1Korinthians 11 - Lacid Common Language Bible

¹ Hougsu" nghoid yoomo- ngoo gi Khristu da" khoo" shid: ri cang lo yhang: ti" nanu" we' nga" da" khoo" shid: ri cang nyid ge'.

Noku da" Ayo, Moo: Vhu" Loem' Nghoeb, Ci: Khyoo:

² Nanu" gi khyoo: khaid gu: khang" moo" moo: ngoori: boin: so" nyid wigi- ngoo nanu' ri byid: too" bye: da" jhau" mho' thui'- nanu" cang zei: lo nyid boem bye: yoomo- ngoo nanu" ri coung" byid: nau.

³ Nghoid loug we'- yuggi yi dangain" bang: da" vhuloem gi Khristu nghoid nyid. Myi yi: yi da" vhuloem koem gi yuggi yi nghoid. Khristu da" vhuloem gi Mangsoo nghoid nyid da" khyoo: ngoo nanu" ri se' gyoo: nhang: nau.

⁴ Yuggi yi kha: yug we'- akyu" mho' nyid uri- hougsu" anghoid lang" shava noku phung moo- Mangso mungdang: kho" nyid uri- vhuloem moo: nghoeb, ci: nghoid ri- Khristu da" myonhoo: phung" yoeb, ri phue: loo" nhang: zi nghoid.

⁵ Myiyi: yi kha: yug nghoid loug we'- akyu" mho' nyid uri- hougsu" anghoid lang" shava phung: moo: Mangso mungdang: tid nyid uri- vhuloem ri anghoeb, ci: loo: koid nghoid rigi- yhoem: seing: phoo, da" myonhoo: ri phue: loo" nhang: nyid ziyo'- vhu" dung: dung: pyam da" myiyi: yo' ci: ashai" loo: nghoid da.

⁶ Myiyi: yi, gi vhuloem ri anghoeb, ci: wa nghoid rigi- xam: ri we' pyoid pyam goo" baja" nghoid loug we' xam: ko' pyam wa anghoid lang" gi vhu" dung: dung: pyam zigi- myiyi: yi sho' ja: nghoid yoomo- nya: vhuloem ri nghoeb ci: baja".

⁷ Yuggi yi gi Mangso da" myonhoo: phung" yoeb, ri thu' loo nhang: mo, nghoid nyid boem yoomo- vhuloem moo: nghoeb, ci: anoo"- myiyi: zoo: gi yugge da" myonhoo: phung yoeb ri thu' loo byid: nhang: nyid su nghoid.

⁸ Khasu" wim ga: ri yuggi gi myiyi: mo phain" to" zi anghoid- nghoid loug myiyi: gi yuggi mo, phain" to" zi nghoid.

⁹ Hau: yuggi gi myiyi: shid mo, phain" to" zi anghoid- myiyi: ri gi yugge, shid re" phain" to" zi danghoid.

¹⁰ Hau: moug: khung: lagyoo: yi yoomo- myiyi: zooyi gi vhuloem ri nghoeb ci: ca"- hougsu" koid da" khyoo: gi nyang: nya: da"- yhoem: seing: pho, da" vhoo: moo: nyid nyid ein: da" alhoo: again, ri toin" shid' nyid zi nghoid.

¹¹ Nghoid loug we'- hau: Aseing khoug: moo: myiyi: yi gi yuggi yi moo: nghe: khau: nyid ziyo' dakhyoo" ti"- yuggi yi nghoid loug we'- myiyi: moo: danghe: khau: nyid.

¹² Khasu" wim ga: ri myiyi: gi yugge, jang" mo phain" to" zi nghoid loug- yuggi gi myiyi: mo khu: lo zi nghoid. Hau: tho' moo: gootu:- jo, moo: jo, ri bue" loo nhang: su: gi Mangsoo nyang: nghoid bye.

¹³ Myiyi: gi vhuloem ri anghoeb, ci: loo: za: noku joyoo moo: akyu" mho' nyid rigi- du, la" ein: ziri: nanu" myid, phyed' yu ge'.

¹⁴ Yuggi gi xam: sheing: to" ri nya: myonhoo: soem" joyoo nghoid ziri: xangsu: nyid yab, lo da" tarha" wigi: nanu' ri jhoug" byid: nyid.

¹⁵ Nghoid loug we'- myiyi: gi xam: sheing: to" nghoid rigi- nya: da" young" lho, khyoo: nghoid nyid. Nya: da" xam: sheing: gi nya: vhuloem ri nghoeb, too" wa shid mo byid: to" zi nghoid.

¹⁶ Nghoid loug we' byu dayug yug he: khyoo: yo' sen: lhoo: wigi- kyo, too" nau nghoid rigi:- ngoonu" moo: we' Mangso da" phung moo: we'- noku coung" nghei phung moo: houg: te" vhuloem ri nghoeb, da" thung" mo lai wigi- gootu: aboo loo" ein- ngoo hau" yug ri tid wa nghoid.

Aseing da" Myen" Xoin: Zoo: Phung

¹⁷ Nanu" da" noku coung" nghei da" zoeb, phung: gi deingmain" ziyo' akyu" yoo" wa khyo" phoung nyid zi anghoid loo: za: akyu" yoem" wa khyo" phoung nyid boem yoomo- vhoo: moo: tid to" da" khyoo: joem moo- ngoo nanu" ri acoung" byid: noug.

