1 SAMUELA 28 - Lacid Common Language Bible

¹ Ayo, dajhi myang" thang: ri Israela byumyu" yiri zain: wa ga: Philisti byumyu" yigi gyiphung: ri khe: zheing" to" lho: Akhisha gi David ri «Nang yo' re" byu yigi nga" shoid khyo" gyi bo zain: ca" ziri nang gyeing" se' nyid ca" wa zi nghoid» ga: tid.

² David gi «Nghoid bye:- ngoo gi re" dei zoo: nghoid ziyo' ngoo ciyo" koid ein: zigi nang nyang: si' bye: zi nghoid» ga: tid. Akhisha gi «Gi bye:- ngoo gi nang ri ayo, byeung" nga" kangso' zung" su: koid nhang: wa» ga: tid.

Sholu gi Yu Myhi' ri: Yhe: Myid: Gyo: Khyoo:

³ Akhid" Samuela shid: bye: yoomo Israela byumyu" dangain" mo, nheig koug nheig nge ziyo' nyang: ri nya: moug: nghoid da" Rama voogung moo myhoeb too" bye:. Sholu gi boid phyed bang: yo' yu myhi yiri Israela mungdain: mo khaid thu wa shid re" soin' nyid da:.

⁴ Philisti gyiphung: yi Shunem voogung ayam moo dab koid lho: zoeb foem: nyid. Sholu we' Israela byumyu" yiri khe: zheing" yu wigi Gilaboa boem moo dab koid nyid boem.

⁵ Sholu gi Philisti gyiphung: ri myang lang gye: gyoug nyid wigi

⁶ Cikoid wa ziri Aseing jhang lo" myid: yu" bye:. Nghoid loug we' Aseing gi yhoebmo, moo we' Urim yo' Thumin koid jang" moo we' lapi: yi khyo" we' aphug tid nghoid da:.

⁷ Hau: thang: Sholu gi nya: moo" voin bang: ri «Ngoo ri yu koid su: dayug yhe: shoo: byid: ge'. Ngoo nyang: ri yhe: myid: yu" wa» ga: tid. Nyangnu" gi «Endora voogung moo: dayug nyid» ga: tid.

⁸ Houg: yoomo Sholu gi gootu: byimi thid void- asam" phyug pyam lho: moug: coid thang: ri nya: byu eig yug yo' dage" myiyi: myhi ri yhe: shoug" bye:. Nyang: gi myiyi: myhi ri «Nga" shid re" byoo joem ri myid: yu" wigi cibui" wa ziri tid kyoo" la- ngoo myeing tid su: da" byoo ri khi: byid: we'» ga: tid.

⁹ Myiyi: myhi gi «Boid phyed bang: yo' yu koid bang: ri Israela mungdain: mo khaid thu' pyam wa shid re" soin nyid da" Sholu akhyoo" ri nang bain se' nyid thang: ri ngoo ri said pyam wa zi shoug" wa shid re" ciwim yoomo joug jhoin" nyid la"» ga: tid.

¹⁰ Hau: thang: Sholu gi deingbyeing" dangsoo" kham: yu lho: myiyi: myhi ri «He: zi koid yoomo nang ri dam kaid zi ashau" baja" kangso' Aseing jhang ngoo dangsoo" to" too" bye:» ga: tid.

¹¹ Myiyi: myhi' gi: «Re" shid re" hang" ri khi: byid: wa la"» ga: tid. Nyang: gi «Samuela» ga: tid.

¹² Myiyi: myhi gi Samuela ri myang lang" kyi: ngau lho: Sholu ri «Nang ngoo ri ciwim yoomo mhoug lha". Nang nyang: khokham Sholu nghoid da» ga: tid.

¹³ Khokham gi myiyi: myhi ri «Agyug ca"- nang ciri: myang lha"» ga: tid. Myiyi: myhi gi «Myidjang khoug mo Venyi joem thu' lo zi ngoo myang» ga: tid.

