2 KHOKHAM 2 - Lacid Common Language Bible

Elia Mougkhung: Khyoo: Shu" Yu Shau" Khyoo:

¹ Aseing gi Elia ri lid shoem' mo mougkhung: khyoo: shu" yu wa ayo, ju" lo da:. Elia yo' Elisha gi Gilgala mo to' lo" wigi

² Khyoo: laid moo Elia gi Elisha ri «Nang hid: moo: nyid we' Aseing gi ngoo ri Bethela khyoo: yhi: wa amyeing" byid: da» ga: tid da:. Nghoid loug we' Elisha gi «Ngoo nang ri atoo" kho' wa ein: ngoo dang: zung" da" kangso' Aseing yo' nang moo jham' tang: da» ga: phug tid da:. Houg: lho: nya: eig yug gi Bethela khyoo: xo' yhe: lo" ago".

³ Houg moo nyid boem da" Lapi: daphung: gi Elisha jhang yhe: wigi nyang: ri «Aseing gi akhid" nyid" re" yhoem: seing: ri nang mo shu" yu pyam wa ziri nang se' rhe"» ga: tid boem. Elisha gi «Ngoo se'- nghoid loug we' hau: khyoo: yo' sen: wigi atid goo" shang» ga: tid da:.

⁴ Hau: thang: Elia gi Elisha ri «Akhid" nang hid: moo nyid kho' we' Aseing gi ngoo ri Yerikho khyoo: yhi: wa shid re" amyeing" byid: bye:» ga: tid da:. Nghoid loug we' Eliasha gi «Ngoo nang ri atoo" kho' wa ein: ngoo dang: zung" da" kangso' Aseing yo' nang moo ngoo jham' tang: da» ga: phug tid da:. Houg: lho: nya: eig yug Yerikho khyoo: yhe: lo" ago".

⁵ Houg moo nyid boem da" Lapi: daphung: gi Elisha jhang yhe: wigi nyang: ri «Aseing gi akhid" nyid" re" yhoem: seing: ri nang mo shu" yu pyam wa ziri nang se' rhe"» ga: tid ago". Elisha gi «Ngoo se' nghoid loug we' hau: khyoo: yo' sen: wigi ngoonu" atid gooshang» ga: tid da:.

⁶ Hau: thang: Elia gi Elisha ri «Akhid" hid moo: nyid we' Aseing gi ngoo ri Yodan gyid lang khyoo: yhi: wa amyeing" byid: da» ga: tid da:. Nghoid loug we' Elisha gi «Ngoo nang ri atoo" kho' wa ein: ngoo dang: zung" da" kangso' Aseing yo' nang moo ngoo jham' tang: da» ga: phug tid da:. Houg: yoomo nya: tang: xo' yhe: lo" ago".

⁷ Houg: lho: Lapi: wim: xi: yug we' Yodan gyid lang khyoo: nyangnu" jhang cang yhe: lo" ago". Elia yo' Elisha gi gyid yam moo yhe: theing: ago". Houg: lho: hau: Lapi: wim: xi: yug we' dajhi' ve: jang" moo yab jo, ago".

⁸ Hau: thang: Elia gi nya: byisheing: ri khyoid deing: wigi hau: ziyo' gyid moo baid kaid da:. Gyid gi go, loo" khare" wigi nyang: yo' Elisha gi myid jang: hei' jang" khyo" thei: tab khyoo: gu: dab yhe: ago".

⁹ Houg moo Elia gi Elisha ri «Ngoo shu" yu ashau" shi" ri ngoo nang ri cikoid byid: wa nang vho: ziri tid we'» ga: myid: bye:. Elisha gi «Re" Venyi yoem: so' eig zhang ngoo ri yoo" nhang: la,- hau: zigi ngoo ri re" khoo: moo xo' koid wa yoem byid: re" wa» ga: phug tid da:.

¹⁰ Elia gi «Hau: zigi byid: wa shid re" gye" yau: da" mho' sang: khyoo: nghoid. Nghoid loug we' re" jang" mo ngoo ri shu" yu pyam uri nang shau" myang rigi nang hau: ziri shoug" kham: yu wa. Ngoo ri nang ashau" myang: nghoid rigi hau: ziri nang ashau" kham: yu wa» ga: phug tid da:.

¹¹ Nya: tang: dang: doem go" zoo" ri xo' yhe: lo" ago". Houg: lang" myi: myang: joem she: da" myi: gyi myang: rheing" gi nyeigdain tung" nya: eig yug agyoo: moo ju" re" wigi Elia gi lid shoem' yo' mougkhung: khyoo: shu" yu zi shau" da:.

