1Korinthians 7 - Lacid Common Language Bible

Loxo' Khyoo: Yo' Sen: da" Dang: Myid: Joem.

¹ Akhid" nanu" lhid" kaid da" khyoo: yo' sen: lho: wigi- tid pang kyoo" wa. Yuggi dayug gi ikoin deungkhu: avang ri ge'.

² Nghoid loug we' aved' avhu: koid da" moozoo" soung myo: loo yoomo- yuggi kha: yug we' yhoem: seing: myhi' yoo" ja"- myiyi: yug khang" moo" we' yhoem: seing: phoo, yoo" goo" baja"

³ Yhoem: seing: phoo, gi yoovoin, jo, ziyo' dakhyoo"- yhoem: seing: myhi' yo' zoem" nyid goo" baja"- yhoem: seing: myhi' we' houg: yo' dakhyoo"- yhoem: seing: phoo, yo' zoem" khau: wigi- dayoug wigi: dayoug da" vho: ngei khyoo: ri cang pyeing" byid: nyid goo" baja".

⁴ Yhoem: seing: myhi' gi nya: gung doem: ri ayo" seung: ci- yhoem: seing: phoo, ze daseung: ci- houg: yo' dakhyoo" yhoem: seing: phoo, we' nya: gung doem: ri ayo" seung: ci- yhoem: seing: myhi' ze daseung: ci.

⁵ Nanu" gi shid mo wigi- akyu" mho' wa shid re"- daso, zoo: azoem" goo" loo: nyid wa shid re" myid veing" go" to" da" ayo, lid' lang" gi yhoem: seing: phoo, yhoem: seing: myhi' gung shoo" zoem" khoug: wa shid re"- ajang" pyam goo. akyu" mho' da" ayo, lid' lang" gi doem zoem" khau: nyid ge'. Hougsu" nghoid lang" gi nanu" da" gung doem: ri ayo" khang" yoomo satan gunglau" zi ashoug" goo" baja".

⁶ Hidsu" ein: ngoo tid nyid da" khyoo: gi nanu" ri amyeing" khyo' nyid zi anghoid. akhang" byid: nyid khyoo: za: nghoid.

⁷ Gyeing" nyang: ga: rigi- byu dangain" bang: ri ngoo yhang: ti" nyid nhang: nau zi nghoid. Nghoid loug we' byu yug khang" moo" gi Mangso jang" mo yo" yu da" mainkaid byid: jeju" gi adu, goo- byu dayug yug gi gootu: daja- gootu: dayug gi gootu: daja: ri yo" yu.

⁸ Akhid" gi ikoin deungkhu: avang shi" mo, yo' cougmoo" myhi' yi ri ngoo tid nau khyoo: gi ngoo yhang: ti" yo' xo' nyid lo" rigi: nanu" shid' mo je" ge da" khyoo: nghoid.

⁹ Nghoid loug we'- nanu" da" gung doem: ri ayo" khang" wa nghoid rigi- loxo' lho: ikoin deungkhu: qei" goo" baja". Khasu" wim gari- gung sho" da" nyam, khyoo: ri kham, zo nyid wa gung khoo- loxo' lho: ikoin deungkhu: qei" zigi: je" ge zi nghoid.

¹⁰ Deingkhu: vang bye: bang: ri- ngoo daja: tid too" nau- hau: khyoo: gi ngoo mo anghoid- Aseing mo tid to" khyoo: nghoid- yhoem: seing: myhi' gi yhoem: seing: phoo, ri age to" pyam khoo.

¹¹ Nghoid loug we' nyang: to" too" kho, nghoid rigi- nyang: ikoin deungkhu: avang loo: za: nyid baja" Hougsu" anghoid rigi- akhang: mo yhoem : seing: phoo, yo' doem veing" go" lho: doem zoem" nyid goo" baja" yhoem: seing: phoo we' yhoem: seing: myhi' ri age she: pyam.

