1YOHAN 5 - Lacid Common Language Bible

Mougmyid Ri Oung Lo" Khyoo:

¹ Yesu gi Meshia nghoid ga: loem" jeung" byu hang" nghoid loug we' Mangso nya: zoo: yi nghoid wigi hau: nya: phoo ri jheddab mo, hang" Nghoid loug we' nya: zoo: ri we' jheddab nyid bye.

² Ngoonu" gi mangsoo ri jheddab lho: wigi nya: da" amyeing" tarha" joem ri cang zei: lo" boem nghoid rigi Mangso da" nya: zoo: yi ri we' jheddab nyid khyoo: ngoonu" si' bye.

³ Khasu" wim gari Mangso amyeing" tarha" ri cang zei: lo" khyoo: gi nyang: ri jheddab ein: da" khyoo: nghoid nyid. Nya: amyeing" tarha" gi ngoonu" shid' re" cang yau: nyid zi anghoid.

⁴ Khasu" wim gari Mangso da" nya zoo yug khang" moo" gi hau: mougmyid ri yo" oung: lo" ago- mougmyid ri ngoonu" yo" oung: lo" da" khyoo: gi ngoonu" loem" jeung da" nheigloem: mo ngoid.

⁵ Yesu gi Mangso nya zoo nghoid ga: loem" jeing" su: za: anghoid rigi mougmyid ri hang" su: yo" se' oung: loo" wa lha".

Yesu Khristu Khyoo: Ri: Sagsi: Kham, Khyoo:

⁶ Yesu Khristu gi gyid moo Babtisma kham: yu lho: shid: kham: suid" shoin: ziyo' ju" ri" su nyang nghoid. Nyang: gi gyid' yo' za: ju" re" zi anghoid- gyid yo' we' suid" yo" we' ju" re" zi nghoid. Houg: su" ju" re" khyoo: deung nyid ziri hau: Venyi nyang sagsi: kham, byid: nyid. Khasu" wim gari hau: Venyi nyang- deingmain" da" khyoo: nghoid nyid.

⁷ Sagsi: soem" ja: bo.

⁸ Houg: bang: gi Venyi- Gyid- yo' suid" nghoid wigi hau: soem ja: gi dakhyoo" ti" du, go" khyo" sagsi: kham, byid: nyid boem.

⁹ Ngoonu" gi sube" da" sagsi: kham, dang: ri loem" se' nyid boem:- nghoid loug we' Mangso: da" sagsi: kham, dang: ri loem" se' nyid boem:- nghoid loug we' Mangso: da" sagsi: kham khyoo: gi je" geung: teung lho: nyang: gi nya: zo: da" khyoo: ri sagsi: kham, byid: nyid.

¹⁰ Houg: su" nghoid yoomo Mangso nya: zoo: ri loem" jeing" bang: hang" Nghoid loug we' he: da" sagsi: kham, dang: ri nya: nheugloem: ung: khoug: moo xoem" to. Nghoid loug mangsoo ri aloem" ajeung" bang: hang" nghoid loug we' nya: zo: khyoo: mangsoo nyang: sag si: kham, byid: ziri aloem" jeing" yoomo Mangsoo gi mhoug su nghoid ga: jho: boem ago".

¹¹ Hau: sagsi dang: koem gi he: zi nghoid- mangsoo gi ngoonu" ri athang agoin da" kangso' ribyid: bye: yoomo hau" kangso' da" apoem: ayang: gi nya: zoo: nyang: nghoid nyid.

¹² Hau: nya: zoo ri yo" yu su hang" nghoid loug we' hau: kangso' ri yo" yu ci: bye- nya: zoo: ri ayo" yu shi" su gi kangso' we' ayo" yu.

Apyaid Ato: Kangso' Khyo

¹³ Nanu" gi apyaid atoo: mo dei nyid wa kangso' yo" yu bye: da" khyoo: ri khyag yo" si' goo" baja" Mangso nya: zoo: ri loem" jeung" nyid mo, nanu" jhang khyoo:- ngoo he: mougsoug" ri lhid" kaid.

¹⁴ Mangsoo gi nyang: myid vho: ziyo' dakhyoo" ti"- ngoonu" mho' da" khyoo: ce: ja: ri we' tam" gyoo: byid: khyoo:- khyag nyang: loem" jeung" boem bye: yoomo ngoonu" gi nya: shid khoin" khyoo: asho' agyug loo: za: yo" vang yhe: lo" boem bye.

¹⁵ Ngoonu" gi nyang: ri mho' yoid, da" ayo, khang" moo" moo nyang: tam" gyoo: byid: nyid. He: khyoo: gi deung zi nghoid ziri ngoonu" si' yoomo ngoonu" gi nya: jang" moo mho' da" khyoo: ri yo" yu bye: khyoo: joem ri we' se' nyid boem bye.

¹⁶ Re" mang: re" nhung" dayug yug gi ashid: moin: da" yooboo daja: ja: zei: nyid nghoid rigi nang shau" myang nghoid ri nang gi nya: shid re" re" Mangso jhang akyu" bo mho' nyid ca"- Mangsoo gi nyang: ri apyaid ato: kangso' byid: wa zi nghoid. hau: zigi shid: moin: da" yooboo akoid mo, shid re" za: mho' byid: wa khyoo: nghoid. Nghoid loug we' shid: moin: da" yooboo ga: zigi jo, jo, wigi hau: shid re" Mangso jang" moo mho' yoid ge da" khyoo: ri ngoo atid noug.

¹⁷ Adeung amain" da" moozoo" dangain" gi youg: noo yooboo nghoid nyid, nghoid loug we' shid: amoin: da" yooboo we' jo.

¹⁸ Mangso nya: zoo: nghoid bye: su: gi yooboo axo, koid lo: ziri ngoonu" se' nyid boem. Khasu" wim gari nyang: ri Mangso da" nya: zo: wigi zung" lhug nyid yoomo hau: akhyeing" su: gi nyang: moo ayo" tain" loo.

¹⁹ Moug: myid gyab, goin" gi hau: akhyeing" su: vhoeb khang" nyid da" akhoug: moo bo jo,- Nghoid loug we' ngoonu" gi Mangsoo yo' sen: mo, nghoid ziri ngoonu" nyang: se' nyid boem.

²⁰ Mangso nya: zoo: gi ju" re" nyid wigi deingmain" da" Mangsoo ri yo" se' yu wa da" nheigloem:- nyang nyhang" ri byid: too" bye: ziri nyhang se' nyid. Ngoonu" gi nya: zoo: Yesu Khristu yo' dadeing: daloem: za: koid lho: wigi dei nyid boem yoomo deingmain" da" Mangsoo yo' we' dadeing: daloem: za: bue" lho: dei nyid boem. Nyang: gi Mangsoo gyeing" nyang: nghoid nyid ziyo' athang agoin kangso' we' nghoid nyid.

²¹ Nga" zoo yi we"- mhau' da" phara" joem ri jang" pyam nyid ge'.