¹⁴ Nyang: gi «Hau: zi ciyo' du lha"» ga: myid:. Myiyi: myhi gi «Mangzoo: phoug" dayug to' lho: adang byi: we' void ci: da» ga: tid. Hau: thang: Sholu gi hau: zi Samuela nghoid ziri si' lang" nyang: gi phau" myang: ziyo' myidgung khyoo: goeb pid bye:.

¹⁵ Samuela gi Sholu ri «Nang ngoo ri ciwim lhu: nhung nyid lha". Nang ngoo ri ciwim doem tau" nhang: nyid lha"» ga: myid: bye:. Sholu gi «Ngoo yau: khi" zeing shau" nyid. Philisti byumyu" yigi ngoo ri meing: zain: loo bye:. Mangsoo gi ngoo ri she: pyam bye:. Nyang: gi ngoo ri lapi: yi khyo" we' Yhoebmo, khyo" we' atu" byid: loo: nghoid da:. Houg: yoomo ngoo cikoid ca" ein: ziri tid khyoo" nhang: wa shid re" nang ri ngoo khe: zi nghoid» ga: tid.

¹⁶ Samuela gi «Aseing nang ri she: pyam lho: re" gyivoo nyang: bui" bye: ri ciwim yoomo ngoo ri khe: nyid lha".

¹⁷ Aseing ngoo ri tid nhang: ziyo' dayhang: ti" nyang: koid bye: zi nghoid. Mungdain: ri re" jang" mo yu wigi David lo, moo nyang: ab byid: bye:.

¹⁸ Nang gi Aseing da" amyeing" dang: ri atam" gyoo: loo: za: Amaleg byumyu" yi yo' nyangnu" da" jonu" dangain" ziri bain sho' aphyo' pyam zi nghoid da:. Hougsu" yoomo Aseing gi he: moo" zoo" ri akhid" nang moo: koid nyid zi nghoid.

¹⁹ Nyang: gi nang yo' Israela byumyu" yiri Philisti byumyu" yi: da" lo, moo ab pyam zi nghoid. Nab kyoo' nang yo' re" zoo: yi we' ngoo yo' dage" nghoid nyid wa zi nghoid. Aseing gi Israela gyizoo: yiri Philisti byumyu" yi lo, moo: ab byid: wa zi nghoid» ga: tid.

²⁰ Sholu gi Samuela tid da" dang: ri shoug" gyoo: lang" gyoug wigi dalheing: dam myidgung khyoo: leung loo" khari" bye:. Nyang: gi danyid" goin" damyen goin ci: azoo: ashug yoomo yoem: yoem" nyid.

²¹ Myiyi: myhi we' nya: jhang khyoo: yhe: yu" ri nyang: gye" gyoug nyid ziri myang lang" myiyi: myhi gi «Je" ju" mo aseing we"- nga" kangso' ri byid: pyam lho: nang myid: gu: ri tid khyoo" bye:.

²² Akhid" ngoo tid ziri jeju" mo tam" gyoo: we'. Re" shid re" ngoo zoo: shug soin byid: ba. Nang gyung: yo" soo" wa shid re" hau: ziri zoo: ca" wa zi nghoid» ga: tid.

²³ Sholu gi ciwe' anau zoo: ga: he: pyam bye:. Nghoid loug we' nya: moo" voin bang we' zoo: shug zoo: wa shid re" tid bye:. Lo" thang moo nyang: gyo: wigi myidgung mo to' lho: yhoeb yoo moo zhung: jo, da:.

²⁴ Myiyi: myhi we' nyang: zho" xu: to" da" nu: zoo: ri myab myab said lho: cen: moin" dajhi' ri yu wigi doocid" akaid loo: za: zooyho' ri boung: bye:.

²⁵ Myiyi: myhi gi Sholu yo' nya moo" voin bang: shidkhoin" moo zoo: shug ri soin' byid: lho: nyangnu" hau: ziri zo: wigi hau: myen jang: to' yhe: loo" bye:.