2 KHOKHAM 9 - Lacid Common Language Bible

Yehu ri Israela Khokham Khyoo" Main kaid Xu: Joid Byid: Khyoo:

¹ Hau: ayo, moo Lapi: Elisha gi Lapi: zooyam phoo dayug ri khe: yu lho: «Gilead mo Ramod khyoo: yhi: wa soin' we'. He: zhainloin: xu: yu voin we'.

² Nang houg khyoo: ju" yhi: lang" Yehoshaphad da" nya: yuggi zoo:- Nimshi da" nya: myid: Yehu ri yhe: shoo: we'. Nya: byencang" yi mo shu" yu lho: khoug: lhung yab khyoo: shu" loo we'.

³ Nya: vhuloem moo he: zhainloin: xu: foid gyoin: byid: we'. Houg: lho: ‹Nang Israela khokham bui" wa shid re" nyang: xu: joid byid: bye:› ga: Aseing tid da: ein: tid we'. Hau: thang: ge bue" yhi' myab lho: houg mo doem tau" loo we'» ga: tid da:.

⁴ Houg: yoomo Lapi: zooyam zoo: gi Ramod khyoo: yhe: lo" da:.

⁵ Houg moo gyizoug: yi zoebphung: nyid boem ziri yhe: myang. Nyang: gi «Zoug: ludaid phoo we"- ngoo gi re" shid re" mungdang: yo"» ga: tid. Yehu gi «Ngoonu" mo kha: yug ri nang dang: ji nau la"» ga: myid: da:. Nyang: gi «Zoug: ludaid phoo nang ri nghoid» ga: phug tid.

⁶ Hau: thang: nya: eig yug yhoem: khoug: khyoo: vang lo" wigi Lapi: zooyam zoo: gi Yehu da" vhuloem moo xu: foid gyoin: byid: wigi nyang: ri «Israela Aseing Mangsoo gi ‹Nga" byumyu" Israela khokham koid wa ngoo nang ri mainkaid xu: joid byid: da:.

⁷ Nga" Lapi: yi yo' gootu: nga" dei zoo: ri said da" shid re" Yezebela ri ngoo yooboo dam yo" byid: wa shid re" hau: Ahab da" nya: yuggi zoo: re" aseing: khokham phoo ri nang said ca" wa.

⁸ Ahab da" ikoin deungkhu: byu yi yo' amyed ashen yi dangain" shid: ca" wa zi nghoid. Ngoo gi nya: ikoin deungkhu: mo yuggi nge zoo: gyi: zoo: yugkhang" moo" ri yu pyam wa zi nghoid.

⁹ Ngoo gi Israela khokham Yeroboam yo' Israela khokham Basha ikoin deungkhu: bang: ri koid ziyo' dakhyoo" ti" nya: ikoin deungkhu: byu yiri koid wa.

¹⁰ Yezebela gi myhoeb shoung: zi ashau" wa. Nya: manggung ri Yezrela mougmyid mo lakhuid" joem wigi zo: pyam goo"› wa ga: tid da›» ga: tid. He: dang: bain tid thang: ri Lapi: zooyam zoo: gi hau: yab mo thu lo lho: tang" phang: loo" bye:.

¹¹ Yehu gi nya: gyizoug: byencang" yi jhang tau" lo" wigi «Ci: aca" rhe"- hau: foin" su: nang: ri ciga: lha"» ga: lhoem: myid: ago". Yehu gi «Nyang: civho: ziri nanu" se' ago"» ga: phug tid da:.

¹² Nyangnu" gi «Ngoonu" asi'- nyang: citid ziri ngoonu" ri tid kyoo" we'» ga: tid da:. «‹Ngoo nang ri Israela khokham koid wa khyo" mainkaid xu: joid byid: wa ga: Aseing tid da› ga: nyang: ngoo ri tid da» ga: tu" da:.

¹³ Dalheing: dam Yehu da" gyizoug: byencang" yigi nyangnu" byisheing: joem ri zoem" lhang: phyoo" moo: Yehu da" khyid: yang: moo khyoid myu" lho: laboo" moid wigi «Yehu gi khokham nghoid» ga: nyho: ago".