¹² Elisha gi hau: ziri shau" myang wigi Elia ri «Nga" phoo we"- Nga" phoo we"- Israela da" gyi myang: rheing" joem yo' myang: jui: bang: we"- nang lo" byug bye: nhung» ga: nyho: tid da:. Nyang: gi Elia ri khanham we' adoem shau" myang loo: nghoid da:. Nheig koug wigi Elisha gi nya: byisheing: ri eig gang lang: khyam" pyam da:.

¹³ Hau: thang: nyang: gi Elia wigi khyo' too" kho' da" nya: byisheing: ri koid: yu wigi doem tau" lo" lho: Yodan gyid lang gyid yam moo: lo" yab jo, da:.

¹⁴ Nyang: gi Elia da" byi: yo' gyid lang ri baid wigi «Elia da" Aseing Mangsoo gi khamoo: la"» ga: tid da:. Hau: thang: nyang: gi gyid lang ri doem baid kaid da:. Gyid gi go, loo" khare" wigi thei: tab khyoo: so" dab lo" da:.

¹⁵ Yerikho mo Lapi: wim: xi: yug gi nyang: ri myang wigi «Elia da" yoem so' gi Elisha adang moo jo, jo, abye:» ga: tid ago". Nyangnu" gi nya: jhang yhe: wigi nya: shidkhoin" moo yhe: goeb pid lho:

¹⁶ «Ngoonu" hid: moo wim: xi: yug nyid dangain" bang: gi yoem: boo mo, za: nghoid. Re" yhoem: seing: ri yhe: sho: yu" shang. Aseing da" Venyi: gi nyang: ri shu" lo" byug wigi boem anghoid lang" janggyoin: moo too" kho' ri too" khoo' abe» ga: tid ago". Elisha gi «Nanu" age yhi: goo" wa» ga: tid.

¹⁷ Nghoid loug we' nyang: gyoo: sho' nyangnu" agyoo: atho' tid lho: nyangnu" ri yhi: nhang: bye:. Wim: xi: yug bang: we' yhe: wigi Elia ri myhang: da" joyoo- nyhoem: da" joyoo cang soem" nyid" sho: ri nyang: ri amyang loo: nghoid ago".

¹⁸ Hau: thang: nyangnu" gi Yerikho moo lang" nyid da" Elisha jhang doem tau" lo" ago". Nyang: gi houg bang: ri «Nanu" ri ayhi: goo" ein: tid anghoid rhe"» ga: lhoem: tid da:.

Elisha Da" Mau" Pho" Alho: Again Joem

¹⁹ Yerikho mo byu dayham" gi Elisha jhang yhe: wigi «Ludaid phoo we"- nang se' ziyo' dakhyo" he: voomoo" gi gye" pyo: zi nghoid. Nghoid loug we' gyid agi yoomo noem bya: bya: bue" nhang: da› ga: tid ago'» ga: tid boem.

²⁰ Nyang: gi «Jarung: aseig moo xoo" dajhi' kaid wigi nga" jang khyoo: ci: loo ge'» ga: amyeing" byid: bye:. Nyangnu" hau: ziri nya: jhang ci: loo" byid: da:.

²¹ Houg: lho: nyang: gi gyid bug khyoo: yhe: lho: hau: xoo" ri gyid moo: yhe: pyam zei kaid wigi «Aseing gi hid su" ga: tid ‹Ngoo gi he: gyid ri gyeing: young" nhang: bye: wigi he: gyid gi shid: zi anghoid lang" noem bya: bya: zi khanham we' abui" nhang: loo: wa›» ga: tid da:.

²² Elisha tid ziyo' dakhyo" hau: bidnyid mo gyid gi gyeing: young" lo" byug da:.

²³ Elisha gi Yerikho mo thu lo" lho: Bethela khyoo: yhe: lo" da:. Khyoo: laid moo zoolu: yi dayham" voogung mo thu re" lho: nyang: ri juang" yi ago". Nyangnu" gi «Ngi: gyoid we"- hid: mo thu loo" we'» ga: nyho: tid ago".

²⁴ Elisha gi lheing: lo lho: nyangnu" ri zhug yu" wigi Aseing myeing moo nyangnu" ri nheing" da:. Houg: lang" voem, myhi' eig du: siyoo mo thu re" wigi zoolu: myid: xe: eig yug ri adu du ngaid ceig sain" pyam ago".

²⁵ Elisha gi Khamela boem khyoo: do, lo" wigi thang: ri Samari khyoo: tau" lo" da:.