".

¹⁷ Titu gi ngoonu" mho' tid da" dang: ri tam: gyo: ziyo' bo pang" thhug wa nheig loem: we' nyang: moo bo nyid yoomo nanu" jhang khyoo: ri" wa shid re" nya: myid mo nyang - myid phyed bye.

¹⁸ Hau ngeibu: mungdang: kho" kyo" da" mo: voin, wu, da" khyoo: moo Phung byu yi dangan" bang: da" shid moo myid loem to" da" mang: nhung" phoo dayug ri we' ngoonu" nyang: yo' dage" nhang: kaid.

¹⁹ Hau: tho' moo gootu: hidsu" jheddab da" myid yo' pang" thoug da" alu: ngei khyu: da" moozoo" moo we' ngoonu" yo' dage" so" yen" wa shid re" phung byu yi lo, tu: khyen: nyheung too" shau" su: dayug we' nyang: nghoid nyid. Hau: khyoo: gi Aseing: da" myonhoo: phung" yoeb ri thoin" pang" byid: wa shid re" yo' ngoonu" da" bo pang bo thug nau da" emyid, ri we' toin" shed wa shid re" nghoid nyid.

²⁰ Hidsu" gau yi ngei pyo: ziyo' byid: da" alu ri ci: yhoung" lo" khyoo: moo hang" we' nyhang" ri yooboo foin: jang" ajo, baja"- zid" lhid' nyid ge'.

²¹ Hau: Aseing: da" shid khoin" moo za: anghoid- byu da" shid' moo we' deungmain" du young" khyo" moo" zei: wa shid re" gi ngoonu" da" myid young nyheung soin to" a" khyoo: nyang: nghoid bye.

²² Hougsu" nghoid yoomo ngoonu" gi hau: da" mang: nhung" eig yug yo' dage" gootu mang nhung" Khristan dayug ri we' bo nhang: kaid. Hau: yug ri ngoonu" myo" sho' lheung: jham" ca: yu" ri nyang: gi khanham we' gau yi ziyo' bo" pang" thoug nyid su: nghoid ziri yo" myang yu boem bye. Akhid" nyang: gi nanu" tho' moo gye" myid loem" da" emyid, bo nyid yoomo-bo pang" thoug wa da" vho" ngei e" myed zhu" nyid ziri myang.

²³ Titu yo' sen: lho: tid shang ein: rigi nyang: gi nga" da" bo pang thug su: nghoid wigi nanu" ri pang" thoug wa shid re" ngoo yo' dage moo" shoin" zei: su: nghoid nyid. Nyang: yo" dage" bo cang" re" da" gootu: mang: nhung" eig yug gi phung: yi da" lagyoo: yi nghoid wigi-Khristu da" myonhoo: phgung yoeb ri thoin" pang su: eig yug we' nghoid.

²⁴ Houg: yoomo nanu" yo' sen: wigi-ngoonu" myonhoo: sho: phau: khuang khyoo: g ideung khyoo: ri phung byu yi khyag si goo" baja" nyangnu" ri nanu" da" jheddab nheigloem: toin" shid' ge'.