2 KHOKHAM 23 - Lacid Common Language Bible

Yoshia gi Tungbau Phara" No' Khyoo: ri Yu Pyam Khyoo:

¹ Khokham Yoshia gi Yuda mung" yo' Yerusalem mo vhujhung: yi dangain" ri khe: zheing" yu lho:

² Nyangnu" dangain" bang: gi khainjung yi lapi: yi deing da" byumyu" yi dangain"- yoo" zoo: yoo" shug bang:- sho" jhen: bang: dangain" yo' dage" Noku Yhoem: Moo" khyoo: yhe: ago". Khokham phoo gi nyangnu" dangain" bang: shidkhoin" moo Noku Yhoem: Moo" mo shoug" sho: myang da" dang: theing mougsoug" pug goin" ri thui: zeing yo' nghab kyo" da:.

³ Nyang: gi khokham kho" yhoem: zeing bung: nam moo yab jo, lho: nyang: ri tid dang: gyoo: wa nya: tarha" yo' amyeing" dang: joem ri nya: oung: khoug: nheigloem: dangain" yo' cang nyid wigi mougsoug" pug moo lhid" to" ziyo' dakhyoo" ti" hau: dang: theing mo cang nhang: to" ziri khyid: ju" lo, yug zei: pyeing cang koid wa shid re" Aseing yo' dang: theing koid da:. Houg: lho: byumyu" yi dangain" we' hau: dang: theing ri cang wa dangsoo" to" ago".

⁴ Hau: thang: Yoshia gi khainjung moo" Hilkia- nyang: ri pang" da" khainjung yi Noku Yhoem: Moo" khoem" duang: moo moo" eung: da" goem loem bang: ri Bala yu phara" myhi' Ashera yo' kyi: joem ri no' jang" moo ci: da" zi joem ri Noku Yhoem: Moo" khoug: mo yu thu loo" goo" wa shid re" amyeing" byid: da:. Khokham phoo gi hau: zi joem dangain" ri voomoo" tunggung shoid Kidron janggyoin: nam moo nghe' pyam da:. Hau: thang: myimoeb ri Bethela khyoo: yu lo" da:.

⁵ Nyang: gi Yuda voomoo" joem yo' Yerusalem voogung nam mo joyoo joem moo tungbau yu phara" phoin: joem adang mo xoin" ngei" byid: wa shid re" Yuda khokham yi byid: da" aya: kham: yu to" da" khainjung yi aya: ri yoeb pyam da:. Hau: khainjung yi dangain" gi Bala- bid- lhammoo"- khyoin- kyi: joem ri xoin" ngei" byid: ago".

⁶ Nyang: gi yu phara" myhi' Ashera da" soolhoo: ri Noku Yhoem: Moo" mo yu pyam lho: voomoo" mo zi Kidron janggyoin: khyoo: yu thu lo" wigi nghe' pyam da:. Hau: myimoeb ri myimoeb phei" bui" sho' thung" phei" wigi hau: ziri shava loeb boug moo geig sain" pyam da:.

⁷ Nyang: gi Noku Yhoem: Moo" mo shava myhi' yi seing: nyid da" byu nyid joyoo joem ri phyo' pyam da:. (Houg moo Ashera ri no' jang" moo void da" byisheing: joem ri myiyi: yi yo, ago")

⁸ Nyang: gi Yuda voomoo" joem moo nyid boem da" khainjung yiri Yerusalem khyoo: shu" yu lho: mung" goin" moo jang: sho' nyangnu" xoin" ngei" byid: da" joyoo phoin: joem ri aco' ajhoid koid pyam da:. Nyang: gi voomoo" mo gyizoug: phoo Yoshu wigi koid to" da" khoem" nam mo coidbaid yu joem ri shugbyid: da" phoin: joem ri we' phyo' sain" khyo' pyam da:. Hau: zigi voomoo" khoug: khyoo: vang yhe: da" khoem" moo" zeing da" lo, kung" shoid moo jo, da:.

⁹ Hau: khainjung yigi Noku Yhoem: Moo" moo dei byid: wa akhang" ayoo". Nghoid loug we' nyangnu" da" khainjung mang: nhung" yiri byid: da" doocid" akaid da" zooyho' rigi nyangnu" ge zo: ago".

¹⁰ Khokham phoo Yoshia gi hang" we' nyangnu" nya: yuggi zoo: myiyi: zoo: yiri nghe' ngei" da" xoin" khyoo" Moleg yu phara" ri ayo" ngei" byid: goo" wa shid re" Hinnom janggyoin: mo tungbau yu phara" ri no' da" joyoo Tophed ri we' aco' ajhoid koid pyam da:.

¹¹ Nyang: gi Yuda khokham yi wigi bid ri no' wa shug byid: to" da" myang: joem ri we' yu pyam da:. Houg: lho: hau: jang" moo ci: da" myang: rheing" joem ri we' nghe' pyam da:. (Hid joem ri noku vang khoug: khoem" moo" duang: nam moo to" to" wigi hau: zigi gyizoug: moo" Nathan Meleg da" nyid joyoo mo atung" vi nghoid da:.)

