1 SAMUELA 30 - Lacid Common Language Bible

Amaleg Byumyu" Yi Yo' Meing: Zain: Go" Khyoo:

¹ Eig nyid" lid thang: ri David yo' nya: byu yigi Zidla khyoo: doem tau" ju" lo da:. Amaleg byumyu" yigi Yuda mung" mougpyi: shoid yo' Zidla voogung ri vang zain: wigi phyo' pyam bye:. Hau: voogung ri nyangnu" nghe' lho:

² Myiyi: yiri myheig yu bye:. Nyangnu" byu dayug riwe' asaid looza: houg bang: ri nyangnu" yo' dage" shu" loo" bye:.

³ David yo' nya: byu yi ju" yhe: uri voogung nge" gyo" pyam ziyo' nyangnu" yhoem: seing: myhi' yo' zooshang: yiri shu" lo" byug bye: ziri yhe myang bye:.

⁴ David yo' nya byu yigi ngau nyid boem zigi nyangnu" myo, yam: nu: fu: sho' nghoid nyid boem.

⁵ David da" yhoem: seing myhi' Ahinoam yo' Abigela eig yug goin" ri we' bo shu" lo" boem.

⁶ David da" nya: byu yigi nyangnu" da" zoo: yi byug wigi gye" nheig no ziyo' nyang: ri lugzeing yo' du" said wa ga: kyug nyid boem yoomo David gi yau: khi" zeing shoug" nyid da:. Nghoid loug we' nya: Aseing Mangsoo gi nyang: ri yoem: byid: nyid da:.

⁷ David gi Ahimeleg da" nya: zoo: khainjung Abiatha ri «Xoin" ngei" byizuang ci: ri" we'» ga: tid lang" Abiatha gi: hau: ziri nya: jhang khyoo: ci: lo" da:.

⁸ David gi Aseing ri «Hid: su" re" phyo' bang: thang: khyoo: ngoo cang wa lha". Ngoo nyangnu" ri cang myhi: wa la"» ga: myid:.

⁹ Houg: yoomo David yo' nya: byu khyug shoo: thu' lo" wigi Besora gyid lang moo ju" ri nyangnu" dayham" hougmoo: nyid kho' boem ago".

¹⁰ David gi nya: byu myid: shoo: yo' xo' yhe: loo" bye:. Deing da" eig shoo: yug gi gyid lang ri gu: wa shid re" sung myung: boem yoomo thang: moo nyid kho' boem.

¹¹ David da" byu yi Egutu byu dayug ri boem moug: moo myang wigi David jhang khyoo: shu" lo boem. Nyangnu" gi nyang: ri zooshug yo' gyid

¹² Lafoem shi" kyug dajhi yo' zabyid shi" eig pu" ri byid: bye:. Nyang: hau: zi zo: thang: ri yoem: doem yo" pyeing yu bye: da:. Nyang: gi soem" nyid" nyang: ciwe' azoo: loo: za: nyid lid pyam bye:.

¹³ David gi nyang: ri «Re" Aseing hang" nghoid lha". Nang kha mo lo lha"» ga: myid:. Nyang: gi: «Ngoo gi Amaleg byumyu" yi da" join Egutu byu nghoid. Ngoo noo yoomo nga" aseing she: pyam too" kho' zi soem" nyid" nghoid bye:.

¹⁴ Ngoonu" gi Yuda mung" mougpyi: shoid mo Kherethi moug: yo' Khaleb akung: yi da" moug: ri phyo' pyam kho' wigi Zidla voogung riwe' nghe' pyam kho' bye:» ga: tid kyoo" bye:.

¹⁵ David gi nyang: ri «Hougsu" lhu: phyo' yen" bang: jhang ngoo ri ayo" shu" yhi: wa lha"» ga: myid: bye:. Nyang: gi «Nang ngoo ri asaid wa nga" aseing jang" moo a ab byid: wa ein: Mangsoo myeing moo dangsoo" byid: nghoid rigi ngoo yo" shu" yhi: wa» ga: tid.

