رومیان 5 - کتاب مقدس به زبان لکی - گویش مرکزیصُئل اِنسون ئو خدا 1 اِسَه اَرِیَگه وَه‌سونگَ ایمو صالح وَه حساو هاتیمَ، وَه‌سونگَ خداونمو عیسی مسیح صُئلَ گَرد خدا دیریم. 2 ایمَه وَه‌سونگَ او، ئو وَه‌سونگَ ایمو، حخ هاتِن اِنوم فیضی گه اِسگَه موسیمی اِنوم، آوِردِمونَسَ دس، ئو اِنوم امید اَر جِلال خدا خَوشیَ مِهِیم. 3 نه فَخَد یَه، بلکِم اِ عذاوَل‌یش خَوشیَ مِهِیم، اَرِیَگه مَذانیم گه عذاوَل طاخَتَ ماریَ بار 4 ئو طاخَت، شصخیتَ ماریَ بار، ئو شصخیت، امیدَ ماریَ بار؛ 5 ئو امید، ایمَه خجالتا نِمِهِه، اَرِیَگه مِحبت خدا وَه‌سونگَ روح‌القدس گه بَشخیاس‌ئونمو، رِشیاس اِنوم دلَلمو. 6 اَرِیَگه وخدی گه ایمَه هَنی زوئین بیمو، مسیح اِ زَمو دُریس، گیو ووژ ناتی اَرِه بی‌دینَل. 7 اِسَه کم پیشَ مای یَکی گیو ووژ اَرِه اِنسو صالحی بِنی، وَه‌یاآگه هایتِر یَکی بو گه زِلَه بِهِه گیو ووژ اَرِه آم خوئی بِنی. 8 مِنتائای خدا مِحبت ووژ هُنَ اَر ایمَه ثابت کِردی گه وخدی ایمَه هَنی گناکار بیمو، مسیح اَرِه ایمَه مِرد. 9 اِسَه ایمَه گه وَه‌سونگَ خوین او صالح وَه حساو هاتیمونَ، چَنی ویشتِر وَه‌سونگَ او اژ خَضو خدا نجادَ مَگِریم. 10 اَرِیَگه اَرّ حِنی گه وَه‌گَرد خدا دشمن بیمو، وَه‌سونگَ مرگ کُریا وَه‌گَرد ووژ دوسیمو داتی، چَنی ویشتِر اِسگَه گه دوسیمو، وَه‌سونگَ ژییاین او، نجادَ مَگِریم. 11 نه فَخَد یَه، بلکِم ایمَه وَه‌سونگَ خداونمو عیسی مسیح گه وَه‌سونگَ او صُئل خدا بیَسَ نَصُیمو، اِنوم خدا خَوشیَ مِهِیم. مرگ وَه‌سونگَ آدم، ژییاین وَه‌سونگَ مسیح 12 اِسَه، هَرهُنَ گه گنا وَه‌سونگَ یِه اِنسو هات اِنوم دنیا، ئو مرگ وَه‌سونگَ گنا یِهات، اُهُنَ مرگ دامو کُل آمَل اِراگِرتی، اَرِیَگه کُل گنائو کِرد، 13 اَرِیَگه وِر اژ یَگه شریعت باوِنی، گنا اِنوم دنیا بی، مِنتائای جای گه شریعتی ناو، گنا وَه حساو نِمای. 14 وَه ایی حالا، اژ آدم تا موسی، مرگ حکِمرونیَ مَهَردی، جُ‌جُ اَر کسَلی گه گنائَلو اِجور کورفِربونی آدم نوئی. آدم، نمونَه کسی بی گه باس بای. 15 مِنتائای پیشکَشی اِجور کورفِربونی نیَ. اَرِیَگه اَرّ وَه‌سونگَ کورفِربونی یِه اِنسو فِرَه کسَل مِردِن، چَنی ویشتِر فیض خدا ئو پیشکَشی‌ای گه وَه‌سونگَ فیض اَ یِه اِنسونَ، یانی عیسی مسیح، هات، چَل‌چَل بیَ نَصُی فِرَه کسَل. 16 ئو ایی پیشکَشیَ اِجور ثمر گنا اَ یِه اِنسونَ نیَ. اَرِیَگه داوری‌ای گه وَه دُم یِه کورفِربونیا هات، مکومیَت آوِردی، مِنتائای پیشکَشی‌ای گه وَه دُم کورفِربونیَل فِرِه‌یکا هات، صالح‌بیئینَ گَرد ووژ آوِردی. 17 اَرِیَگه اَرّ وَه‌سونگَ کورفِربونی یِه اِنسو، ئو وَه خاطر او مرگ سِلطنت کِردی، چَنی ویشتِر کسَلی گه فیض بی‌حدِحساو خدا ئو پیشکَشی صالح‌بیئینَ مَگِرِن، وَه‌سونگَ اَ یِه اِنسونَ، یانی عیسی مسیح، سِلطنت اَر ژییاینَ مَهَن. 18 اِسَه هَراَ جورَ گه یِه کورفِربونی باعث مکومیَت کُل آمَل بی، یِه کار صالحی‌یشی باعث صالح وَه حساو هاتِن ئو ژییاین کُل آمِلَ ماو. 19 اَرِیَگه هَراَ جورَ گه وَه‌سونگَ کورفِربونی یِه اِنسو، فِرَه کسَل گناکارا بین، وَه‌سونگَ اطاعت یِه اِنسون‌یش فِرَه کسَل صالحا موئن. 20 اِسگَه، شریعت هات تاگَه کورفِربونی فِرَه‌آ بو؛ مِنتائای جای گه گنا فِرَه‌آ بی، فیضِ بی‌حدِحساو، فِرَه‌تِرا بی. 21 تاگَه هَراَ جورَ گه گنا اِنوم مرگ سِلطنت کِردی، فیض‌یش وَه‌سونگَ صالح‌بیئینی گه آخِری ژییاین ابدیَ سِلطنتَ مِهِه، وَه‌سونگَ خداونمو عیسی مسیح. |
@ 2024 Korpu Company