1Korinthians 2 - Lacid Common Language Bible

Pyang" Zeing Tho' Moo: Jen" Too" shau" da" Khristu Yo' Sen: Mungdang:

¹ Hougsu" nghoid yoomo mang: nhung" yi we"- Mangsoo yhoem" to" da" mungdang: tid kyoo" wa shid re" ngoo nanu" jang" moo: ju" re" uri- gye" no, da" dang: khoin" joem, yo' phajhi" yo' sen: da" dang: zeing khoin" joem ri ngoo aci.

² Khasu" wim gari- ngoo nanu" yo' nyid da" ayo, moo: Yesu Khristu da" khyoo: ri je" wigi- pyang" zeing tho' moo: Aseing shid: kham: tho' mo, jain" wigi- khyoo: goo tu: jo, moo: jo, ri to" myhed, pyam wa shid re" ngoo myid phyed' pyam bye.

³ Houg: yoomo ngoo nanu" jang" moo: re" ju" nyid da" ayo, bain sho moo- yoem: nu: ziyo' gyoug nain" zoore" danyid nyid.

⁴ Ngoo tid kyo" ziyo' kho" kyo" da" mungdang: joem ri- byu yi da" phajhi" akhyoo" again ri aci: loo: za: Mangso Venyi da" yoem: vhoo" ri- bang da" sagsi: joem yo' ngoo kho" kyoo" bye.

⁵ Houg: yoomo Mangsoo ri nanu" loem" jeung" lo da" khyoo: gi byu yi da" phajhi" moo: nghe: kau: khyo" anghoid loo: za: Mangso da" yoem: so' moo: nghe: khau: nyid zi nghoid.

Mangso Phajhi" Juyhi: da" Khyoo:

⁶ Nghoid loug we' ngoo gi Venyi: moo: nheig boo ung: gyeing: bye: bang: rigi- phajhi" mungdang: yo' tid kyo". Nghoid loug we' hau: zigi: he: moug: myid yo' sen: da" phajhi" anghoid. Moug: myid tho' mo zau: ludaid' yi da" lasi, laleig gi bei: lo" koung" nyid bye.

⁷ Ngoo kho" kyo" da" phajhi" gi moug: myid byu yi asi' loo: sho' yhoem" to" da" Mangso no, thang phajhi" khyoo: nghoid- hau: zigi: moug: phain" myid aphain" shi" mo ngoonu" myonhoo: phung" yoeb, yo" kham: yu wa shid re" Mangsoo khyen: yu too" bye: zi nghoid.

⁸ Moug: myid tho' mo zoug: khokham yi hang" nghoid loug we'- he: da" lasi, laleig ri yo" se' zi anghoid. Dato, se' boem nghoid rigi- myonhoo: phung" yoeb, bo da" Aseing ri- nyangnu" gi pyang" zeing tho' moo: baid' jen" said pyam wa zi anghoid.

⁹ Nghoid loug jhoem: mungdang: moo- hang" we' amyang yu" ashoug" gyo: yu" da" khyoo: bue" loo wa zi nghoid ga: wigi- Hang" amyid, ju" da" khyoo: ri- Mangsoo gi nyang: ri jheddab bang: shid re"- nyheung too" bye ga: lhid" to".

¹⁰ Nghoid loug we' Mangsoo koem gi nya: da" Venyi: khyo" wigi- nya: da" nghoeb, yhoem" to" khyoo: ngoonu" ri phang shug bye. Hau: da" Venyi gi ziyoo jo, moo: jo, ri za: we' anghoid- Mangso da" no, thang khyo" myid soin: to" khyoo: joem ri- cang phoid: sho: yu" nyid.

¹¹ Byu dayug da" nheigloem: moo: bo da" khyoo: dangain" ri- hau: Venyi wigi: za: yo" si' byid: nyid. Houg: yo' dakhyoo" ti" Mangso da" Venyi wigi: za: Mangso khyoo: dangain" ri yo" se' nyid.

¹² Ngoonu" koem gi he: moug: myid yo' sen: da" Venyi: ri shau" kham: yu bye: zi anghoid- Mangsoo ngoonu" ri byid: to" da" jeju" dangain" ri yo" si' baja" ga- Mangso nhang: kaid da" Venyi ri ngoonu" yo" yu mo, nghoid nyid.

¹³ Houg: yoomo Venyi: ri shau" kham: yu ngoonu" yo" yu mo, nghoid nyid. da" deing: byeung" khyoo: joem ri- kho" kyo" nyid boem uri- ngoonu" gi byu yi da" phajhi" dang: yo' atid loo: za: Venyi wigi: jhoug" byid: da" dang: joem yo' dakho" kyo" nyid boem.

¹⁴ Hau: Venyi khyo" kangso adei mo, hang" nghoid loug we'- Mangso Venyi wigi: byid: da" jhung: shug ri ashau" kham: yu boem. Hau: gu: gi nya: shid re" akoo" apyoid da" khyoo: za: nghoid wigi- Venyi nheigloem: wigi: za:- hau: khyoo: ri yo" tid pang byid: nyid yoomo- nyang: gi hau: gu: ri se' gyoo: su: anghoid.

¹⁵ Venyi boo su: koem gi ziyoo jo, moo: jo, da" aphoug" ri yo" phyed' byid: nyid. Nyang: ri koem gi hang" we' aphoug" yo" phyed' byid: zi anghoid.

¹⁶ Jhoem: mungdang: moo- Khayug gi hau" Aseing myid' to" khyoo: ri- yo" si' byid: wa la" khayug gi nyang: ri phajhi" yo" byid: wa la" ga: wigi: lhid" to" ziyo' dakhyoo" ti" nghoid. Ngoonu" koem gi Khristu da" myid to" khyoo: ri yo" yu mo, nghoid bye.