Israela khokham Yoram Said Pyam Shau" Khyoo:

^14-15 Hau: thang: Yehu gi Yezrela moo nyid da" Israela khokham Yoram ri coem' thougtheung da:. Hau: khokham gi Suri khokham Hazaela ri gyi yhe: zain: lho: Ramod meing: zain: jang: moo dab da" dam ri ze: wa lo" byug da:. Hougsu" yoomo Yehu gi nya: gyizoug: byencang" yiri «Nanu" ngoo yo' dage" nghoid rigi dayug we' Ramod mo thu lo" lho: Yezrela voobyu yiri ayhe: tid poin" goo" wa shid re" zid" ge'» ga: tid da:.

¹⁶ Hau: thang: nyang: gi nya: gyi myang: rheing" khoug: moo do, zhung: lho: Yezrela khyoo: yhe: lo" da:. Yoram gi dam agi shi" nghoid da:. Yuda khokham Ahazia we' houg moo nya: jhang yhe: lam" nyid da:.

¹⁷ Yezrela mo gyi pyuzung moo zung" eung: da" zung" su: gi Yehu yo' nya: byu yi tab re" nyid ziri myang da:. Nyang: gi «Gyizoo: da phung: re" nyid ago"» ga: nyho: tid da:. Yoram gi «Houg bang: gi bidnoem yi nghoid go" la- gyivoo yi nghoid go" la- myang: zhung: su: ri yhe: yu" nhang: we'» ga: phug tid da:.

¹⁸ Lagyoo phoo gi Yehu jhang myang: jui: yhe: lho: nyang: ri «Nang bidnoem khyo" re" la' ga: ziri khokham phoo si' nau da» ga: yhe: tid da:. Yehu gi «Hau: zi re" moo" anghoid nga" thang: cang we'» ga: lhoem: tid da:. Gyi pyuzung moo zung" yuggi hau: lagyoo: phoo gi byu phung: khyoo: ju" yhi: bye:- nghoid loug we' atau" loo nghoid da: ga: lu dang: tid kyo" da:.

¹⁹ Gootu: lagyoo: dayug ri doem nhang: kaid ago". Hau: yug we' Yehu ri dang: myid: daja: khyo" za: yhe: myid: da:. Yehu gi «Hau: zigi re" moo" anghoid- nga" thang: cang we'» ga: lhoem: doem tid da:.

²⁰ Lagyoo: phoo gi hau: byu phung: yi khyoo: ju" yhe: abye:- nghoid loug we' adoem tau" loo nghoid da ga: zung" su: gi lu dang: doem tid kyo" da:. Houg: lho: nyang: gi «Hau: byu phung: da" vhujhung: gi Yehu yo' du: wigi nya: gyi myang: rheing" we' adu: adam: koin" re" nyid da» ga: xo' tid.

²¹ Khokham Yoram gi «Nga" gyi myang: rheing" soin' ge'» ga: amyeing" byid: bye:. Bain soin' lang" nyang: yo' khokham Ahazia gi Yehu ri yhe: shoug" wa shid re" nya: gyi myang: rheing" moo zhung: yhe: lo" ago". Nya: eig yug gi nyang: ri Nabod seing: kho' da" dain" yoo moo yhe: shoug" ago".

²² Yoram gi nyang: ri «Nang ngei pyo: yug yo khyo" re" rhe"» ga: myid: da:. Yehu gi «Ngoonu" gi join: zei: ziyo' re" myhi' Yezebela yo' koid shid" to" da" yu phara" soolhoo: joem dajo, shi" uri khasu" yo" ngei pyoo: yug yoo wa lha"» ga: tu" da:.

²³ Yoram gi «Ahazia we" gyivoo» ga: nyho: tid lho: nya: gyi myang: rheing" ri she: tau" yu wigi phang: ago".

²⁴ Yehu gi nya: lid: ri she: yu wigi nya: yoem: bo thang lang: lho: myoo: dakhaid beig kaid zigi Yoram da" nung" khung: moo lo" zang" lho: nya: nheigloem: ri kyang lo" da:. Yoram gi nya: gyi myang: rheing" mo shid: leung gyoo" loo" khari" da:.

