1Korinthians 3 - Lacid Common Language Bible

Mangso da" Dei Zoo yi

¹ Gyeing" nyang tid shang ein: rigi: mang: nhung yi we"- Venyi myid boo mo, ri yhang: ti" ngoo yo" tid zi anghoid - he: moug: myid yo' sen: da" byu yi Khristain loem khau: khyoo: moo zoonu" yhang: ti"- ngoo nanu" ri tid sang ca" nyid.

² Akhid" nanu" gi pyeig yau da" thain: zoo: noem ri ayo" zoo: shi" yoomo- thain: da" zoo: noem anghoid loo: za: noug" riza: ngoo nanu" ri dabyid: shi". Akhid" lang" nanu" gi atho' jen" shi" nghoid ago".

³ Houg: su" yoomo nanu" gi moug: myid byu yi khyo" danyid nyid boem shi" yoomo- nanu" nyang: cang" noo" goo" zoo go" ziyo' myeing" myoo: yhoo: she: khyoo: dakoid nyid boem ago". Hau: khyoo: gi nanu" he: moug: myid yo' sen: khyo" kangso dadei nyid shi" ein: da" sagsi: kham nyid zi anghoid goo" la"

⁴ Nanu" mo byu dayug yug gi" ngoo gi Polu da" thang: cang su: nghoid- gootu: dayug gi ngoo gi Apolo thang: cang su: nghoid ga- tid nyid shi" rigi- nanu" gi moug: myid byu yi ti" kangso dadei nyid shi" anghoid goo" la"

⁵ Tid shang ein: rigi- Apolo gi hang" nghoid la" Polu gi hang" nghoid la" Ngoonu" gi Mangso dei zoo: yi za: danghoid nyid boem ziyo' nyang: tu: nyang: ri byid: to" da" moo" ri zei: nyid mo, za: nghoid. ngoonu" khyo" wigi- nanu" Mangsoo ri shau" loem" jeung" loo goo" baja"- khyoo: shid' shu" vhu" shi: bang: za: da nghoid. Hougsu" nghoid yoomo ngoonu" dayug yo' dayug gi Aseing wigi: nyang: tu: nyang: ri byid: to" da" moo" voin mo, nghoid.

⁶ Ngoo gi myoug: shi" sain" lho: Apolo gi gyid shoin"- Mangsoo wigi: dayoug loo nhang.

⁷ Houg: yhang: ti" sho" too" su: yo' gyid shoin" su: gi ci" we' anghoid- youg gyi: loo nhang: da" Mangsoo za: akhyag zeing nghoid nyid.

⁸ Amyoug: ri sain" kaid su: yo' gyid shoin" su: eig yug gi ci: shai" go" khyoo: ajo, Mangsoo gi byu dayug yo' dayug ri- nyang: tu: nyang: yoem: kaid zei too" bye: ziyo' dakhyoo" ti" coung" nghei ngi: shab, jhung: shug ri byid: wa zi nghoid.

⁹ Khasu" wim gari- ngoonu" gi Mangso shid re" moo" zoem" zei: bang: nghoid nyid boem". Nanu" gi Mangso da" tung yoo yoothung" yo' Mangso da" zhoo" cuang vo phang yhoem: we' nghoid nyid ago".

¹⁰ Mangsoo ngoori: byid: da" jeju" jhung: shug ri ci: lho: gye" se' da" yhoem: zhoug lag sama phoo yhang: ti" ngoo gi apoem: ayang: ri qei" too" byid: bye. Gootu: byu dayug yug gi hau: da" apoem: moo: doem bo zhang qei" do, lo" nyid nghoid loug we' zhang qei" do, loo" mo, dayug yo, dayug gi nyang: tu: nyang: khasu" zhang qei" do, lo" nyid ziri:- zid" lhid' nyid goo" baja".

¹¹ Khasu" wim gari- Mangsoo gi Yesu Khristu ri dayug kyeung" da" apoem: nyang: mo, ayang: qei" too" bye: ziyo'- gootu: apoem: ayang: yo" qei" too" loo: wa zi anghoid.