¹² Gootu: byu yi ri ngoo tid nau zigi- (Aseing tid zi anghoid loo: za: ngoo tid zigi) Khristain yuggi dayug gi aloem jeung da" yhoem: seing: myhi' yo" wigi- hau: myiyi: gi nyang: yo' xo' nyid wa shid re" myid veung" nghoid rigi- nyang: gi hau: myiyi: ri age, kang" pyam.

¹³ Houg: yo' dakhyoo" ti" Khristain myiyi: dayug gi aloem" jeung" da" yhoem: seing: phoo, to' yoo' eung: nghoid rigi- hau: yuggi gi nyang: yo' xo' nyid shi" wa myid veung" rigi- nyang: gi hau: yuggi ri age kang" pyam.

¹⁴ Khasu" wim gari- aloem" jeung" da" yhoem: seing: phoo, gi loem" jeung" da" yhoem: seing: myhi' yoomo- loem" jeung" loo wa aloem" ajeung" da" yhoem: seing: myhi' we' loem" jeung" yhoem: seing: phoo, yoomo- Mangsoo ri lhoem: yu mo, bue" loo wa zi nghoid. Hougsu" anghoid ri- nyangnu" da" nya: zoo: nya: myid: yi gi aloem" ajeung" mo, nya: zooyi yo' dakhyoo" ti" za: bue" loo" goo" wa zi nghoid. Akhid" koem gi Mangsoo gi Mangso kham: yu moin mo, nanu" bue" lo abye: go.

¹⁵ Nghoid loug we' hau: aloem" jeung" da"- yhoem: seing: myhi' hougsu" anghoid lang" yhoem: seing: phoo gi gang: go" loo" nau ri gang: go" loo" baja" Houg: yhang: te" da" moozoo" moo- Khristain nghoid da" yhoem: seing: myhi' anghoid lang" yhoem: seing: phoo, gi nanu" ri ngei pyoo: myenjham" tung" nyid wa shid re" khe: yu to" zi nghoid bye.

¹⁶ Khristain yhoem: seing: myhi' we"- nang gi re" da" yhoem: seing: phoo, ri ayo" khyoid yu wa ein: khasu" yo" tid nyid lha" Houg: yo' dakhyoo"- Khristain yhoem: seing: phoo, we"- re" da" yhoem: seing: myhi' ri ayo" khyoid yu wa ein: khasu" yo" tid nyid lha"

Mangsoo Khe: Too" Bye: Ziyo' Dakhyoo" Ti" Kangso Dei Nyid ge'.

¹⁷ Byu dayug yo' dayug gi nyang: ri Aseing gam, byid: too" bye: mainkaid jeju" yo' dakhyoo" ti" Mangsoo gi nyang: ri khe: yu ure yo' dakhyoo" ti" xo' lho: wigi: kangso dei nyid goo" baja" he: zigi: phung: khang" moo" ri- ngoo jhoug" byid: da" cang yhe: loo" wa tarha" joem nghoid.

¹⁸ Athang: yham" da" byu dayug khyo" wigi- Mangso khe: yu zi shau" nghoid rigi- athang: yham" da" akhoo: ri ci: akoid ca" loo. Athang: ayham shi" su: ri- Mangso khe: yu zi shau" nghoid rigi- nyang: gi athang: ayham" noo" loo.

¹⁹ Byu dayug athang: yham" ci: ayham" ci: ein: zigi: ce" akhyag anghoid. Mangso amyeing" tarha" ri cang yhe: loo" wa ziza: akhyag: da nghoid.

²⁰ Byu yug khang" moo" gi Mangso khe: yu da" u" mo bue" nyid akhyoo" yo' dakhyoo" ti" za: kangso dei nyid goo" baja".

²¹ Nang gi Mangso khe: yu da" ayo, moo: join, koid nyid su: nghoid la" nghoid ja" ci: aca"- Nghoid loug we' join, mo yo" loid wa akhang" yo" rigi- hau: amyeing" akhang" ri ci: loo" we'.

