2 KHOKHAM 5 - Lacid Common Language Bible

Naman ri Noo Byang" Khyoo:

¹ Suri gyizoug: Naman gi Suri khokham wigi gye" phau" myang: lho: ngi: shab byid: zi shau" da:. Ciwim gari Aseing gi Naman khyo" wigi Suri gyidab ri oung: doid zi byid: yoomo nghoid da:. Nyang: gi gye" jhang: da" gyizoo: dayug nghoid da:. Nghoid loug we' nyang: gi manggam dab su: nghoid da:.

² Nyangnu" Israela byu yi yo' gyi dalheing: khaid zain: uri Suri byu yigi Israela myiyi: nu" dayug ri shu" lo" byug ago". Hau: yug gi Naman da" yhoem: seing: myhi' da" join, bue" lo da:.

³ Danyid" ri nyang: gi nya: join, seing: myhi' ri «Ngoo gi nga" yhoem: seing: ri Samari moo nyid da" Lapi: pho jhang yhi: nhang: nau da:. Lapi: gi nya: dam ri yo" byang" gi byid: wa» ga: tid da:.

⁴ Naman he: ziri shoug" gyoo: lang" nyang: gi khokham phoo jhang yhe: lho: myiyi: nu" tid da" khyoo: ri yhe: tid kyo" da:.

⁵ Khokham phoo gi «Israela khokham pho jhang khyoo: he: pyeing: dang: mougsoug" ci: lho: yhi: we'» ga: tid da:. Houg: yoomo Naman gi ngei soem" moin- sheing: khi khyug khyeing"- byimi thid daxi: zuang voin wigi to' yhe: lo" da:.

⁶ Nyang: voin da" pyeing: dang: mougsoug" gi «He: pyeing: dang: mougsoug" gi nga" gyizoug: phoo Naman ri being" si byid: loo wa. Nya: noo dam ri nang byang" byid: wa ziri ngoo vho: da:» ga: zi nghoid da:.

⁷ Israela khokham hau: mougsoug" ri bain nghab lang" nyang: gi gyoug dain ziyo' nya: byimi ri lang: ceig pyam lho: «Khasu" yoomo Suri khokham gi byu he: yug ri ngoo wigi yo" byang" gi byid: wa myid loem lug la". Nyang: gi ngoo ri kangso' dei ziyo' shid: nhang: da" yoem: so' yo" da" Mangsoo ga: ngoo ri jho: nyid la'. He: zigi ngoo ri mobyo, sho: nyid zi bang bang nyang: nghoid da» ga: tid da:.

⁸ Bue" da" khyoo: ri Lapi: phoo shoug" gyoo: lang" khokham phoo ri «Nang ciwim yoomo houg yhi' nheigloem: thang myid nhung nyid la". Byu hau: yug ri nga" jhang nhang: kaid we'. Israela mung" moo Lapi: dayug nyid da" khyoo: ri ngoo nyang: ri ci: shug wa» ga: dang: pyeung: kaid da:.

⁹ Houg: yoomo Naman gi nya: myang: joem nya: gyi myang: rheing" yo' dage" yhe: lo" wigi Elisha da" yhoem: pain' moo yhe: theing: da:.

¹⁰ Elisha gi dei zoo: dayug ri nhang: kaid wigi tid nhang: zigi Yodan gyid lang moo nyhed lheing: nya: gung ri yhe: cid" lang" nya: noo dam bain sho' ge loo" wa khyoo: ri Naman ri tid kyoo" nhang: kaid da:.

¹¹ Nghoid loug we' Naman gi nheig yo: wigi «Neing: thang nyang: gi nga" jhang thu re" lho: nya: Aseing Mangsoo ri akyu" mho' wigi nya: lo, yo' dam khoo: moo soeb byid: lho: byang" byid: wa ein: ngoo myid jho: da:.

¹² Hau: tho' ago" Damasku nungthang mo Abana gyid lang yo' Pharpa gyid lang gi Israela mung" mo gyid lang tho' aje gi rhe". Ngoo gi hau: eig lang moo cid" lho: ge loo wa bye:» ga: tid lho: thu lo" da:.

¹³ Nya: dei zoo: yigi nya: jhang do, yhe: wigi «Zoug: phoo we"- Lapi: phoo gi yau: da" ja: daja: ja: koid wa nang ri koid nhang: nghoid rigi nang koid ca" wa. Nyang: tid da" ziyo' dayhang: ti" akhid" ciwim nanya: gung ri cid" lho: ayo" byang" yu la"» ga: tid ago".

¹⁴ Houg: yoomo Naman gi Yodan gyid lang khyoo: gyoo" yhe: lho: Elisha tid ziyo' dakhyo" nya: gung ri nyhed lheing: yhe: joem da:. Houg: lang" nyang: gi bain sho' ge lo" byug da:. Nya: shoo" gi teing re" wigi zooshang: dayug yhang: ti" yang" zain: re" da:.