¹² Yuda khokham yi wigi khokham Ahaza da" yhoemkhung: dang khokham kho" da" khung: dang moo koid to" da" phoin: ri Noku Yhoem: Moo" da" vang" eig loem: moo khokham Manashe wigi koid to" da" phoin: joem yo' dage" khokham Yoshia phyo' khyo' pyam da:. Nyang: gi phoin: joem ri ajab amhoin' koid pyam wigi hau: joem ri Kidron janggyoin: khoug: khyoo: du" zei pyam da:.

¹³ Yoshia gi Yerusalem bidthu shoid Zhainloin: boem joem da" mougpyi: shoid moo yu" co' yu" ngheing" tung" da" yu phara" joem ri aco' ajhoid koid pyam da:. Hau: yu phara" joem gi Sidon yu phara" myhi' Astarte- Moba yu phara" Khemosha- Amon yu phara" Moleg ga: da" yu phara" joem nghoid da:.

¹⁴ Khokham Yoshia gi lug zeingboung: joem ri baid khyau" pyam- yu phara" myhi' Ashera da" soolhoo: joem ri phyed khyo' pyam lho: hau: joem yab jo, da" joyoo moo byu shooyoug: joem yo' boem" pyam da:.

¹⁵ Yoshia gi Israela byu yiri yooboo shu' shoid da" su: nghoid da" khokham Yeroboam ga: da" Nebad nya: zoo: koid to" kho' da" Bethela mo noku ku" joyoo ri we' phyo' khyo' pyam da:. Yoshia gi phoin: joem ri lang: lheing: khyo' pyam lho: houg lugzeing joem ri ajab jab baid kho' pyam wigi hau: joem ri pheilhoug: bui" sho' thung" mhoin' pyam da:. Nyang: gi yu phara" Ashera da" soolhoo: ri we' nghe' pyam da:.

¹⁶ Hau: thang: Yoshia gi ayam aqei: khyoo: yu" lho: bouggung moo loeb dayham" jo, ziri myang da:. Nyang: gi hau: loeb joem akhoug: mo shooyoug: joem ri du: yu nhang: lho: phoin: dang moo nghe' pyam da:. Hougsu" koid lho: nyang: gi phoin: ri aco' ajhoid koid pyam da:. Hau: zigi shid phyang" pui" koid ayo, moo khokham Yeroboam phoin: nam moo yab jo, uri lapi: phoo pe: to" ziri koid zi nghoid da:. Khokham Yoshia gi ayam aqei: yu" wigi he: lapi: dang: ri pe: to" kho' da" su: lapi: pho da" loeb ri myang da:.

¹⁷ Nyang: gi «Hau: zi hang" loeb nghoid» ga: myid: da:. Bethela mo byumyu" yigi «Hau: zigi Yuda mung" mo ju" re" da" lapi: pho da" loeb nghoid wigi he: phoin: ri nang hid su" koid wa shid re" lapi: pe: too" kho' su: nghoid da» ga: tu" ago".

¹⁸ Yoshia gi «Hougsu" nyang: to" too" ge'. Nya: shooyoug: joem ri age shu" pyam» ga: amyeing" byid: da:. Houg: yoomo nya: da" shooyoug: joem ri yo' Samari mo ju" re" boem da" lapi: da" shooyoug: joem ri we' ayu pyam nghoid ago".

¹⁹ Khokham Yoshia gi Israela voomoo" khang" moo" mo Aseing da" nheig yo: zi lhu: zhu: nhang: da" Israela khokham yi wigi koid to" da" tungbau yu phara" ri no' da" joyoo joem dangain" ri phyo' khyo' pyam da:. Nyang: gi Bethela moo koid yhang: ti" hau: phoin: joem dangain" ri koid da:.

²⁰ Nyang: gi tungbau yu phara" joem da" khainjung yi dangain" ri nyangnu" dei byid: da" phoin: joem adang moo said pyam da:. Houg: lho: nyang: gi phoin: khang" moo" moo byu shooyoug: nghe' pyam da:. Hau: thang: nyang: gi Yerusalem khyoo: doem tau" lo" da:.

Yoshia Lhid: Kaid Pui" Koid Khyoo:

²¹ Khokham Yoshia gi dang: theing soug" pug moo lhid" to" ziyo' dakhyo"- nyangnu" Aseing Mangsoo ri ngi: shab byid: da" lhid: kaid pui" ri koid boem wa shid re" byumyu" yiri amyeing" byid: da:.

²² Byumyu" yiri tarha" agyi yi wigi vhoeb da" ayo, mo zi Israela yo' Yuda khokham yi kha: yug wigi we' he: lhid: kaid pui" yhang: te" ziri hang" khanham we' ashu" koid yu" nghoid da:.

