2 KHOKHAM 21 - Lacid Common Language Bible

Yuda Khokham Manashe

¹ Manashe gi nyang: Yuda khokham bue" lo uri daxe: eig zain shi" danghoid da:. Nyang: gi Yerusalem moo wim: xe: wim: zain vhoeb bye:. Nya: myhi' gi Hepziba nghoid da:.

² Nya: byumyu" yi shid khyoo: yhe: lo" uri mungdain: mo Aseing wigi khaid thu pyam da" byumyu" yi da" aco' ajhoid avoid lo, moo" ri cang wigi Manashe gi Aseing ri thougtheung yooboo shoid da:.

³ Nyang: gi nya: phoo Hezekia wigi phyo' pyam bye: da" tungbau yu phara" ri no' da" joyoo joem ri doem koid da:. Nyang: gi Israela khokham Ahab koid ziyo' dakhyoo" ti" Bala ri noku da" joyoo phoin: joem yo' yu phara" myhi' Ashera da" soolhoo: ri koid da:. Manashe gi kyi: joem ri we' noku da:.

⁴ Nyang: ri noku wa joyoo ga: Aseing wigi tid to" da" joyoo Noku Yhoem: Moo" khoug: moo tungbau yu phara" phoin: joem ri nyang: koid da:.

⁵ Nyang: gi Noku Yhoem: Moo" mo vang" eig loem: moo kyi: joem ri no' wa shid re" phoin: joem ri koid da:.

⁶ Nyang: gi nya: yuggi zoo: ri nghe' ngei" xoin" khyo" xoin" to' byid: da:. Nyang: gi buid phyed zi fa" zi lo, kyo' yu" mo, yo' join: zei: mo, ri dang: myid: myid: da" khyoo: koid da:. Nyang: gi Aseing ri gye" thougtheung yooboo koid lho: nya: nheig yo: khyoo: ri lhu: zhang" kaid da:.

⁷ Nyang: gi Noku Yhoem: Moo" moo yu phara" myhi' Ashera da" soolhoo: ri to" to" da:. Hau: joyoo gi Aseing wigi David nya: yuggi zoo: Sholumon ri «He: Yerusalem mo he: Noku Yhoem: Moo" moo ngoo ri noku wa joyoo khyo" Israela byumyu" kung: daxe: eig kung: da" mougmyid dangain" mo ngoo khyen: yu to" da" joyoo nghoid.

⁸ Israela byumyu" yi nga" amyeing" dang: joem dangain" ri yo' nga" dei zoo: Moshe wigi nyangnu" ri byid: to" da" tarha" dangain" ri cang nyid boem nghoid rigi nyangnu" phoug" phyid" yiri ngo wigi byid: to" da" mungdain: mo nyangnu" ri khaid thu kaid wa akhang" ngoo abyid: wa» ga: tid da" joyoo nghoid.

⁹ Nghoid loug we' Yuda byumyu" yigi Aseing tid dang: ri atam" gyoo: wigi nya: byumyu" yiri shid vhu" khyoo: jhen" yhe: lo" boem uri Aseing wigi khaid thu pyam da" byumyu" yi wigi shoid vang: boem da" yooboo tho' je gyi: da" yooboo joem rilang" Manashe gi byumyu" yiri shu" shoid bye: da:.

¹⁰ Aseing gi nya: dei zoo yi nghoid da" lapi: yi nhoid khyo"

¹¹ «Khokham Manashe gi hau: aco' ajhoid da" lo, moo" joem nghoid da" Khanan byu yi koid boem tho' xo: da" lo, moo" ri koid abye:. Nya: yu phara" soolhoo: dangain" wigi Yuda byumyu" yiri nyang: yooboo shu" shoid abye:.

¹² Houg: yoomo Israela da" Aseing Mangsoo ngoo gi houg yhang: ti" yau: khe" kyi" khyeug ziri Yerusalem yo' Yuda mung" dang moo bui" nhang: loo wa. Hau: khyoo: ri shau" gyo: da" mo, yugkhang" moo"- mau" byug goo" wa.

¹³ Ngoo gi Samari ri koid ziyo' dakhyo"- Israela khokham Ahab yo' nya: amyed ashen yiri ngoo koid ziyo' dakhyoo" ti"- Yerusalem ri yooboo dam byid: wa. Bain ri soid pyam lho: mug to" da" yhi' sain' sho' ngoo gi Yerusalem voobyu yiri houg mo shang sho' soid pyam wa.

¹⁴ Ngoo gi nyid deing jo, da" voobyu yiri she: pyam to" lho: nanu" da" gyivoo yi lo, moo ab pyam wa. Houg bang: gi nyangnu" ri oung: pyam wigi nyangnu" mung" ri lhoid yu loo" goo" wa.

¹⁵ Nyangnu" ngoo ri yooboo shoid lho: nyangnu" phoug" phyid" yi Egutu mung" mo thu lo boem da" ayo, mo akhanyid" ju" sho' ngoo ri nheig joem: yoo: nhang: boem yoomo nga" byumyu" yiri hidsu" ngoo koid wa» ga: tid da:.

¹⁶ Manashe gi yooboo ayo" da" voobyu yi myoo" sho' ri said pyam lho: Yerusalem fu" moo" khyoo: moo suid" lang yau da:. Nyang: gi he: ziri lung: wigi Yuda mung" byu yiri yu phara" soolhoo: joem khyoo: shu' yhe: lho: nyangnu" ri Aseing jhang yooboo shoid thougtheung nhang: da:.

¹⁷ Manashe koid da" gootu: lo, moo" ja: khang" moo" yo' nyang: shoid da" yooboo joem we' bo lho: hau: joem ri Yuda khokham yi da" mhoomyid: shen" dam pug moo lhid" xoem' to" ago".

¹⁸ Manashe shid: lo" wigi khokham kho" bain khyam: nghoid da" Uza khyam: moo myhoeb pyam ago". Houg: lho: nya: yuggi zoo: Amon gi nya: khoo: moo khokham xo' koid da:.

Yuda Khokham Amon

¹⁹ Amon gi Yuda khokham bue" lo da" uri nya: apyaid eig xe: eig zain nghoid da:. Nyang: gi Yerusalem moo eig zain vhoeb da:. Nya: myhi' gi Yotba voogung mo Haruza da" myiyi: zoo: Meshulemed nghoid da:.

²⁰ Nya: phoo Manashe yo' dakhyoo" ti" nyang: gi Aseing ri thougtheung yooboo shoid da:.

²¹ Nyang: gi nya: pho da" lo, moo" ri leig yu" wigi nya: phoo no' lo da" yu phara" soolhoo: joem ri no' da:.

²² Nyang: gi nya: phoug" phyid" yi da" Aseing Mangsoo ri ngeug pyam lho: Aseing da" amyeing" dang: joem ri acang nghoid da:.

²³ Amon da" gyizoug: yigi nyang: ri thougtheung gyi koid wigi nyang: ri khokham kho" moo gau" said pyam da:.

²⁴ Yuda mung" byu yigi Amon ri gau" said pyam da" bang: ri said pyam wigi nya: yuggi zoo: Yoshia ri khokham koid nhang: ago".

²⁵ Amon koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo lhid" xoem" to" ago".

²⁶ Amon ri Uza bain: khyam: khoug: mo loeb moo myhoeb pyam ago". Houg: lho: nya: yuggi zoo: Yoshia gi nya: khoo: moo khokham xo' koid da:.