رومیان 7 - کتاب مقدس به زبان لکی - گویش مرکزیآزاد بیئِن اژ شریعت 1 اِاِ بِرال، مَر نِمَذانینو -اَرِیَگه وَه‌گَرد اونَلی قصَه مَهَم گه شریعتَ مَذانِن- گه شریعت فَخَد تا زمونی حکِمرونی اَر اِنسونَ مِهِه گه اِنسو زِنیَ؟ 2 اَرِیَگه مِطابق شریعت، ژَن میردَه‌دار تا زمونی گه میردِه‌ی زِنیَ، ها ژیر تعهد ژَن‌ِپیایی او‌اِر، مِنتائای اَرّ میردِه‌ی بِمِری، ژَن اژ شریعت میردِه‌ی آزادَ ماو. 3 اِسَه اَرّ وخدی گه میردَه زِنیَسی، وَه‌گَرد پیای‌تِرا زِنِه‌ی بِهِه، موشِنی‌ئون زِنهاکار. مِنتائای اَرّ میردَه بِمِرتی، اژ ایی شریعتَ آزادَ، ئو اَرّ شوی بِهِئَه پیای‌تِر، زِنهاکار نیَ. 4 هَر اَژی جورَ، اِاِ بِرال، هُمِه‌یش وَه‌سونگَ لار مسیح نِسوَتَ شریعت مِردینونَ تاگَه هِن یَکی‌تِر بوئینو، یانی او گه اژ مِردیَل زِنیا بی، تاگَه اَرِه خدا ثمر باریم. 5 اَرِیَگه وخدی اِنوم جسم بیمو، هُواوهوسَل گناباری گه اژ شریعت بی، اِنوم عضا لارمو کارَ مَهَردی تاگَه اَرِه مرگ ثمر باریم. 6 مِنتائای اِسگَه گه نِسوَتَ اَ چیئَه گه اِ قِدِبَن بیمونی، مِردیمونَ، اژ شریعت آزاد بیمونَ، تاگَه وَه‌سونگَ روح‌القدس وَه طُرُخ تازَه، خِلمت بِهِیم، نه وَه طُرُخ کُینَه اَ چیئَه گه نُیسیاءَ. شریعت ئو گنا 7 اِسَه چَه بوشیم؟ یانی شریعت گناءَ؟ اصِلا! وَه ایی حالا اَرّ شریعت نوئی، نِمَذِناسدِم گنا چیَ. اَرِیَگه اَرّ شریعت نوئتوئیتی «طَمات ناآشدوئی» نِمَتونستِم بفیَمِم طَما داشدِن چیَ. 8 مِنتائای گنا وَه‌سونگَ حکِم شریعت مِجال گِرتی گه کُلِ جور طَما اِنوم مِه باریَ بار. اَرِیَگه جیا اژ شریعت، گنا مِردیَ. 9 زمونی مِه جیا اژ شریعت زِنی بیم؛ مِنتائای وخدی حکِم شریعت یِهات، گنا زِنیا بی ئو مِه مِردِم. 10 هَراَ حکمَ گه وَدَه ژییاین داتی، بیَ باعث مِردِن مِه. 11 اَرِیَگه گنا وَه‌سونگَ حکِم شریعت مِجال گِرتی، سر مِه فن داتی ئو وَه‌سونگَ اَوَه مِه کُشتی. 12 اِسَه، شریعت مقدّسَ ئو حکِم شریعت‌یش مقدّس، دُریس ئو خوءَ. 13 ایلَهَه یانی اَ چیئَه گه خوءَ، بیَ باعث مرگ مِه؟ اصِلا! بلکِم یَه گنا بی گه اژ اَ چیئَه گه خوءَ، مرگ اِنوم مِه آوِردیَ بار تاگَه گنابیئین گنا آشگارا بو، ئو وَه‌سونگَ حکِم شریعت، بِکُوءِ در گه گَنی گنا چَنی بی‌حدِحساوَ. 14 اَرِیَگه ایمَه مَذانیم گه شریعت روحانیَ، مِنتائای مِه اِنسو جسمونی‌ای کِم ئو اِجور خُلُم گنا، فِروتیامَ. 15 اَرِیَگه مِه نِمَذانِم چَه مَهَم، اَرِیَگه نه اَ چیئَه گه مِم، بلکِم اَ چیئَه گه اَژی بیزارمی، اَنجومَ میَم. 16 اِسگَه اَرّ اَ چیئَه گه نِمِم، اَنجومَ میَم، قبولَ مَهَم گه شریعت خوءَ. 17 ایلَهَه، اِسگَه یَه دیَر مِه نیِم گه اَ کارَ اَنجومَ میَم، بلکِم گنای کَ گه لیز گِرتیَس اِنوم مِه. 18 اَرِیَگه مَذانِم گه هُیچ چی خوئی لیز نَگِرتیَس اِنوم مِه، یانی اِنوم جسم مِه. اَرِیَگه مِنَ مِم اَ چیئَه گه دُریسَ اَنجوم دَم، مِنتائای قویَه اَنجوم دائِن نِرمی. 19 اَرِیَگه اَ کار خوءَ گه مِم، نِمَهَم، بلکِم اَ کار گَنی گه نِمِم، هَراَ مارِمَ جا. 20 اِسگَه اَرّ کاری مَهَم گه نِمِم اَنجوم دَمی، ایلَهَه یَه دیَر مِه نیِم گه اَنجومَ میَمی، بلکِم گنای کَ گه لیز گِرتیَس اِنوم مِه. 21 اِسَه ایی قانونَ مَفیَمِم گه وخدی مِم کار خوئی بِهَم، گَنی ها وَر دَسِم. 22 اَرِیَگه مِن اِ باطن اژ شریعت خدا لَذتَ میَرِم، 23 مِنتائای قانونی‌تِر اِنوم عضا لار ووژمَ موئینِم، گه وَه‌گَرد شریعتی گه فگِر مِه قبولَ مِهِیتی، ها جنگ‌اِر، ئو مِنَ مِهِئَه اسیر شریعت گنا گه لیز گِرتیَس اِنوم عضا لار مِه. 24 مِه چه آم بدبخدی کِم! کیَ مَتونی مِن اژ چِنگ ایی لار مرگَ آزاد کِ؟ 25 شگِر اَرِه خدا - وَه‌سونگَ خداونمو عیسی مسیح! اِسَه، مِه وَه فگِرِم نوکری شریعت خداءَ مَهَم، مِنتائای وَه جسمِم نوکری شریعت گناءَ مَهَم. |
@ 2024 Korpu Company