²² Khasu" wim gari- join danghoid nyid uri:- hau: Aseing wigi: khe: yu zi shoug" su: gi Aseing da" loid byoin byu nghoid bye. Houg: yo' dakhyoo" loid byoin bye: byu dayug nghoid uri:- Aseing khe: yu zi shoug" su: gi Khirstu da" join bue" loo bye.

²³ Nanu" ri Mangsoo gi aphoug" phyed' lho: qei, yu too" mo, nghoid bye: yoomo- byu yi da join akoid nyid loo: goo.

²⁴ Mang: nhung" yi we"- byu dayug yo' dayug gi khe: yu ure da" bue" nyid akhyoo" yo' dakhyoo" ti" Mangsoo yo' zoem" khau: lho: wigi- xo' wigi: kangso dei nyid yab, yhe: loo" ge' o".

Deingkhu: Avang Shi" Bang: Yo' Coung" Moo" Myhi' Yi Dang: Myid:

²⁵ Akhid" nanu" moug soug" lhid" lho: myid: kaid da" ikoin deungkhu: avang shi" bang: khyoo" yo' sen: wigi- hau: Aseing mo pyeung: to" da" dang: ngoo ayoo. Nghoid loug we' Mangso nheig khyeig sho" myen: da" jeju" khoug: moo- loem" jeung" nyid su: dayoug khyo" wigi- ngoo shau" myid yu" khyoo: ri tid kyo" kaid zi nghoid.

²⁶ Akhid" nyang: thoung" shau" nyid da" myid myoo: ung: loug da" khyoo: ri- yu" myang lho: ngoo tid nau da" khyoo: gi yuggi dayug gi nyang: akhid" yo" nyid nyid yhang: ti" yo" nyid nyid rigi: je" ge nyid.

²⁷ Nang yhoem: seing: myhi' yoo" bye: nghoid rigi- kang" pyam wa shid re" amyid nyid, ikoin deungkhu: aqei: shi" su: nghoid rigi- ikoin deungkhu: qei" wa shid mo amyid nyid.

²⁸ Nghoid loug we'- loxo' lho: ikoin deungkhu: qei" bye: nghoid rigi- nang ce: yooboo ayoo"- ikoin deungkhu: aqei" shi" myiyi: dayug yug nghoid rigi- nyang: loxo' ikoin deungkhu: qei" rigi: ce" yooboo ayoo". Nghoid loug we' ikoin deungkhu: qei" bye: bang: nyid" khang" moo" thoung" shoug" wa da" yau: khe" khyoo- nanu" ri athoung" shoug" nhang: noug yoomo- ngoo hidsu" tid nyid zi nghoid.

²⁹ Hau: lho: wigi: Mang: nhung" yi we"- ngoo tid nau nyid da" khyoo gi hidsu" nghoid- ayo, bidnyid myoo" sho' aboo loo- akhid" mo wigi: loxo' bye: da" byu yi gi lo, axo, shi" da" yuggi yi yhang: ti" nyid loo" goo" baja"

³⁰ Ngoug byid ngoug nhab, shau" nyid bang: gi akug ashu: mo, yhang: ti" gauyi ngei pyo: nyid bang: gi agoug ayi loo: nyid bang: yhang: ti" ziyoo soid gain jo, nu" qei, yu ci: bye: bang: gi nyangnu" qei yu ci: bye: da" zi, seing: anghoid mo, yhang: ti" nyid goo" baja".

³¹ Moug: myid mo, soidgain ziyoo, ci: yhoung: nyid bang: gi dangain ziri: seung: ci: wigi- ci" we' Aseing mo, yhang: ti" nyid loo" goo" baja" khasu" wim gari- Akhid" myang nyid da" moug: myid yoosoo" gi ayo, akhyeing: myang" sho' jo, loo: wa zi anghoid.

