تیتوس 3 - کتاب مقدس به زبان لکی - گویش مرکزی

اَرِه هر کار خوئی حاضر بو

¹ بارَ ویرو گه فِربوبَر حکِمرونَل ئو صائای‌قدِرتَل بوئن ئو اَژینو فِربو بیَرِن، ئو اَرِه هر کار خوئی حاضر بوئن.

² گَنی کس نوشِن، جنگَری نوئن بلکِم مِلوم بوئن ئو وَه‌گَرد کُل مردِم وَه فِروتنی کاملا رفدار بِهَن.

³ اَرِیَگه ایمِه‌یش ووژمو زمونی نایو، کورفِربو، اَژرئی‌اِرهاتی، بَنَه کُلِ جور شَوَت ئو هُواوهوس بیمو ئو اِ کینَت ئو حَسوئی زِنِه‌یمونَ مَهَرد، مردِم اژ ایمَه بیزار بین ئو ایمِه‌یش اژ یَکتِری بیزار بیمو.

⁴ مِنتائای وخدی مِرِبونی نجاددهندَه‌مو خدا، ئو مِحبتی اَر بشر، آشگار بی،

⁵ او ایمَه نجاد داتی، نه وَه خاطر کارَلی گه اِ صالح‌بیئینمو کِردیَ، بلکِم وَه خاطر ریَمَت ووژ بی ئو اژ رئی خُسِلی گه وَه‌سونگَ اَوا، روح‌القدس تولد تازَه ئو زِنِه‌ی نوو بَشخیتیَ بینمو.

⁶ گه خدا وَه‌سونگَ نجاددهندَه‌مو عیسی مسیح، وَه دولَمَنی روح‌القدس رِشونی‌ اَر سرمون‌اِرا.

⁷ تاگَه وَه فیض او صالح وَه حساو بایم ئو مِطابق امید اَر ژییاین ابدی بوئیمَ وارثَل.

⁸ ایی قصَه ماو اِتِمادَ بی کِینی، ئو اژ تونمَ مِ بِجُرّین‌ اَر ایی چیئِلَ، تاگَه کسَلی گه ایمونو آوِردیَس اَر خدا حُواسو بو گه ووژو وَخم کارَل خو بِهَن. ایی چیئِلَ اَرِه مردِم فادَه‌ دیری ئو خوءَ.

⁹ مِنتائای اژ چِنَه‌ل مِفتی گه اژ اَخمَخیِن ئو تَجِرَنُامَه‌ل ئو بَثَل ئو مِرافَه‌لَ اَر سر شریعت، دویرا بِگِر، اَرِیَگه یوئنَ بی‌فادَه ئو بی‌ارزشدِن.

¹⁰ وَه کسی گه فَساتیَ مِهِه، یِه گِل دُماخِرِ دو گِل هُشتار بیَ، اژ اَوِءِ دُما دیَر قط خدافظیَ گَرد بِهِیتی.

¹¹ اَرِیَگه مَذانین هُنَ کسی فاسد ئو گناکارَ، او ووژ، ووژ مَکومَ مِهِه.

پَنَل آخِر

¹² وخدی آرتِماس یا تیخیکوسِم کِل‌کِرد اَرِه تَکِت، تقِلا ووژِت بِهَه گه باین اَرِه تک مِن اِ شیَر نیکوپولیس، اَرِیَگه قَصِم کِردیَ زِمِسون اَر اورَه سر کَم.

¹³ تا جای گه مَتونین زیناسِ وکیل ئو آپولُس اِ سفری گه ها نوائون‌اِر یاری دَ، حُواسِت بو چیونی کمِ‌کسر ناآشدوئی.

¹⁴ بیلا مردِم ایمَه، بِگِرِنا گه ووژو وَخم کارَل خو بِهَن، ئو اَرِه هَوَجَه‌ل عمدَه تیارِک بوئینِن ئو بی‌ثمر نوئن.

¹⁵ کسَلی گه هانَ گَردِم، کُل سِلامَ مَرَسِنِنَ بینِت. سِلام ایمَه برَسِنَ کسَلی گه اِنوم ایمو دوسمو دیرِن. فیض وَه‌گَرد کُلتو بو.