تیتوس 1 - کتاب مقدس به زبان لکی - گویش مرکزی

¹ اژ پولُس، خُلُم خدا ئو رسول عیسی مسیح، گه مَیِّن بیمَ تا ایمو کسَلی گه خدا دیاری کِردِن تقویت کَم ئو حخیختی گه مِطابق دینداریَ، بوشِم.

² ایی حخیختَ مِطابق امید اَر ژییاین ابدیَ، گه خدای گه هرگِس دِرو نِموشی، وِر اژ بِنیا زمونَه‌ل وَدَه اَوَه داءَ بینمو،

³ ئو اِ وخد دُریس، اَ وَدَه اِ کلومی گه اِلوم کِردِنی وَه فِربو نجاددهندَه‌مو خدا سپارتیاءَ مِه، آشگارا بی.

⁴ وَه تیتوس، گه مِطابق ایمونی گه کُل اَژی بیَر دیریمونی کُر حَخمَ: فیض‌وسِلامتی اژ جونِم خداءِ باوَه ئو نجاددهندَه‌مو مسیح عیسی اَر تو بو.

صفتَل یِه شیخ

⁵ اَژونَبیَ تونِم اِ کْرِت هُیشتِ جا تاگَه کارَل ناتموم، راسِ‌ریس بِهِین ئو هَرهُنَ گه فِربونِم داین‌ئون، اِ هر شیَری شیخَلی مَیِّن کِین.

⁶ شیخ کلیسا باس چیئی اِنوم زِنِه‌ی ناوتی گه وَه‌سونگَ اَوا لارَ بوتی اَری ئو میردَه یِه ژَن بو ئو آیلَل باایمونی داشدوئیتی گه اژ هر جور بُختِم خیزی ئو توری دویر بوئن.

⁷ اَرِیَگه اُسقُفی گه پیشکار خداءَ باس چیئی اِنوم زِنِه‌ی ناوتی گه وَه‌سونگَ اَوا لارَ بوتی اَری. او نَباس قُرات یا پِرچَ‌شرهاتی یا عِرَخی یا تُن‌تیوَت بو یا هَر هَلگ اَرِه پیل بِ،

⁸ بلکِم هُن‌هاوو ئو دوسدار خوئی بو ئو نوا ووژ بِگِری ئو آم دُریس ئو مقدّس ئو مِنظمی بو.

⁹ او باس سفدِسخد بچسبی‌ اَر کلوم لائق اِتِمادی گه گِرتیَسیا، تاگَه بتونی مِطابق تیَلیم دُریس تربیت کِ، ئو هَمیش خِض بِهِه اَر کسَلی گه اَرضد یَئنَ.

¹⁰ اَرِیَگه فِرَه کسَل هَن گه تور، چِنَه‌مِفت ئو رِنگَرِن، مصخوصاً اونَلی گه اژ دسَه طرفدارَل ختینَه‌ن‌.

¹¹ اونَل باس دَمو بوئنی، اَرِیَگه وَه خاطر فادَه ناحخ، چیئَلی تیَلیمَ میَن گه نَباس تیَلیم دَن، ئو هُنَ خانوادَه‌ل بِن‌کُل نابودَ مَهَن.

¹² یَکی اژ پِخَمَرَل ووژو وِتیَسی: «کْرِتیَل هَر آمَل دِروزِن ئو جونورَل وَشی ئو لَم‌پِرَسَل تَمَلی کِن.»

¹³ ایی شاتیَ راسَ. اِسَه سخد خِض بِهَه اَرینو تا اِ ایمو دُریس بوئن،

¹⁴ ئو گوش نَگِرِنَ پاچائَل یهود ئو حکمَل کسَلی گه اژ حخیخت دویرا بینَ.

¹⁵ اَرِه آمَل پاک، کُل چی پاکَ، مِنتائای اَرِه اونَلی گه نِجس ئو بی‌ایمونِن، هُیچی پاک نیَ، بلکِم هم فگِرَلو نِجسَ هم وِژدانو.

¹⁶ اونَل ادعا مَهَن گه خداءَ مَشتاسِن، مِنتائای وَه کارَلو حاشا مَهَنی. تویک‌تیَل ئو کورفِربونِن ئو اَرِه هر کار خوئی بیلاوِن.