1Korinthians 9 - Lacid Common Language Bible

Lagyoo: Dayoug da" Amyeing" Akhang" Yo' Yoovoin Joem.

¹ Ngoo gi loid byoin da" akhang" yoo" su: dayug anghoid la" Ngoonu" da" Aseing Yesu Khristu ri myang yu" bye: anghoid la" Nanu" bi" we' ngoo Aseing da" moozoo" zei: voin, vu, lo da" bidnyid mo ashi" zei: loo mo, anghoid goo" la"

² Byu gooji ngoori lagyoo: dayug khyo" alhoem: kham: yu boem nghoid ri lang" gi nanu" gi gyeing" gyeing" nyang: lheom: kham: yu eung: nyid. Khasu" wim ga: ri Khristu yo' daloem: za: bue" lo wigi- kangso dei nyid mo, nanu" nyang- ngoo lagyoo: dayug nghoid deung da" sagsi: yi nghoid.

³ Ngoori: yooboo foin: lho: thougtheung loo bang: ri- doem phoug tid wa da" dang: gi he: zi nghoid.

⁴ Ngoo nyang: zei: da" moozoo" yoomo- ngoo zoo: wa shug wa akhang" yo" anghoid goo" la"

⁵ Gootu: da" lagyoo: yi- Aseing da" nya: nhoung" bi" yo' lagyoo: Petru yhang: te" bang- da" khoo" shid: ri bo yu" cang wigi- ngoo so" yen" da" joyoo joem moo: yhoem: seing: myhi' shu" yen" wa akhang" ayoo" la"

⁶ Ngoo yo' Barnaba nga" eig yug za: zoo: wa shug wa shid re"- moo" zei: ca" nyid la"

⁷ Gyizoo: khayug gi nya: zookhoo: voin lho: meing: zain: da" moo" zei: yu" la" Khyam: moo" zei: zo: yu" mo, hang" we'- nya: khyam: mo zabyid shi" ri aphyo' zoo: loo: nyid yu" boem la" yang zoem: bang: hang" we' nya: yang noug" ajhoeb' shoug byu boo go" la"

⁸ Nyid khang" moo" bue" nyid da" he: dang: khyang" za: we' anghoid shi"- tarha" khyoo" moo: we' houg: yo' dakhyoo" ti" tid nyid.

⁹ Gug nang: nyid da" nu: nhoid phu" moo: mhang" kho' yo' azhoung" too" byid:- ga: Moshe da" tarha" moo: lhid" to". Akhid" Mangsoo gi nulei: joem riza:- seing" khoo" yoomo tid nyid la"

¹⁰ Nyang: hidsu" ga: tid nyid zigi- ngoonu" shid re" tid nyid zi anghoid goo" la" Gyeing" nyang: ngoonu" shid re" lhid" to" zi nghoid. Yoothung" phug su: yo' gug shi" ri yham" yu su: gi nyang: nyang: yoo" wa da" gug gam boem ri- myid byu lho: dakoid nyid.

¹¹ Ngoo gi nanu" moo: Venyi ashi" ri asain" to" lho: nanu" jang" mo moug: myid da" soidgain- akyu" jeju" ri ngoonu" shau" kham: yu nghoid rigi- ngoonu" ladu lid, da" khyoo: nghoid la"

¹² Sara gooji yi gi nanu" jhang mo-yo" yu wa ga: nheig byu wa akhang" yo" boem rigi- ngoonu" gi je" yoo" wa anghoid goo" la" Nghoid loug we' hau: da" akho, akhang" ri ngoonu" ayu boem: hau: da" akho, akhang" ri yu wa gung khoo: gi Khristu da" ngei bu: lu dang: gi ri- xeung kyo" to" khyoo: aboo loo: za: kyi" khyeug khyoo: dangain" ziri: ngoonu" kham' zo: boem bye.

¹³ Noku yhoem: moo" khoug: moo: moo" voin bang: gi Noku yhoem: moo" khoug: moo- zoo: noem shau" yu nyid boem ziri: we'- nanu" gyeing" gyeing" nyang: se' nyid boem bye.

¹⁴ Houg: yo' dakhyoo" ti" hau: ngei bu: lu dang: gi ri kho" kyo" nyid mo, gi hau: ngei bu: lu dang: mo, voem: doug: yo" khu: ca"- ga: tid to.

¹⁵ Nghoid loug we'- ngoo gi hau: da" akho, akhang" daloem: ri we' ayu ci. Houg yhang: te" da" akho, akhang" ri nga" shid re"- mho' wa ein: he: moug soug" ri lhid" kaid zi anghoid. Houg: su" damho' wa nghoid rigi- ngoo shi" shid: byoug ri je" gi wa nghoid. Nga" da" deingmain" phau: khuang joyoo ri- dang: koem: hang" ri we' abue" loo" nhang: noug.

