1Korinthians 10 - Lacid Common Language Bible

Phara" Soolhoo: No" Ziyo'' Sen: Lho: Zed" Lhid' Nhang: Khyoo:

¹ Mang: nhung" yi we"- Moshe thang: moo: cang lo da"- ngoonu" phoug" phyid" yi moo: ce: noem bue" loo bye: khyoo: ngoo nanu" ri tid poin" nau. Nyangnu" dangain" ri jhoem" moug" khoug: khyo" shu" lo wigi- gyid, thoem" ni, ri we' pyoo" pyoo: za: yo" gu: lai lo boem bye.

² Nyangnu" gi hau: jheom" moug" yo' Panglai moo: Babtisma zheung: kham, yu ziyo'- Moshe da" thang: cang bang: bue" lo boem bye.

³ Nyangnu" dangain" bang: gi Venyi: zooyho, daja: ri za: zheung: coem, zo: lho: Venyi shug phoo" daja: ri za: coem, shoug lo boem.

⁴ Nyangnu" gi nyangnu" yo' dage" so" lo da"- Venyi lung moo" boem' mo gyid ri shoug" shoug ago". Hau: Venyi: lung: moo" boem gi Khristu nyang: nghoid bye.

⁵ Nghoid loug we'- nyangnu" mo, myoo: loo boug ri- Mangsoo ayu" noug yoomoo- nyangnu" da" shid: mang joem gi siyoo khoug: moo: leung yoin" to.

⁶ Akhid" he: da" khyoo: dangain" gi nyangnu" koid ziyo' dakhyoo" ti" age, da" khyoo: ri ngoonu" age, myono, ziyo'- ngoonu" nyangnu" dayham" bang: yhang: ti"- phara" soolhoo: ri abo no" wa khyoo- ngoonu" ri yu" gyoug yu" ci, wa da"- khoo" shid: toin" shid too" bye.

⁷ Hau: tho' moo: gootu- jhoem: mungdang: moo: byu yi gi zo: shug pui" daloem: moo: zhoung: jo, lho: zo: shug go" nyid uri: hau" zoo: pui" gi zo: lai shoug lai wigi- aved, avhu: moozoo" khyoo: phoug loo" bye ga: tid to.

⁸ Nyangnu" dayham" gi aved, avhu: moo" ri zheung: zei: wigi- danyid" dam, byu- 23000 shid: joem: lo" beom yhang: ti" abui" sho'- ngoonu" gi aved avhu: youg: shoo: go" moozoo" koid yoomo yooboo dab, bang: bui" lo" ja".

⁹ Nyangnu" dayham" gi hau: Aseing ri jham" ca: yu" boem yoomo- lhang: myu, thei" said' pyam zi shau" boem yhang: ti" ngoonu" gi hau: Aseing ri ge' jham" ca: yu boem wa zi anghoid.

¹⁰ Nyangnu" dayham" bang: gi nheig yoo: nheig jhug koid boem yoomo shid: zau: lagyoo: pho, da" lo, yo' lhu: phyo' shoin' pyam zi shau" boem yhang: ti ngoonu" gi nheig yoo: nheig jhug akoid' goo ja.

¹¹ Hid: yhang: te" da" khyoo: myoo" sho' nyangnu" jang" moo: bue" lo da" khyoo: gi byu yi gootu: bang: yu" kyi" lho: khoo" shid: bue" wigi- ngoonu" ri tid poin" zid" nhang: wa shid re" lhid" to" zi nghoid. Khasu" wim ga: ri ngoonu" gi moug: myid apyaid' thang loo" wa da" ayo, moo: re" nyid eung: bang: nghoid nyid boem.

¹² Houg: su" nghoid yoomo- byu dayug yug gi nyang: tu: nya: da" gung ri- ngoo gi geing: geing: teing teing yo" yab, jo, su: nghoid ga: myid su: gi nyang: aleung loo" wa shid mo zed' lhid' nyid ca.

¹³ Nanu" thoung" shau" yu" da" agung alau" gi byu hang" we' thoung" shau" yu" ja: za: date: nghoid. Nghoid loug we' Mangsoo gi dang: zung" Aseing nghoid nyid yoomo- Nanu" atho' kham' wa yhi' da" agung" alau" jham" ca: yu" khyoo" gi shoug" nhang: wa zi anghoid. Houg: su" jham" ca: yu" zi shau" nyid da" ayo, moo- yo" zeung: kham, wa da" yoem: so' byid: lho: wigi- houg: mo yo" loid thu' loo" wa da" khyoo: nyang: nyheung byid: wa nghoid.

¹⁴ Houg: yoomo ngoo jheddab mo, we"- phara" soolhoo: no" da" khyoo: ri jang" pyam nyid ge'.

¹⁵ Nanu" ri phug soo" lheig se' myid yu" da"- phajhi" boo mo, ri yhang: ti" ngoo tid nyid zi nghoid. Ngoo tid nyid dang: khoin" joem ri nanu" nyang: gyo: tu, yu" ge'.

¹⁶ Ngoonu" gi Mangso jeju" ri coung" nghei lho: wigi- Aseing da" myen" xoin: zo: da" zoeb, phung: mo goem ri yu shoug nyid uri- Khristu suid" yo' zoem" khau: da" khyoo: nghoid. ngoonu" gi zooyho, ri we' ajab, amoin" phe, yu lho: hau: ziri: zo: da" ayo, moo- ngoonu" gi Khristu da" gung doem: yo' zoem" khau: da" khyoo: nghoid.