²⁵ Yehu gi nya: gyizoug: phoo Bidka ri «Nya: manggung ri koid: yu lho: Nabod seing: kho' da" dain" yoo moo yhe: she: pyam too" we'. Nang yo' ngoo khokham Yoram da" nya: phoo Ahab thang: moo myang: jui: nyid uri Aseing gi Ahab ri thougtheung lho:

²⁶ ‹Ngoo gi Nabod yo' nya: yuggi zoo: yiri said ziri anyid" nab myang bye:. Ngoo gi nang ri he: yoomo nyang: yooboo dam byid: wa› ga: tid ziri myid boin: we'.» Yehu gi nya: gyizoug: phoo ri «Yoram da" manggung ri koid: yu lho: Aseing da" dangsoo" joeb byeung" ri" wa shid re" Nabod seing: da" yoo moo: yhe: she: pyam too" we'» ga: amyeing" byid: da:.

Yuda Khokham Ahazia Said Pyam Shau" Khyoo:

²⁷ Khokham Ahazia gi bue" da" khyoo: ri myang wigi nya: gyi myang: rheing" moo zhung: lho: Bed Hagan voomoo" khyoo: phang: lo" da:. Yehu gi cang khaid da:. Yehu gi nya: byu yiri «Nyang: ri we' said pyam ge'» ga: amyeing" byid: bye:. Nyangnu" gi nya: gyi myang: rheing" dang moo Gura khyoo: do, lo" da" khyoo:- Ibleam voomoo" nam moo nyang: ri dam dab ago". Nghoid loug we' nyang: gi Megido voomoo" khyoo: ju" sho' xo' yhe: lo" lho: houg moo lo" shid: da:.

²⁸ Nya: gyizoug: yigi nya: manggung ri gyi myang: rheing" dang moo koid: ke" lho: Yerusalem khyoo: tho' lo" wigi David voomoo" mo khokham loeb boug moo nyang: ri myhoeb pyam ago".

²⁹ Ahab da" nya: yuggi zoo: Yoram Israela khokham koid zi daxe: dazain moo Ahazia gi Yuda khokham bue" lo da:.

Khokham Myhi' Yezebela Said Pyam Shau" Khyoo:

³⁰ Yehu gi Yezrela khyoo: ju" lo da:. Yezebela gi bue" da" khyoo: ri shoug" gyoo: too" gu nghoid da:. Myo, mei: xoug" pyam- xam: kyo' pyam wigi khokham kho" bangzoo: khoem" moo yab jo, lho: khyoo: zeing khyoo: yu" kaid da:.

³¹ Yehu khoem" moo" duang: khyoo: vang lo nyid uri Yezebela gi «Nang Zimri we"- Byu gau" said yug we"- nang hid: khyoo: cikoid re" lha"» ga: nyho: da:.

³² Yehu nghang yu" kaid lho: «Nga" thang: hang" dab go" lha"» ga: nyho: kaid. Khokham kho" mo gyizoug: eig soem" yug gi bangzoo: khoem" mo nyang: ri yu" kaid ago".

³³ Yehu gi nyangnu" ri «Nyang: ri du" khyo' kaid ge'» ga: tid kaid da:. Nyangnu" gi nyang: ri doin: phyed khyo' kaid lho: nya: suid" joem gi pyiyam moo yo' myang: joem ri zain gyoin: lo" da:. Yehu gi nya: gyi myang: rheing" ri nya: gung tho' khyo" koin" pyeig lid: lo" da:.

³⁴ Khokham kho" khyoo: vang lo" lho: voem: zo: da:. Hau: thang: ri za: «Hau: mi: shid: myhi' ri yhe: myhoeb pyam ge'. Cinghoid nghoid nyang: gi khokham myiyi: zoo: nghoid» ga: tid da:.

³⁵ Nghoid loug we' yhe: myhoeb wa yuggi yigi vhu" khang"- lo, shooyoug: yo' khyid: shooyoug: mo lid lho: ci: we' ayhe: myang nghoid ago".

³⁶ Nyangnu" gi he: khyoo: ri Yehu ri lo" tid khyoo" lang" nyang: gi «He: zigi nya: dei zoo: Elia nhoid khyo" tid uri bui" wa ga: Aseing tid da" dang: nghoid da:. Hau: zigi ‹Yezrela mougmyid moo lakhuid" joem gi Yezebela da" manggung ri zo: boem wa.

³⁷ Hang" we' nyang: ri ase' yu" xoem" wa shid re" nya: mang gi houg moo khyid" boem ti" byo sain" jo, ri" wa ga: zi nghoid» ga: tid da:.