¹⁶ He: da" ngei bu: lu dang: ri ngoo kho" kyoo" yoomo- nga" shid re" ce: phau: khuang nyid wa joyoo aboo- khasu" wim ga: ri ngoo gi Mangso amyeing" byid: to" ziyo' dakhyoo" ti" ngoo akho" kyoo" loo: za: ayo" nyid loo. Ngoo hau: ngei bu: lu dang: ri akho" kyo" nghoid rigi- nga" shid re" khayhi' mo gyoug pho" ja: nghoid wa lha"

¹⁷ Ngoo he: da" moozoo" ri- nga" myid khyo" khyen: yu lho: dato' zei: nghoid rigi- la, ga, yoo" wa ziri: ge myid yu" nyid. Nghoid loug we' he: da" moozoo" gi Mangsoo myid loem wigi ab byid: to" moo" nghoid yoomo- zei: ca" da" yoovoin' daloem: nghoid ein: ngoo dazei: nyid.

¹⁸ Hougsu" nghoid ri ngoo gi ce" noem da" amyaid' yo" yu wa lha" ngei bu: lu dang: shid re" nga" da" akhang" ri aci: ziyo'-aphoug" amho' loo: za: ngei bu: lu dang: yo" kho" kyo" khyoo: gi nga" amyaid' nghoid nyid.

¹⁹ Hougsu" nghoid yoomo- ngoo gi hang" da" dei zoo: we' anghoid loo: za: yhoem: seing: koid su: nghoid nyid. Nghoid loug we' byu yi yo" myo: nhoo: myoo: sho' ri- yo" khyoid yu sho'- byu dangain" mo, da" deizoo: ngoo bue" loo bye.

²⁰ Ngoo gi Yuda byu yi jang" moo: moo" zei: nyid da" uri- nyangnu" ri yo" khyoid yu sho'- Yuda byu dayug yhang: ti" bue" nyid. Ngoo nya: gung du: nyang: Moshe da" tarha" khoug: moo: anyid nghoid loug we'- hau: tarha" khoug: mo mo, ri yo" khyoid yu sho'- ngoo gi tarha" khoug: moo: nyid nyid su: yhang: ti" bue" nyid.

²¹ Houg: yo' dakhyoo" ti" tungbau byumyu" yi da" akhoug: moo- moo" zei: nyid uri- nyangnu" ri Khristu jhang khyoo: yo" shu" yu sho'- Yuda tarha" ri acang loo: za: tungbau byumyu" dayug yhang: ti" ngoo bue" nyid.Hidsu" tid ri- ngoo gi Mangso da" tarha" ri acang loo: ein: tid nyid zi anghoid gyeung" nyang: ga: ri- ngoo gi Khristu da" tarha" khoug: moo: nyid nyid su nghoid.

²² Ngoo gi Mangsoo ri loem khau: khyoo: moo- yoem: nu: mo, da" akhoug: moo- vang lo" byoug da" ayo, moo- nyangnu" ri yo" khyoid yu sho'- nyangnu" mo dayug yhang: ti" ngoo bue" nyid. Hougsu" dayham" ri ge' bue" khyo" yo" khyoid yu sho'- ngoo gi byu aja" ja: bang: da" akhoug: moo: nyangnu" yo' dakhyoo" ti" danyid nyid.

²³ Hau: ngei bu: lu dang: yoomo- mainkaid jeju" ri nanu" yo' dage" yo" kham: yu sho'- ein: he: khyoo: ri ngoo cang zei: lo zi nghoid.

²⁴ Gei shi, go" da" pui" moo: dangain" mo, gei shi, goo" nghoid loug we'- byu dayug za: oung: doid lo" da" jhung: shug ri shau" kham: yu nyid khyoo- nanu" dangain" mo, se' nyid gu nghoid bye. Hougsu" nghoid yoomo- nanu" we' oung: doid lo" da" jhung: shug ri yo" kham: yu sho' -gei shi, go" nyid ge'.

²⁵ shi, go" da" pui" vang wa shid re" shi, goo wa soin nyid da" gei shi, sarhi' yi yug khang" moo" gi thain: da" tarha" ri cang byeung" nyid ago". He: byu yi houg: su" koid da" khyoo: gi byo, yoin" loo" se' da" bain: khuang: yo" yu wa shid re nghoid. Nyhang" koem gi pyaid moo: too: moo: byo, yoin" loo" ase' da"- bidmug yo" yu wa shid re" gei shi, go" nyid zi nghoid.

²⁶ Hougsu" nghoid yoomo- ngoo gi gei, loo" wa shid re" ke' to" da" bain: zeing ju" sho'- dain" za: dagei lo" ziyo'- ngoo gi thung" goo" nghoid loug lid' moo: akoem: athoung" pyam da" thung" go" sarhi' phoo, ti" nghoid nyid.

²⁷ Ngoo gi byu gootu: ri gei shi, goo" wa pui" bain' khi: lang" gi nga" gungdu: sugab, amyhi: wigi- khyen: khyo' pyam zi ashoug" wa shid re" ca" jang" moo: yo" ci: yhung: wa shid re" ngoo nyang: ung ri ngoo- yoem: kaid thoung" nyid ziyo'- bain sho nyang: khang" zeung: ci: bye.