¹⁵ Nyang: gi nya: byu yi yo' dage" Elisha jhang tau" lo" wigi «Israela da" Mangsoo mo lid yu phara" gootu: anyid ziri akhid" ngoo si' bye:. Houg: yoomo jeju" khyo" nga" jhungshug ri lhoem: yu byid: la,» ga: tid da:.

¹⁶ Elisha gi «Ngoo dei byid: nyid da" Kangso' Aseing jhang ngoo jhungshug alhoem: yu wa ein: jham' tang: to"» ga: tid da:. Naman gi hau: ziri nyang: lhoem: yu wa shid re" tid jhoin" da:.- nghoid loug we' Elisha alhoem: yu nghoid da:.

¹⁷ Houg: yoomo Naman gi «Nang nga" jhungshug ri alhoem: yu nghoid rigi loo kung" eig du: mo yhoem: khyoo: myid zhoo" geig voin loo" wa shid re" ngoo ri akhang" byid: la. Ciwim gari ngoo gi akhid" nyid" mo Aseing mo lid ce: ja: yu phara" ri we' xoin" yo' nghe' ngei" da" xoin" angei" byid: loo: wa.

¹⁸ Houg: yoomo Suri yu phara" Rimon no' da" yhoem: moo nga" khokham phoo yo' dage" nyid lho: nyang: ri noku nyid uri Aseing ngoo ri yooboo khyoid byid: ri" wa ein: ngoo myid byu da:. Gyeing" nyang: Aseing gi ngoo ri yooboo khyoid byid: ri" wa» ga: tid da:.

¹⁹ Elisha gi «Ngei pyoo: yug yoo za: loo" we'» ga: tid. Houg: lho: Naman to' lo" da:. Nyang: vi: sho' aloo" shi" ri

²⁰ Elisha da" dei zoo: Gehazi gi nya: oung: khoug: moo «Nga" yhoem: seing: gi Naman ri ce: aphoug" ayu loo: nhang: kaid abye:. Nyang: gi hau: Suri byu wigi byid: da" jhungshug ri khab yu eung: da:. Kangso' Aseing da" myeing khyo" ngoo gi nya: thang: cang khaid yhe: lho: nyang: mo daja: ja: yhe: yu wa» ga: tid da:.

²¹ Houg: yoomo nyang: gi Naman da" thang: khyoo: cang khaid yhe: da:. Naman gi nya: thang: khyoo: byu dayug cang khaid re" nyid ziri myang lang" hau: yug ri shoug" wa shid re" nya: gyi myang: rheing" mo gyo" da:. Houg: lho: «Cica" bye: la"» ga: myid: da:.

²² Gehazi gi «Ci: aca". Nghoid loug we' Ephrim boem moug: moo nyid boem da" Lapi: phung: mo Lapi: eig yug akhid" za: ju" re" ago". Houg: lho: nyang: gi nang ri ngei pyi" soem: khyeing" yo' byimi gi eig zuang nya: eig yug ri byid: nhang: nau da: ga: ngoo ri tid nhang: kaid da» ga: yhe: tid da:.

²³ Naman gi «Jeju" khyo" khyug khyeing" yu we'» ga: phug tid da:. Naman gi agyoo: atho' jhoin" byid: lho: ngei thung: eig thung: ri tei" tab wigi nya: dei zoo: eig yug ri byimi thid eig zuang byid: lho: Gehazi da" shid vhu" khyoo: nhang: kaid da:.

²⁴ Nyangnu" gi Elisha nyid da" bau gung khyoo: ju" yhi: lang" Gehazi gi hau: thung: eig thung: yhoem: khoug: khyoo: vu, vang lo" da:. Hau: thang: nyang: gi Naman da" dei zoo: eig yug ri doem nhang: kaid da:.

²⁵ Nyang: yhoem: khoug: khyoo: tau" vang lo" ri Elisha gi nyang: ri «Nang khakhyo" lo lha"» ga: myid:. Nyang: gi «Yhoem: seing: we" khakhyo" aloo» ga: tid da:.

²⁶ Nghoid loug we' Elisha gi «Nang yo' shoug" go" wa byu hau: yug gi nya: gyi myang: rheing" mo gyo" da" uri ngoo gi Venyi: khyo" houg moo anyid zi nghoid rhe". He: ayo, gi ngei- byimi joem zhainloin: khyam joem zabyid khyam: joem yang- nu: kyung joem dei zoo: yi khab yu wa da" ayo, anghoid.

²⁷ Akhid" Naman da" dam gi re" gung moo bue" loo wa. Nang yo' re" amyed shen" yi moo hau: zi apyaid atoo: bue" ri" wa» ga: tid da:. Gehazi to' thu loo" yo' nyang: gi manggam dab re" lho: nya: shooyid gi gyu: yhang: ti" phyu: lo" byug da:.