تیتوس 2 - کتاب مقدس به زبان لکی - گویش مرکزی

تیَلیم دُریس یاء دَ

¹ مِنتائای تو اَ چیئَه گه مِطابق تیَلیم دُریسَ یاء دَ.

² ریش‌اَسبیَل باس هوشیار ئو سنگین بوئن ئو نوا ووژو بِگِرِن ئو اِنوم ایمون ئو مِحبت ئو پایاری دُریس رفدار بِهَن.

³ هَرهُنَ دایائَل باس رفدارو وَه عزّتا بو. نَباس بُختِم‌چی یا بَنَه شِراو بوئن، بلکِم باس اَ چیئَه گه دُریسَ تیَلیم دَن.

⁴ تاگَه بتونِن یاء ژِنَل جِهال دَن گه میردَه‌‌دوس ئو آویل‌دوس بوئن.

⁵ ئو نوا ووژو بِگِرِن ئو نجیم ئو کِنو ئو مِرِبون ئو فِربوبَر میردَه‌لو بوئن تاگَه کسی گَن نوشیَ کلوم خدا.

⁶ هَمیش پیال جِهال تشویق کَ تاگَه نوا ووژو بِگِرِن.

⁷ اِ کُل لِحاظی اَرِه کارَل خو سرمقش بو، ئو اِ تیَلیم ووژِت رُی‌راسیِت داشدوئی ئو سنگین بو،

⁸ ئو هُنَ دُریس قصَه بِهَه گه عِوی اِر ناوتی، تا هُمال اَرِیَگه چی گَنی اِبارَه ایمَه نِری بوشی، خجالتا بو.

⁹ خُلُمَل تشویق بِهَه گه اِ کُل چی فِربوبَر اَرباوَل ووژو بوئن ئو بی‌نگفت وَه دل اُوُ بوئن،

¹⁰ دُزی نَهَن، بلکِم تمومِ‌کمال ایمو خو نِشو بیَن تا اِ کُل چی رنگینی تیَلیم نجاددهندَه‌مو، خدا، نِشو دَن.

¹¹ اَرِیَگه فیض خدا ظاهر بیَ، فیضی گه کُل مردِم نجادَ مِ.

¹² ئو یامونَ مِ بی‌دینی ئو هُواوهوس ایی دنیاءَ بنیمِ لا ئو وَه نوا ووژ گِرتِن ئو صالح‌بیئین ئو دینداری اِ ایی زمونَه زِنِه‌ی بِهِیم.

¹³ هَرهُنَ گه چیَمَ‌رئی اَ امید بِمارِکیمَ یانی ظاهربیئِن جِلال خداءِ عظیم ئو نجاددهندَه‌مو عیسی مسیح،

¹⁴ گه ووژ کِردیَ خِر ایمَه تاگَه اژ کُلِ جور شرَباری آزادمو کِ، ئو قومی اَرِه ووژ پاک بِهِه گه فَخَد هِن ووژ بوئنی گه اَرِه کارَل خِر خیرَت دیرِن.

¹⁵ یوئنَ بوش، ئو وَه قدِرت‌واختیار کامل تشویق ئو تنبیه بِهَه، ئو نِیل کسی تونَ نِئیَ بِگِری.