رومیان 6 - کتاب مقدس به زبان لکی - گویش مرکزیمِردی نِسوَتَ گنا ئو زِنی نِسوَتَ خدا 1 اِسَه چَه بوشیم؟ یانی هَر گنا بِهِیم تاگَه فیض فِرَه‌تِرا بو؟ 2 اصِلا! ایمَه گه نِسوَتَ گنا مِردیم، چطورَ مَتونیم اِنوم زِنِه‌ی بِهِیمی؟ 3 مَر نِمَذانینو کُل ایمَه گه اِنوم مسیحْ عیسی تیَمیدمو گِرتیَ، اِنوم مرگ او تیَمیدمو گِرتیَ؟ 4 اِسَه وَه تیَمید گِرتِن اِنوم مرگ، وَه‌گَرد او قور بیمو تاگَه هَراَ جورَ گه مسیح وَه‌سونگَ جِلال باوَه، اژ مِردیَل زِنیا بی، ایمِه‌یش اِنوم زِنِه‌ی نووئی گوم بِنیم. 5 اَرِیَگه اَرّ اِ مرگی اِجور مرگ او، وَه‌گَرد او بیمونَسَ یَکی، حکماً اِ زِنیابیئِنی اِجور زِنیابیئِن او، وَه‌گَرد اوءَ موئیمَ یَکی. 6 مَذانیم اَ اِنسو قدیمَ گه ایمَه بیمو، وَه‌گَرد او کیشیا اَر صلیب تاگَه لار گنا نابود بو، تاگَه دیَر بَنَه گنا نوئیمو. 7 اَرِیَگه اَوَه گه مِردیَ، اژ گنا آزاد بیَ. 8 اِسگَه اَرّ وَه‌گَرد مسیح مِردیمَ، ایمو دیریم گه وَه‌گَرد او زِنِه‌ی‌شَ مِهِیم. 9 اَرِیَگه مَذانیم مسیح اژ مِردیَل زِنیا بی، دیَر هرگِس نِمَمِری ئو مرگ دیَر زور اَری نِمَگِرِتی. 10 اَرِیَگه او وَه اَوَه گه مِرد، یِه گِل اَرِه همیشَه نِسوَتَ گنا مِرد، مِنتائای ژییاینی گه او زِنِه‌یَ مِهِه نِسوَتَ خدا زِنِه‌یَ مِهِه. 11 هَرهُنَ، هُمِه‌یش باس ووژتو نِسوَتَ گنا وَه مِردی بِگِرینو، مِنتائای اِنوم مسیحْ عیسی نِسوَتَ خدا، زِنی. 12 اِسَه نِیلِن گنا اِنوم لارَل فانی هُمَه سِلطنت کِ تاگَه فِربون اژ هُواوهوسَل بیَرینونی. 13 عضا لار ووژتو تسِلیم گنا نَهَن تاگَه وسیلَه ناراسی بوئن، بلکِم اِجور کسَلی گه اژ مرگ گِلوناهُاردیَسَ زِنِه‌ی، ووژتو تسِلیم خدا کَن تاگَه عضا لارتو اَرِه خدا وسیلَه راسی بوئن. 14 اَرِیَگه گنا اَر هُمَه حکِمرونی نِمِهِه، اَرِیَگه اِژیر شریعت نیئینو بلکِم هاینونِ ژیر حکِمرونی فیض‌اِر. خُلُمَل صالح‌بیئین 15 اِسَه چَه بوشیم؟ یانی گنا بِهِیم اَرِیَگه اِژیر شریعت نیئیم، بلکِم هایمونِ ژیر فیض‌اِر؟ اصِلا! 16 مَر نِمَذانینو اَرّ ووژتو هَر اِجور خُلُمَل فِربوبَری تسِلیم کسی بِهِینو، موئینونَ خُلُمَل اَ کسَ گه فِربون اَژینَ میَرینونی، چه خُلُم گنا، گه آخِری مرگَ، چه خُلُم اطاعت، گه آخِری صالح‌بیئینَ؟ 17 مِنتائای شگِر اَرِه خدا گه وَه‌یاآگه زمونی خُلُمَل گنا بینو، اِسگَه وَه تموم دل بینو‌نَسَ فِربوبَر تیَلیمی گه خدا سپارتیَس‌ئونتو. 18 هُمَه وَه آزاد بیئِن اژ گنا، بینو‌نَسَ خُلُمَل صالح‌بیئین. 19 مِنَ خاطر ضیَفَل طبیعی هُمَه، وَه زوئو آمیزاءَ قصَه‌تونَ گَردَ مَهَم: اَرِیَگه هَراَ جورَ گه زمونی عضا لار ووژتون اِجور خُلُمَل تسِلیم ناپاکی ئو بی‌قانونیتو کِرد گه آخِری بی‌قانونی ویشتِرَ، اِسگِه‌یشَ اونَل اِجور خُلُمَل تسِلیم صالح‌بیئینی کَن گه آخِری قدوسیّتَ. 20 اَرِیَگه وخدی گه خُلُمَل گنا بینو، نِسوَتَ صالح‌بیئین آزاد بینو. 21 ایلَهَه اَ زمونَ، اژ چیئَلی گه اِسگَه اَژینو خجالتینو، چَه بیَ نَصُیوتو؟ اَرِیَگه عاقویَت اَ کارِلَ، مرگَ! 22 مِنتائای اِسگَه گه اژ گنا آزاد بینونَ ئو بینو‌نَسَ خُلُمَل خدا، ثمری گه میَرینو قدوسیّتَ گه آخِری ژییاین ابدیَ. 23 اَرِیَگه مِز گنا مرگَ، مِنتائای پیشکَشی خدا، ژییاین ابدی اِنوم خداونمو مسیحْ عیسیَ. |
@ 2024 Korpu Company