¹⁷ Khasu" wim gari- zooyho, dakhi, kyeing" za: dajo, ngoonu" myoo" sho' nghoid nyid boem loug we' gung doem: daloem: za: danghoid nyid boem.

¹⁸ Khasu" wim ga: ri ngoonu" myoo" sho mo, gi zooyho, daloem: mo za: coem, gam, zoo: bang: nghoid boem bye. Israela byumyu" yi ri myid yu" ge'- phoin: tho' moo: xoin" to' byid: da" shoo" ri zoo: bang: gi hau: phoin: moo: dei dei mo, mo zoem" khoug: su: yo' dayug za: anghoid la"

¹⁹ Ngoo hidsu" ein: tid zigi- phara" soolhoo: yo' phara" soolhoo: ri- zoo: noem daja: ja: akhyag bo ein: tid nau zi anghoid.

²⁰ Anghoid o"- tungbau byu yi da" phoin: tho' moo: to' byid: da" xoin" gi Mangsoo ri to' byid: da" xoin" anghoid- yu joem ri to' byid: da" xoin" danghoid ein: ngoo tid zi nghoid. Ngoo gi nanu" ri yu joem yo' zoem" khau: nyid mo, abui" nhang: noug.

²¹ Nanu" gi hau: Aseing da" goem mo shoug lho: wigi- yu joem da" goem' mo doem ge shug wa zi anghoid. Hau: Aseing da": zoo: bui" mo we' yu joem da" zoo: bui" mo we' dage" age shoin" zoo.

²² Houg: su" anghoid lang" ngoonu" gi Aseing ri yu" noo" nhang: nyid zi anghoid wa goo" la" Ngoonu" gi hau: Aseing tho' mo yoem: je bo ein: myid nyid goo" la"

²³ Nyangnu" gi"- ngoonu" gi ce" ja: nghoid loug we' koid wa da" akhang" yo" ga: tid ago". Houg: gi: deung nyid nghoid loug we' koid wa akhang" yo" nghoid loug we' dangain" gi akyu" bo la"

²⁴ Nanu" kha: yug nghoid loug we' nyang: tu: nya: da" akyu" ri ashoo: loo za byu gooji yi da" akyu" ri shoo: byid: nyid boem ca.

²⁵ Nanu" da" phyiri: phala se' soin: yu" da" emyid yoomo- dang: myid: aja: ja: ri amyid: nyid loo: za: kid" moo: oung" to" shoo" ri ayi" loo: yo" qei, zo.

²⁶ Khasu" wim ga: ri moug: myid yoosoo" yo' dage" houg: moo: nyid nyid mo, gi hau: Aseing shid re" za: nghoid nyid, ga: wigi: jhoem: mungdang moo: tid to.

²⁷ Aloem akhau: da" byu dayug yug gi nanu" ri doo" zhoo" wa shid re" khe: nghoid rigi- nanu" yhi: nau rigi: yhi: ge phyiri phala emyid yoo" mo myid: phed: sho: khyoo: aboo loo za: nanu" da" shid khoin" moo: soin' byid: gu: dangain" ri zoo: ge'.

²⁸ Nghoid loug we' byu dayug gi he: zigi: phara" joem ri xoin" to' byid: zi nghoid, ga: wigi: nanu" ri tid kyoo" bye: nghoid rigi- tid lham, pyam bye: yoomo we'- phug soo" lheig myid yoomo we'- hau: ziri: azoo: loo: goo.

²⁹ Hidsu" ngoo tid nau nyid zigi- re" da" phug soo" lheig myid yu" da" emyid, ri tid nau zi anghoid- gooji yi da" phug soo" lheig da" e" myed, ri tid nau nyid zi danghoid. Nghoid bye: nanu" mo byu dayug yug gi nga" da" yo" koid wa loid byoin da" akhang" ri- byu gooji yi da" phug soo" lheug nheigloem: wigi:- ci: yoomo yo" toung" pyam wa la" ga: myid: lo boem goo" wa nghoid.

³⁰ Nga" da" zoo: noem shid re"- Mangsoo ri ngoo jeju" coung" nghei nghoid rigi- ngoo se' coung: nghei, bye: zoo: noem yoomo- khasu" wigi:- byu dayug yug gi ngoori pyi: shoo: wa lha"

³¹ Houg: yoomo nanu" zoo: nghoid loug we' shug nghoid loug we'- Mangso da" myonhoo: phung" yoeb, ri yo" thoin" pang byid: wa shid re" dangain" ziri: zei: so' nyid ge'.

³² Yuda byumyu" yi shid re" we'- Greek byu yi shid re" nghoid loug we'- Mangso phung da" shid re" we'- thoung" thue: leung jang: abui" wa shid re" kangso dei nyid ge'.

³³ Xangsu: byu yi nyid moo:› nyid bang: gi khyoid yu zi shoug" goo" baja" ein:- nga" shid re" amyid loo: za: nyid moo: nyid bang: da" akyu" ri sho: zoore"- subi" vho: ngei sho' ngoo yoem: kaid zei: nyid. Nanu" we' ngoo yhang: ti" zei: so' nyid ge'.