¹⁸ Xang: shid" moo- nanu" da" phung: khoug: moo: tu: lhoin" thoutheung da" zoeb, phung nghoid ziri: ngoo shoug" gyo. Hau: jang" moo: nyid mo, dayham" rigi: ngoo myid loem.

¹⁹ Houg: mo gam, thu' loo" mo, kha: phung: bang: gi jo shoid khyoo: yab, bang: nghoid ein: da"- deingmain" khyoo: gi bang bang nyang: myang loo wa shid re"- nanu" moo: kho' gam, gang: go" lo" zigi: nyid gu, nghoid.

²⁰ Nanu" dage" zoeb, phoung: nyid shi" ri- hau: Aseing da" myen" xoin: zoo: pue" shid re" phoung nyid boem zi anghoid.

²¹ Khasu" wim gari- nanu" zo: nyid uri- nyang: tu: nya: zoo: noem, ri nyang: boug" zo: ago- dayham" bang: gi zooyoid boem wigi- houg su" shoug yed: zo yed koid nyid ago".

²² Zoo: wa shug wa shid re" nyang: tu: nya: yhoem: ayoo" goo" la" Hougsu" anghoid lang" gi Mangso da" phung ri aphoug" amyang:- juang" yi wigi- asho" ajhen: bang: ri- sho' thu nhang: goo" wa la" Ngoo nanu" ri he: khyoo: yo' sen: lho: wigi- ce: noem tid wa ein: jho: nyid go" la" Ngoo nanu" ri coung" byid: goo" wa la" Gyeing" nyang: ngoo nanu" ri coung" byid: wa zi anghoid.

²³ Khasu" wimgari- akhid" ngoo nanu" ri- byid: kaid da" jhoug" myeing" jhoug" thui: gi hau: Aseing jang" moo ngoo yo" kham: yu khyoo: nghoid. Hau: zigi: gyivoo joem da" lo, moo: ab byid: pyam zi shoug" wa da" myen" ri- Aseing Yesu gi zooyho, ri yu lho: wigi-

²⁴ Jeju" bain coung" nghei lang"- zooyho, ri ajab, amoin" koid lho: he: zigi: nanu" shid re" byid: pyam da"- nga" gung doem: nghoid- ngoori: daboin: nyid wa shid re" hid: su" koid ge ga: tid.

²⁵ Houg: yo' dakhyoo" ti"- myen" xoin: bain, zoo: lang"- goem ri we' yu wigi- he: da" goem gi nga" suid" yo' zhoug to" da" Mangso dang: thang cab, seig nghoid- he: ziri: shug khang" moo" nanu" ngoori: daboin: nyid wa shid re" hidsu" koid nyid ge" ga: tid.

²⁶ Nanu" gi he: zooyho, ri zo: wigi: he: goem mo shug khang" moo" hau: Aseing shid: kham, da" khyoo: ri- nyang: doem ju" re" da" bidnyid ju" sho sagsi: kham, shoug nyid da" khyoo: nghoid.

²⁷ Hougsu" nghoid yoomo- hang" nghoid loug we'- amoin: ayi" ziyo' Aseing zooyho, ri zo wigi- goem mo, shoug nghoid rigi- hau: Aseng: da" gung doem: yo' suid" ri shoid' vhang: da" yooboo yoo" bye.

²⁸ Houg: yoomo- hang" nghoid loug we'- nyang: tu: nya: da" gung ri xang: shid" myid soin: kho' yu" lho: wigi- hau: zooyho, zo: lho: goem' ri shug baja".

²⁹ Ci: yoomo gari- hau: zooyho, ri zo: lho: hau: goem ri shoug uri- Hau: Aseing gung doem: da" dang: kang: ri ase' gyo: su: gi nyang: tu: nyang: ri dang: phyed zi shoug" wa khyo" zo: shoug nyid zi danghoid.

³⁰ Houg: yoomo nanu" moo: yoem: neung: lo" ziyo' noo phyoo" jamjau shau" lho: shid: lo" zi we' myoo" sho' mo, bo abye: go.

³¹ Ngoonu" gi nyang: tu: nya: gung doem: ri xang: shid"- myid phoid: sho: soin: kho' yu" boem nghoid rigi- Mangso wigi: jeyang: dang: phyed' zi shoug" wa anghoid.

³² Nghoid loug we'- ngoonu" gi Aseing da" lo, wigi:- dang: phyed noo, kham' zo: khyoo: gi moug: myid byu yi yo' dage" dang: phyed zi ashoug" wa shid mo nghoid nyid.

³³ Houg: yoomo nga" mang: nhung" yi we"- Aseing da" myen" xoin: zoo: phung moo: bo loin" wa shid re"- nanu" zeung: foem: nyid boem rigi- nyang: cang nyang: lang" go" nyid ge'.

³⁴ Hougsu" Aseing da" zoo: shug phoung bo loin" wa shid re"- nanu" zeung: foem: nyid uri- Mangso wigi: dang: phyed zi ashoug" baja"- byu dayug yug zooyoid nyid nghoid rigi- nya: yhoem: moo: lo" zo: yu baja" gootu: ca" da" khyoo: joem rigi- ngoo ju" ri lang"- tid kyo, shang: pyam wa nghoid.