1 TIMOTHI 3 - Lacid Common Language Bible

Phung: Moo vhu" Shi: Mo, Khyoo:

¹ Phoung: da" vhu" jhung: bui" nhoug su: gi ge, thang da" moo" daloem: ri vho: ngei nyid su: nghoid- ga: wigi tid to" da" dang: gi deingmain" da" dang: dakhoin" nghoid nyid.

² Phung moo vhu" jhung: koid su: dayug gi yooboo adab su- myi: dayug za: yoo' su- se' zed" lhid' nyid su- nyang: nya: da" gung du: ri yo" khang" su- akhyoo" joo joo kang: so' se' dei nyid su- nya: yhoem: moo tungbau being" voo ri doo' zhoo" doo" jhug noug su- se' jhoug" se' mhoo, byid: su: nghoid ca.

³ Yhid: ashug main: su- angheing" ayang akoid su: nghoid lho: wigi sam" dab, nu" nham, su- myen, jham" khyoo: ri vhoo: su- nyang: gi ngei myo, ano, su: nghoid wigi

⁴ Nyang: nya: da" yhoem: ikoin deungkhu: ri nyeing" zoo: yo" shu" vhoeb khang" ziyo' nya: zooyi wigi phau" myang: ziri shau" kham: yu sho' yo" se' koid su: nghoid ca.

⁵ Byu dayug gi nya: yhoem: ikoin deungkhu: ri khasu" shu" vhoeb khang" nyid wa ziri ase' nghoid rigi Mangso da" noku phung: ri khasu" se' shu" vhoeb khang" nyid wa lha".

⁶ Nyang: gi Khristain aseig bue" loo su: we' age nghoid- hougsu" wigi phau khuang khyoo: moo nheigloem: myhang: lo wigi yu satan ri yhang: ti"- shen" yhen dang: phyed' zi ashug" baja"- hau: loem" jeung" khyoo: moo myheung yang" lo wigi nheig boo ung: gyeing: su: nghoid ca" nyid.

⁷ Nyang: gi juang" yi kheing" yoem: zi ashug" wa ziyo' yu satan da" loem, khau: khyoo: moo abyid gyo" vang loo wa shid re" aloem" jeing" shi" bang: da" phau" myang: khyoo: ri yo" kham: yu da" byu dayug nghoid ca.

Phung Moo Bo Pang" Thoug Mo,

⁸ Phung: tau, we' nheugloem: deing byeung" lho: asam" avoid, gi mo, nghoid ca. Yhid: ashug bang:- ngei ri myo, no, vhoo: abo ziyo'

⁹ Hougsu" toin" shid too" bye: da" loem: jeung" khyo: da" deingmain" khyoo: ri gyeungshang: da" nheigloem: yo' lhoem: kham: yu yu lho: loem" jeung" loem, khau: nyid mo, nghoid ca" boem.

¹⁰ Nyang: nu" gi xang: shed" ri ca: kyeung yu" zi shau" boem lho: yooboo ri yo" oung: loid loo" mo, nghoid boem rigi phungtau, moo" ri voin nyid goo" baja".

¹¹ Nyang: nu" da" myi: yi we' akyang" gi mo, nghoid ca" juang" yi gei sang: mo, a gi nyangnu" gi yhid: ayed ziyo' khyoo: khaid khang" moo" moo ding main" loem gi mo, nghoid ca".

¹² Nyang: nu" da" yhoem: seing: myhi' we' asam" avoid, gi bang: nghoid wigi sube" da" lu, wim gei sang: shang pyang: bang: anghoid loo: za: myonhoo: phung" yoeb, bo lho: khyoo: khaid khang" moo" moo nheigloem: dain: bang: nghoid nyid boem ca.

¹³ Nyang: yo' sen: da" moozoo" ri voin: tang: yo" zei: oung: doid' lo" da" phungtau, gi nya: shid' re" myonhoo: ngi shab, zi shau" kham: yu ziyo' nyangnu" da" Khristu moo loem" jeung" khyoo: ri myo, yang" ziyo' yo" kho" kyo' nyid boem.

Nghoeb, Yhoem" To" Da: Khyoo: Zeing

¹⁴ Ngoo gi he: da" mougsoug" lhid" nyid da" ayo, moo kha: myhang amyang" ri re" jang" moo ju" ri" wa ein: wigi myid' byu nyid.

¹⁵ Nghoid loug we' ngoo to' myang" byug nghoid rigi dadei nyid Mangso phung: ein: da" hau: deingmain" apoem: ayang: nghoid da" Mangso yhoem: ikoin deungkhu: moo ngoonu" gi kha: yhang: te" da" avoid asam"- cang yhi: ca" khyoo: ri yo" se' yu baja"- ein: he: mougsoug" ri lhid" kaid' zi nghoid.

¹⁶ Yha" noku thung" mo loem" jeung" da" no, thang khyoo: gi kha: yhi' gyi: lam: jo, ziri hang" we' ngeug gyang: joyoo abo zigi vhoo: moo lhid" to" ziyo' dakhyoo" ti" nghoid nyid. xang: su byu da" gung du: khyo" thu' yab, loo bye: ziyo' deing su: nghoid da" khyoo:- hau: gyeungshang: da" venyi gi toin" shid nyid Mouglagyoo: yi we' nyang: ri shau: myang boem bye- nya: khyoo: gi byumyu" bain sho' mo, ri kho" kyo" tid fu" boem abye: go. Moug: myid byu dangain" gi nyang: ri loem" jeung" boem abye: go- houg: su" nyang: ri moug: khung: tho' khyoo: shu" to' yu zi shau" abye:.