¹⁶ Houg: lang" nyang: gi David ri houg bang: jhang shu" yhi: bye:. Lhu: phyo' yen" bang: gi Philisti yo' Yuda mung" mo jonu" gye" myoo: sho' shoug" yu loo yoomo abyoo asain" zoo: gi shug gi pui" koid nyid boem.

¹⁷ David gi thang: nab kyoo' nab soin: myo, yoeb yoeb mo zi myen" thang: ju" sho' nyangnu" ri khaid zain: bye:. Gola-ug mo zhung: phang: da" zooyam myid: shoo: mo lid dayug we' ayo" phang: loo: goo" nghoid da:.

¹⁸ David gi byu dangain" yo' Amaleg byu yi yu lo" da" jonu" dangain" ziyo' nya: yhoem: seing: myhi' tang: ri we' doem yo" khyoid yu bye:.

¹⁹ Jonu" ciwe' abyug nghoid da:. David gi nya: byu yi da" yuggi zoo: myiyi: zoo: yiri we' Amaleg byu yi yu lo" da" jonu" joem dangain" ri we' doem shoug" yu loo bye:.

²⁰ Nyang: we' nya: byu yi pyoung" lo da" shid mo gougnyhoug phung: ri yu lho: «He: zi David seing: zi nghoid» ga: tid.

²¹ Hau: thang: David gi sung myung: yoomo nyang: yo' ayo" cang looza: Besora gyid lang moo nyid kho' da" byu eig shoo: yug jhang khyoo: doem tau" loo" bye:. Nyangnu" gi David yo' nya: byu yiri shau" goo" wa shid re" shid khyoo: re" lo ri David gi nyangnu" jhang khyoo: do, yhe: wigi nyangnu" ri laloem lanyu: tau yu bye:.

²² Nghoid loug we' David yo' dage" bo cang bang: mo vhoo: bo ziyo' byugang: yi dayham" «Nyangnu" gi ngoonu" yo' acang yoomo nyangnu" ri jonu" ayo" byid:. Nya: yhoem: seing: myhi' yi yo' nya: zoo: yiri yu wigi lo" boem goo" baja"» ga: tid.

²³ Nghoid loug we' David gi «Nga" mang: nhung" yi we" Aseing nyhang" ri byid: bye: da" jonu" ri nanu" hougsu" yo" koid wa zi anghoid. Nyang: nyang: ri lhoug zung" ziyo' lhu: phyo' bang: ri yo" oung: doid loo" wa da" akhang" nyhang" ri byid: bye: zi nghoid.

²⁴ Nanu" tid da" dang: ri hang" we' myid veing" wa zi anghoid. Dangain" mo, ri dayhang: ti" za: gam ca" wa zi nghoid. Thang: moo: nyid gyoo" bang: ri we' meing: zain: pa: khyoo: yhe: bang: ri we' gam boem" dayhang: ti" za: kho' byid: wa zi nghoid» ga: tid.

²⁵ Hau: bidnyid mo akhid" ju" sho' Israela mungdain: moo cang wa shid re" hau: tarha" ri David koid too" bye:.

²⁶ David Zidla voogung khyoo: doem tau" lo lho: Aseing da" gyivoo yi jang" mo ngoonu" yu lo da" jonu" mo he: zigi nanu" shid re" jhungshug ga: wigi nya: byencang" yiri we' Yuda vhujhung: yiri we' jonu" dayham" yo' dage" mungdang: foin: kaid bye:.

²⁷ Nyang: gi hau: jhungshug joem ri Bethela mo byumyu" yi jang" moo we' Yuda mung" mougpyi: shoid mo Rama moo nyid da" byumyu" yi jang" moo we' byid: kaid.

²⁸ Arorera- Sipmod- Eshtemoa

²⁹ yo' Rakhala voogung joem mo byumyu" yi jang" moo we' Yeramela akung bang: ri we' Keni byumyu" yiri we'

³⁰ Horma- Borashan- Athag yo'

³¹ Hebron voogung byu yiri we' foin: byid: bye:. Nyang: yo' nya: byu yi cang so" ju" yen" da" joyoo dangain" jang" khyoo: we' foin: kaid bye:.