رومیان 3 - کتاب مقدس به زبان لکی - گویش مرکزیخدا اَمونتدارَ 1 اِسَه فادَه یهودی بیئین چیَ ئو ختینَه چه ارزشدی دیری؟ 2 فِرَه، اژ کُل لِحاظی. اول یَگه کلوم خدا وَه اَمونت سپارتیاس‌ئونو. 3 اَرّ بِری اَژینو اَمونتدار نوئین چَه باس بوشیم؟ آیا اَمونتدار نوئین اونَل، اَمونتدار بیئِن خدا باطلَ مِهِه؟ 4 هرگِس! جُ‌جُ اَرّ کُل آمَل دِروزِن بوئن، خدا راس‌وَشَ! هَرهُنَ گه اِنوم کِتاو زبور داوود نُیسیاءَ: «اَژونَسَ وخدی قصَه مِهِین، حخ ها دس تونا، ئو وخدی داوریَ مِهِین، فائقَ ماین.» 5 مِنتائای اَرّ نادُریسی ایمَه دُریسی خدا ویشتِر آشگارا مِهِه، چَه باس بوشیم؟ مَر خدا وخدی گه خَضوءَ ماریَ سرمو ظالمَ؟ اِجور اِنسو قصَه مَهَم. 6 اصِلا. اَرِیَگه اَسَه خدا چطورَ مَتونی اَر دنیا داوری بِهِه؟ 7 مِنتائای «اَرّ وَه‌سونگَ دِرو مِه راسی خدا ویشتِر جِلالَ مَگِری، دیَر مِن اَرّا اِجور گناکاری مَکومَ موئم؟» 8 ئو اَرّا نوشیم: «بورِن گَنی بِهِیم تاگَه خوئی باءَ عمل»، هَرهُنَ گه بِری بُختِمون اَری دایمَ ادعاءَ مَهَن گه ایمَه هُنَ موشیم؟ مکومیَت یوئنَ عادلونِئَه. کس صالح نیَ 9 اِسَه چَه باس بوشیم؟ آیا وضِ‌حال ایمَه یهودیَل بیتِرَ؟ اصِلا! اَرِیَگه وِرِکار ادعامو کِرد گه یهود ئو یونانی هَردِک هانِ ژیر گنااِر. 10 هَرهُنَ گه اِ نُسَخ مقدّس نُیسیاءَ: «کس صالح نیَ، جُ‌جُ یَکی. 11 کس فیَم نِری، کس مِنِی خدا نِمِهِه. 12 کُل اژ رئی اِرهاتِنَ، ئو وَه‌گَرد یَک باطل بینَ. کس خوئی نِمِهِه، جُ‌جُ یَکی.» 13 «تینیو قور وِشائی کَ ئو وَه زوئونو فنَ میَن.» «ژیَر حَفی ها ژیر لِچَلون‌اِر؛» 14 «دَمو پِر اژ تیَلی ئو نُئِرَ.» 15 «ئو پائلون اَرِه خوین رِشونِن زِلَ؛ 16 هر جا مَچِن، خِراوی ئو نِهاتَ مِیلِن اَر جا، 17 ئو رئی صُئل‌وسِلامتی نِمَشتاسِن.» 18 «ترس اژ خدا اِ چیَمَلو نیَ.» 19 اِسگَه مَذانیم گه اَ چیئَه گه شریعتَ موشی اَرِه کسَلی کَ گه هانِ ژیر شریعت‌اِر تا هر دَمی بوئنی ئو کُل دنیا وَه خدا جوواو بیَنَ دُما. 20 وَه‌چوینا گه هُیچ بشری وَه کارَل شریعت، اِ چیَم خدا صالح وَه حساو نِمای، اَرِیَگه شریعت، گناءَ مَشتاسِنیَ ایمَه. صالح وَه حساو هاتِن اژ رئی ایمو 21 مِنتائای اِسگَه، اَ صالح‌بیئینی گه اژ خداءَ، جیا اژ شریعت آشگارا بیَ، هَرهُنَ گه شریعت ئو پِخَمَرَل شاتی اَرینَ میَنی. 22 ایی صالح‌بیئینی گه اژ خداءَ اژ رئی ایمون اَر عیسی مسیحَ ئو ماوَ نَصُی کُل کسَلی گه ایمونَ مارِن. اَرِیَگه هُیچ فرخی نیَ. 23 اَرِیَگه کُل گنائو کِردیَ ئو اژ جِلال خدا کمَ مارِن. 24 وَه فیض خدا ئو وَه‌سونگَ اَ نَسَخ آزادی‌ای گه ها نوم مسیحْ عیسی‌اِر، وَه مِفت صالح وَه حساوَ مان، 25 گه خدا وِرِکار عیسی مسیح اَرِه کفارَه گنائَل مَیِّن کِردی، تاگَه وَه‌سونگَ خوین او، اژ رئی ایمو باءَ دس. یَه اَرِه نِشو دائِن عدالت خدا اَنجوم گِرتی، اَرِیَگه خدا اِ صبِر الهی ووژ، گنا نواینِلَهَه وَه نِئیَ گِرتی. 26 یَه اَرِه نِشو دائِن صالح‌بیئین ووژ اِ ایی زمونَ بیَ، تاگَه ووژ صالح بو ئو کسی‌شی گه ایمون اَر عیسی دیری، صالح وَه حساو باری. 27 اِسَه دیَر چه جا افتخاری هَس؟ جای نِری. وَه‌سونگَ چَه‌آ؟ وَه‌سونگَ شریعت کارِلا؟ نه، بلکِم وَه‌سونگَ شریعت ایمونا. 28 اَرِیَگه ایمَه باوار دیریم گه اِنسو وَه ایمونَ گه صالح وَه حساوَ مای، بی‌یَگه کارَل شریعت اَنجوم دِ. 29 یانی خدا فَخَد خداءِ یهودیِلَ؟ مَر خدا خِرِیهودیَل‌یش نیَ؟ اَلوَت گه او خدا خِرِیهودیَل‌یش هَس. 30 اَرِیَگه فَخَد یِه خدا هَس، ئو ایی خداءَ ختینَه‌کَریائَل اژ رئی ایمون ئو ختینَه‌نکَریائَل وَه‌سونگَ هَراَ ایمونَ صالح وَه حساوَ ماری. 31 ایلَهَه مَر وَه ایی ایمونَ شریعت اِرَمَرِمِنیم؟ هرگِس! بلکِم پایارا مِهِیمی. |
@ 2024 Korpu Company