³² Ngoo gi nanu" ri myid myoo: ung: loug da" khyoo: mo loid loo" wa shid mo vho: ngei nyid. Myi: ayu shi" yuggi, gi hau" Aseing ri gau, yi nhang: noug yoomo- Aseing da" moozoo" moo: nheigloem: zoug jo.

³³ Nghoid loug we' myi: yu bye: su: koem gi yhoem: seing: myhi' vho: da" khyoo: ri goug nhang: noug yoomo- moug: myid yo' sen: da" khyoo: moo: myid, myo: seing" kho" nyid.

³⁴ Houg: yoomo nyang: gi nheigloem: eig gang gyo" jo,- ikoin deungkhu: avang shi" myiyi: anghoid lang"- zoomyi: agyeing" gi Aseing ri nyang: nya: gung doem: gyeungshang: Venyi: yo' nyid baja" ga- ab nung" xoin" to' byid: noug yoomo- Aseing da" mo" zoo" ri yo" myid loin" ziyo'- seing" kho" nyid. Nghoid loug we' yhoem" seing: phoo, yoo" bye: da" myiyi: gi nya: yhoem: seing: phoo, vho: ngei da" khyo" bui" byid: ca" yoomo- moug: myid yo' sen: khyoo: moo: za: myid myo: seing" kho" nyid.

³⁵ He: da" khyoo: ri ngoo tid nau nyid zigi- ngoo nanu" ri pang" thoug noug yoomo nghoid. Ngoo nanu" ri tarha" yo' zei: zeung ci: wa shid re" anghoid. Nanu" ri deingmain" joeb, byeung" wigi- jo da" khyoo: moo: cang so" loo" nhang: nau, tho' moo: gootu- Aseing da" moozoo" moo: teung to" zi aboo loo sho'- bain sho ab nung" xoin" to' pyam nhang: noug yoomo- he: da" khyoo: ri tid nyid zi nghoid.

³⁶ Dang: myid: to" thang: ri- loxo' ikoin deungkhu: aqei" loo: wa ga:- myid too" su: eig youg da" khyoo: gi yuggi gi myidyi: da" atho' moo- ayung" adu khyo"- nya: gung shoo" nyam, da" myid gye" thain: nyid wigi- loxo' ikoin deungkhu: daqei" loo: wa ga: myid vho: nghoid rigi- loxo' yu baja" hau: zigi: youg: noo yooboo anghoid.

³⁷ Nghoid loug we' yuggi gi nya: yhoem: seing: myhi' ayu wa khyo" myid phyed ci: nghoid rigi- nya: nheigloem: ri we' goolhoo: zoo: yo" khang" zeung: ci: wigi- myi: ayu nghoid rigi: ge khyo" zei: khyoo: nghoid.

³⁸ Hougsu" wigi: nyang: nyang: dang: myid: too" bye: myiyi: zoo: yo' loxo' su: gi ge' da" moo" zei: su: nghoid bye. Nghoid loug we' hau: myiyi: zoo: ri ayu loo: nyid su: we'- je ge khyo" koid su: nghoid bye.

³⁹ Lo, bain' xo' yu bye: da" myiyi: myhi' gi nya: yhoem: seing: phoo, dadei nyid nyid gi nyang: yo' xo' zoem" khau: nyid ca. Nghoid loug we' yhoem: seing: phoo, shid: byug bye: nghoid rigi- nyang: vho: da" yuggi hang" yo' nghoid loug we' lo, doem yo" xo'- nghoid loug we' hau: su" lo, doem xo' yu su: gi Khristain phung byu nghoid ca.

⁴⁰ Nghoid loug we' hau: myiyi: gi ikoin deungkhu: avang loo: yo" nyid nghoid rigi- nyang: gi je" nyid pyoo: wa zi nghoid. He: khyo" gi ngoo myid yu" da" khyoo: nghoid ziyo'- ngoo we' Mangso da" Venyi yo" kham: yu su: dayug nghoid ein: loem jeung" nyid o".