¹² Byu dayham" gi hau: apoem: ayang: da" atho' moo- ngei sheing: lug nyoug joem yo' zhang qei" do, loo" goo" wa nghoid. Byu dayham" gi seig- mhain"- khoofoo:- yo' zhang qei" do, loo" goo" wa nghoid.

¹³ Byu yug khang" mo" da"-zhang qei" do, lo" khyoo: ge age ein: da" khyoo: gi Khristu da" bidnyid moo: thoid pang shug wa zi nghoid. Houg: su" kyeung shoug loo wa nghoid yoomo- hau: myi: gi byu yug khang" mo" da" moozoo" ge age ziri:- nghe, kyeung shug wa zi nghoid.

¹⁴ Hau: da" apoem: ayang: moo: doem poug zhoug do, lo" da" zi joem gi myi: moo: nghe, kyeung yu" ri ange" lo" nghoid rigi- poug lho: bo, zhoug do, loo" su: gi vhu" kung: phoug" yoo" wa zi nghoid.

¹⁵ Nghoid loug we' byu dayug yug da" moozoo" nge" joem: lo" nghoid rigi- nyang: soem" lo" byug wa nghoid. Nghoid loug we' myi: gyi mo yo" xue: yu yhang: ti" nya: gung du: za: khyoid yu zi shoug" wa.

¹⁶ Nanu" koem gi Mangso da"- noku yhoem: nghoid nyid wigi- Mangso da" Venyi gi nanu" moo: bo ziri nanu" asi' loo: goo" la.

¹⁷ Houg: yoomo byu dayug yug gi Mangso da" noku yhoem: ri lhu: phyo' lhu: shoin' nyid nghoid rigi- Mangsoo gi hau: yug ri phyo' shoin pyam wa. Khasu" wim gari- Mangso da" noku yhoem: gi young" lho, zi nghoid wigi- nanu" nyang: hau: noku yhoem: nghoid nyid ago".

¹⁸ Hang" nghoid loug we'- nyang: gung nyang: ri amhau, nyid goo- nanu" mo byu dayug yug gi he: moug: myid da" zhang khyo" soin: lho: nyang: nya: gung ri phajhi" boo su: nghoid ga- si' boin" nyid nghoid rigi- gyeing" nyang: phajhi" boo su: bui" wa shid re" akoo" apyoid da" byu bui" ca" nyid.

¹⁹ Khasu" wim gari- he: moug: myid tho' moo- phajhi" bo, da" ga: jho: nyid khyoo: gi Mangso shid moo: ce" akhyoo" abo, da" khyoo: za: nghoid nyid. Hau: jhoem: mungdang: moo: tid to" ziyo' dakhyoo ti" Mangsoo gi ung: yeig phajhi" boo mo, ri- nyangnu" da" phajhi" moo: myi" ye" jo, nhang- ga: wigi: tid to.

²⁰ Hau: lho: gootu: da" jhoem: mungdang: moo: we' phajhi" boo bang: myid da" khyoo: gi ce" aphoug" adab, da" khyoo: ri- Hau Aseing gi se' nyid ga: wigi: lhid" to".

²¹ Hougsu" nghoid yoomo hang" nghoid loug we'- byu wigi: yo" koid da" yoem: ri myonhoo: age, shoo:- gyeing" nyang: ga: rigi- jo, moo: jo, ri- nanu" seung: nyid bye: zi nghoid.

²² Polu we' Apolu we' Kepha we'- he: da" moug: myid we' kangso dei nyid ziyo' shid: lo" khyoo: we'- akhid" jo, da" zi yo' thang: phyang" ju" loo wa da" khyoo: joem we' jo, moo: jo, ri nanu" seung: ci: bye.

²³ Khristu gi nanu" ri seung: ci: wigi- Mangsoo gi Khristu ri seung: ci.