رومیان 2 - کتاب مقدس به زبان لکی - گویش مرکزی

داوری عادلونَه خدا

¹ ایلَهَه تو اِاِ کسی گه اَر یَکی‌تِر حکمَ مِهِین، هر کی گه هِین هُیچ دَسپیچی نِرین. اَرِیَگه وَه اَ چیئَه گه اَر یَکی‌تِر حکمَ مِهِین، اَر ووژِت حکمَ مِهِین؛ اَرِیَگه تو اِاِ داور، ووژِت هَراَ کارِلَ مِهِین.

² ایمَه مَذانیم داوری خدا اَر کسَلی گه هُنَ کارَلی اَنجومَ میَن، حخَ.

³ ایلَهَه تو گه اَر کسَلی‌تِر حکمَ مِهِین ئو ووژِت هَراَ کارِلَ اَنجومَ مِین، مَر گُمونَ مِهِین گه اژ داوری خدا مَچین‌اِر؟

⁴ یاگَه مِرِبونی، صبِر ئو تیَمِل فِرَه خدا وَه هُیچَ مَذانین ئو نِمَذانین گه مِرِبونی خدا اَرِه یَسَ گه تو باری ویرِ توئَه؟

⁵ مِنتائای تو وَه خاطر یَگه اِژیر نِمَچین ئو یَگه دلِت نِمِیتی توئَه بِهِین، خَضو اَرِه ووژِت، اَرِه روژ خَضو اَمارَ مِهِین، اَ روژَ گه داوری عادلونَه خدا اِنوم آشگارا ماوتی.

⁶ خدا «وَه هر کی مِطابق کارَلی سزاءَ مِ.»

⁷ او ژییاین ابدیَ موئَشخیَ کسَلی گه وَه صبِر اِ اَنجوم کارَل خو، هان اَر دُم جِلال ئو عزّت ئو زِنِه‌ی ابدیا؛

⁸ مِنتائای خِض ئو خَضوءَ ماری اَرسر کسَلی گه هَر هانِ فگِر ووژونا ئو اژ حخیخت اطاعت نِمَهَن بلکِم اژ ناراسی اطاعتَ مَهَن.

⁹ هر کی گَنی بِهِه، جُور ئو عذاوَ ماوتیَ نَصُی. اول‌بار یهود ئو اَسَه یونانی.

¹⁰ مِنتائای هر کی خوئی بِهِه جِلال ئو عزّت ئو سِتارَ ماوتیَ نَصُی، اول‌بار یهود ئو اَسَه یونانی.

¹¹ اَرِیَگه خدا دوچیَمکی نِمِهِه.

¹² کُل کسَلی گه بی‌شریعت موسی گناءَ مَهَن، بی‌شریعت‌یش نابودَ موئن؛ ئو کُل کسَلی گه اِ ژیر شریعت گناءَ مَهَن، وَه‌سونگَ شریعت داوریَ موئن.

¹³ اَرِیَگه کسَلی گه شریعتَ مَشتوئِن اَرتَک خدا صالح نیِن، بلکِم کسَلی گه شریعتَ مارِن‌َ جا صالح وَه حساوَ مان.

¹⁴ اِراسی، وخدی خِرِیهودیَل گه شریعت نِرِن، کارَل شریعت مِطابق طبیعتَ مارِن‌َ جا، اونَل وَه‌یاآگه شریعت نِرِن، اَرِه ووژو شریعتی کِن.

¹⁵ اونَل نشونَ میَن گه کارَل شریعت نُیسیاس اَررُی دلَلو، هُنَ گه وِژدانو شاتیَ مِ ئو فگِرَل اَرضد یَکو، یا مَکومونَ مِهِه یا تبرئَه‌‌ئونَ مِهِه.

¹⁶ یَه اِ روژی اَنجومَ مَگِری گه خدا مِطابق انجیلی گه مِه اِلومَ مَهَم، وَه‌سونگَ عیسی مسیح، اَر رازَل دل اِنسونَل داوریَ مِهِه.

¹⁷ مِنتائای اَرّ تو گه ووژتَ یهودیَ مَذانین ئو تکیَ مِین اَر شریعت ئو اَرِیَگه خداءَ مَشتاسین وَه ووژتَ مَنازین،

¹⁸ تو گه خواس اوءَ مَذانین ئو اَرِیَگه اژ شریعت تیَلیمِت گِرتیَ، اَوَه گه اژ کُل بیتِرَ شیَه مِهِین،

¹⁹ ئو اطمینو دیرین گه رَنِما کورَلین ئو اَرِه کسَلی گه هان اِنوم تیَریکی‌اِر، نُیرین،

²⁰ مِربی نایونَل ئو مَلِم آیلَل گُجَرین، تو گه اِ شریعت، میَرفت ئو حخیخت اَجورَ گه ماو بوئینینی دیرین،

²¹ اِسَه تو گه یاء باقیَ مِین، یاء ووژِت نِمِین؟ تو گه اَرضد دُزی موعظَه مِهِین، ووژِت دُزیَ مِهِین؟

²² تو گه موشین نَباس زِنها بِهِین، ووژِت زِنهاءَ مِهِین؟ تو گه اژ بِتَل بیزارین، ووژِت معبدَل خارَتَ مِهِین؟

²³ تو گه وَه شریعتَ مَنازین، آیا وَه اِژیر پا نائنی بی‌عزّتی اَر خدا نِمِهِین؟

²⁴ اَرِیَگه هَرهُنَ گه اِنوم کِتاوَل پِخَمَرَل نُیسیاءَ: «وَه خاطر هُمَه، اِنوم خِرِیهودیَل کِفِرَ موشِنَ نُم خدا.»

²⁵ ختینَه وخدی اَرزشد دیری گه شریعت بارینونَ جا، مِنتائای اَرّ بنینونیِ ژیر پا، اِجور یَسَ گه ختینَه نوئینونَ.

²⁶ اِسَه اَرّ پیای گه ختینَه نوئیَ، حکمَل شریعت باریَ جا، آیا خَتینَه‌نوئین او ختینَه وَه حساو نِمای؟

²⁷ اِسَه اَوَه گه اِنوم جسم ختینَه نوئیَ، مِنتائای حکمَل شریعتَ ماریَ جا، تو مَکوم مِهِه، تو گه وَه‌یاآگه حکمَل شریعت دیرین ئو ختینَه بینَ، شریعتَ مَنینِ ژیر پا.

²⁸ اَرِیَگه یهودی اَوَه نیَ گه وَه ظاهر یهودی بو، ئو ختینِه‌یش کار ظاهری ئو جسمونی‌ای نیَ.

²⁹ بلکِم یهودی اَوَه‌‌سَ گه اِ باطن یهودی بو ئو ختینِه‌یش کار قلبی‌ای کَ گه وَه دس روحِ خدا اَنجومَ ماو، نه وَه‌سونگَ کِلمَه‌لی گه نُیسیاءَ. هُنَ کسی خدا تیَریف اَژینَ مِهِیتی، نه اِنسو.