2 KHOKHAM 1 - Lacid Common Language Bible

Elia yo' Khokham Ahazia

¹ Israela khokham Ahab shid: thang: ri Moba mungdain: gi Israela ri gyi koid ago".

² Israela khokham Ahazia gi Samari mo nya: khokham kho" yhoemkhung: tho' moo jo, da" gyam" tho' mo byid gyo" wigi xoo: sho' dam dab da:. Houg: yoomo nyang: gi nyang: gi wa agi wa ein: ziri si' wa shid re" Ekron voomoo" mo Philisti yi da" yu phara" nghoid da" Balazebu ri yhe: myid: wa shid re" lagyoo: dayham" ri nhang: kaid da:.

³ Nghoid loug we' Aseing da" moug: lagyoo: gi Tishbe mo Lapi: Elia ri khokham Ahazia da" lagyoo: yi yo' yhe: shoug" nhang: wigi nyangnu" ri «Ekron yu phara" Balazebu ri dang: myid: wa shid re" nanu" ciwim yhi: go" la". Israela mung" moo yu phara" anyid ein: nanu" myid jhoo: yoomo nghoid go" rhe".

⁴ Khokham ri ‹re" dam agi wa. Shid: wa zi nghoid› ga: Aseing tid da ein: lo" tid kyoo" we'» ga: tid da:. Elia gi Aseing wigi amyeing" byid: to" ziyo' dakhyo" koid da:.

⁵ Houg: lang" lagyoo: yigi khokham phoo jhang doem tau" lo" ago". Khokham phoo gi «Nanu" ciwim doem tau" loo go" lha"» ga: lhoem: myid:.

⁶ Nyangnu" gi «Ngoonu" gi Ngoonu" ri doem tau" loo" wa shid re" tid wigi ‹nang ri Ekron yu phara" Balazebu ri dang: myid: wa nang ciwim lagyoo: nhang: kaid lha" Israela mung" moo yu phara" anyid ein: nang myid jhoo: yoomo nghoid rhe". Nang gi dam agi wa. Nang shid: wa zi nghoid ga: Aseing tid da: ein: lo" tid kyoo" we'› ga: tid da" byu dayug yo' shoug" yoomo nghoid» ga: phug tid ago".

⁷ Khokham phoo gi «Byu hau: yug khate" su: nghoid lha"» ga: myid: da:.

⁸ Nyangnu" gi «Gougnyhoug shooyid yo' koid da" byi: sheing" void ci: wigi shooyid phyid" cu" cu" ci: da:» ga: tid. Khokham phoo gi «Elia nghoid da» ga: tid da:.

⁹ Hau: thang: khokham phoo gi Elia ri yhe: shu" yu wa shid re" gyizoug: dayug ri byu wim: xi: yug yo' nhang: kaid da:. Gyizoug: phoo gi bau gung tho' moo Elia zhung: jo, ziri yhe: myang wigi nyang: ri «Mangso byu we" nang ri gyoo" loo wa shid re" khokham phoo amyeing" byid: da:» ga: tid da:.

¹⁰ Elia gi «Ngoo Mangso byu nghoid rigi mougkhung: mo myi: gyoo" re" wigi nang yo' re" byu yiri re" nghe' said pyam baja"» ga: phug tid da:. Dalheing: dam myi: gi gyoo" re" wigi gyizoug: phoo yo' nya: byu yiri nghe' said pyam da:.

¹¹ Khokham pho gi gootu: gyizoug: dayug ri byu wim xi: yo' doem nhang: kaid da:. Hau gyizoug: do, yhe: wigi Elia ri «Mangso byu we" nang ri akhid" nyang: gyoo" ri" wa shid re" khokham phoo amyeing" byid: da:» ga: lo" tid da:.

¹² Elia gi «Ngoo Mangso byu nghoid rigi mougkhung: mo myi: gyoo" re" wigi nang yo' re" byu yiri re" nghe' said pyam baja" ga: phug tid da:. Dalheing: dam Mangso myi: gyoo" re" wigi gyizoug: phoo yo' nya: byu yiri nghe' said pyam da:.

¹³ Khokham phoo gi gyizoug: dayug yo' byu wim: xi: yug ri dalheing: doem nhang: kaid da:. Hau: gyizoug: gi bau gung khyoo: do, yhe: wigi Elia da" shidkhoin" moo: poid thug yhe: thug lho: «Mangso byu we"- ngoo yo' nga" byu yiri nheig khyeug yu la. Ngoonu" kangso' ri loid nhang: la.

¹⁴ Gootu: gyizoug: eig yug yo' nya: eig tang: da" byu yigi mougkhung: mo myi: yo' nghe' said pyam zi shoug" bye:. Nghoid loug we' ngoo ri nheig khyeug yu la o"» ga: tid da:.

¹⁵ Aseing da" moug: lagyoo: gi Elia ri «Nyang: yo' dage" cang gyoo" loo" we'- agyug» ga: tid. Houg: yoomo Elia gi gyizoug: phoo yo' dage" khokham phoo jhang cang gyoo" lo" wigi

¹⁶ Nyang: ri «Aseing hid su" tid ‹Nang gi Israela mung" moo dang: myid: wa yu phara" anyid loo: yhang: ti" koid wigi Ekron yu phara" Balazebu ri dang: myid: wa lagyoo: yiri nhang: kaid yoomo nang gi noodam agi wa. Nang shid: wa›» ga: tid da:.

¹⁷ Elia nhoid khyo" Aseing tid ziyo' dayhang: ti" Ahazia shid: lo" da:. Ahazia gi yuggi zoo: ayoo" yoomo nya: nhung" Yoram gi Yuda khokham Yehoshaphad da" yuggi zoo: Yehoram vhoeb zi eig zain ein: zain ri nya: gung khoo: moo: khokham xo' koid da:.

¹⁸ Khokham Ahazia koid da" lo, moo" gootu: ja: khang" moo" gi Israela khokham yi da" mhoomyid: shen" dam pug moo lhid" xoem" to" ago".