²³ Akhid" lo" thang moo Yoshia vhoeb zi daxe: shed zain moo lhid: kaid pui" ri Yerusalem moo koid ago".

Yoshia wigi Thid Pyam da" Gootu: Moo" Joem:

²⁴ Khokham Yoshia gi Noku Yhoem: Moo" mo khainjung moo" Hilkia wigi sho: myang da" mougsoug" pug moo lhid" to" da" tarha" joem ri ci: wa shid re" Yerusalem yo' deing da" Yuda mung" mo join: zei: mo, lo, kyo' yu" mo, dangain" yo' yhoem: khoug: mo yu phara" joem yu phara" soolhoo: joem tungbau yu phara" gootu: ri no' da" zi joem dangain" ziri yu pyam da:.

²⁵ Aseing ri nya: oung: khoug: nheigloem: myid yoem: vhoo" dangain" yo' dei byid: su:- Moshe da" tarha" dangain" ziri cang pyeing da" khokham nyang: yo' du zi nya: shid vhu" moo dayug we' anyid yu" shi" nghoid da:. Nyang: yo' du da" khokham thang ri we' anyid yu" loo: nghoid da:.

²⁶ Nghoid loug we' khokham Manashe wigi Yuda mung" ri Aseing da" nheigloem: ri xoo: sho' yoo: nhang: zigi akhid" lang" nheig yoo: agyoo" shi" nghoid da:.

²⁷ Aseing gi «Ngoo gi Israela ri koid yhang: ti" Yuda ri we' ngoo koid wa. Yuda byumyu" yiri nga" shidkhoin" mo khaid thu pyam wa. Ngoo khyen: yu to" da" voomoo" Yerusalem ri yo' ngoo ri noku ku" goo" wa shid re" ngoo tid to" da" joyoo Noku Yhoem: Moo" ri ngoo ngeug pyam wa» ga: tid da:.

Yoshia Vhoeb Khang" da" Lo" Thang Ayo,

²⁸ Khokham Yoshia koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo lhid" xoem" to" ago".

²⁹ Yoshia khokham koid nyid uri Egutu khokham Nekho gi Asuri khosen ri pang" wa shid re" Uphrad gyid lang khyo" gyidab daloem ri shu' yhe: lo" da:. Khokham Yoshia gi Megido joyoo moo Egutu gyidab ri toem' pyam lho: gyi khaid jang: moo said pyam zi shau" da:.

³⁰ Nya: gyizoug: yigi nya: da" manggung ri gyi myang: rheing" adang moo ke" lho: Yerusalem khyoo: yu lo" ago". Khokham loeb yoo moo myhoeb shoung: pyam ago". Yuda byumyu" yigi Yoshia da" yuggi zoo: Yoahaza ri khyen: yu lho: khokham koid wa nyang: ri mainkaid xu: joid byid: ago".

Yuda Khokham Yoahaza

³¹ Yoahaza gi Yuda khokham bue" lo uri apyaid eigxe: soem" zain nghoid bye:. Nyang: gi Yerusalem moo lhammoo" soem" khyab vhoeb da:. Nya: myhi' gi Libna voomoo" mo Yerimia da" myiyi: zoo: Hamutala nghoid da:.

³² Nya: phoug" phyid" yi da" leig ri cang lho: nyang: gi Aseing ri yooboo shoid thougtheung da:.

³³ Hamad mung" mo Ribla moo Egutu khokham Nekho wigi thung: myheig lhung uri nyang: vhoebkhang" da" ayo, thang byug da:. Yuda mung" ri khang" doug khyo" ngei 2062 joid: jain"- sheing: 20 joid: jain" byid: nhang: da:.

³⁴ Khokham Nekho gi Yoshia da" yuggi zoo: Eliakim ri Yoshia khoo: moo Yuda khokham xo' koid nhang: da:. Houg: lho: nya: myeing ri Yehoiakim ga: myeing thid myheing pyam da:. Yoahaza gi khokham Nekho wigi Egutu mung" khyoo: shu" lo" lho: nyang: gi houg moo shid: bye:.

Yuda khokham Yehoiakim

³⁵ Khokham Yehoiakim gi Egutu khokham wigi mho' da" khang" doug kheing" ri byid: wa yoo" sho' koid wa shid re" nyangnu" yoo" zoo: yoo" shug jonu" ri cang wigi mung" byu yi mo kheing" ri koid: yu da:.

³⁶ Yehoiakim gi Yuda khokham bue" lo" uri apyaid eig xe: wim: zain nghoid da:. Nyang: gi Yerusalem moo daxe: dazain vhoeb da:. Nya: myhi' gi Ruma voogung mo Pedaia da" myiyi: zoo: Zebida nghoid da:.

³⁷ Nya: phoug" phyid" yi da" leig ri cang wigi Yehoiakim gi Aseing ri thougtheung yooboo koid da:.