رومیان 16 - کتاب مقدس به زبان لکی - گویش مرکزیسِلام ئو درود 1 اَمونت خُیَه‌مو فیبیَ میَم‌ئونتو. او خادم کلیسا شیَر کِنخْریه‌ءَ. 2 تاگَه هَراَ جورَ گه لائق ایمودارَل مسیحَ، اِنوم خداون، بِچینونیِ گِرد ئو اِ هر چیئی گه هَوَجِه کَتی‌ئورتو، یاری دَنی، اَرِیَگه او یاری فِرِه، داسیَ فِرَه کسَل، هَمیش وَه مِه ووژِم. 3 سِلام برَسِنِنَ پْریسکیلا ئو آکیلا، هُمکارَلِم اِنوم مسیحْ عیسی. 4 اُوُ گیو ووژونَ خاطر مِه آوشدیَسِ خطر، ئو نه فَخَد مِه، بلکِم کُل کلیسائَل خِرِیهودیَل منّت‌بارونِن. 5 هَمیش سِلام برَسِنِنَ کلیسائَلی گه هان اِنوم مالون‌اِر. سِلام برَسِنِن رِقیف عزیزِم اِپینِتوس، گه اول کسی اِنوم هیال آسیا بی گه ایمو آوِردی اَر مسیح. 6 سِلام برَسِنِنَ مریم گه اَرِه هُمَه زیَمَت فِرِه کیشیَسی. 7 سِلام برَسِنِنَ قومِ‌خویشَلم، آندْرونیکوس ئو یونیاس گه وَه‌گَرد مِن اِ زندو بین. یوئنَ اَرتَک رسولَل شناسِن ئو وِر اژ مِه اِنوم مسیح بینَ. 8 سِلام برَسِنِنَ رِقیف عزیزِم اِنوم خداون، آمپْلیاتوس. 9 وَه هُمکارِم اِنوم مسیح، اوربانوس، ئو رِقیف عزیزِم، اِستاخیس، سِلام بِرَسِنِن. 10 وَه آپِلیس گه اژ اِنتحو ووژ اِنوم مسیح اِرهاتیَ، سِلام بِرَسِنِن. سِلام برَسِنِنَ هوز آریستوبولُس. 11 وَه قومِ‌خویشِم هیرودیون ئو هَمیش وَه هوز نارکیسوس گه هان اِنوم خداون، سِلام بِرَسِنِن. 12 سِلام برَسِنِنَ تْریفینا ئو تْریفوسا، گه اِنوم خداون سخد زیَمَتَ مَکیشِن، ئو هَمیش وَه پِرسیس عزیزگرامی گه اِنوم خداون فِرَه زیَمَت کیشیَسی. 13 وَه روفُس گه اِنوم خداون دیاری بیَ، ئو وَه دای گه اَر حخ مِن‌یش اِجور دا بیَ، سِلام بِرَسِنِن. 14 سِلام برَسِنِنَ آسینکْریتوس، فْلِگون، هِرماس، پاتْروباس ئو هِرمِس ئو بِرالی گه هانَ گَردو. 15 سِلام برَسِنِنَ فیلولوگوس، یولیا، نیریاس ئو خُیِِه‌ی، ئو وَه اولیمپاس ئو کُل ایمودارَلی گه هانَ گَردو. 16 وَه ماچ مقدّسی سِلام بِهَن اَر یَکتِری. کُل کلیسائَل مسیح سِلامتون‌ئونَ مَرَسِنِن. 17 اِاِ بِرال، خواهشدتون اَژینَ مَهَم گه حُواستون کسَلی بو گه باعث جیاییَ موئن ئو کُچِکَ مَنِن اَر نوم رئی هُمَه ئو هان اَرضد تیَلیمی گه گِرتِتونَسا؛ اَژینو دویرا بِگِرِن، 18 اَرِیَگه هُنَ کسَلی خِلمت اژ خداون ایمَه مسیح نِمَهَن، بلکِم هانَ دُم لَم ووژونا ئو وَه قصَه‌ل نرم ئو چاپلوسی، دل آمَل سادَه فنَ میَن. 19 اَرِیَگه کُل اژ فِربوبَری هُمَه خَوَر دیرِن؛ اِسَه مِن اَرِه هُمَه فِرَه خَوشالِم. مِنتائای اژ هُمَه‌مَ مِ گه اِ خوئی دونا، ئو اِ گَنی، سادَه بوئینو. 20 خداءِ صُئل‌وسِلامتی هَرِ ایی زویَ شِطون اِژیر پال هُمَه مَتِلِنیا. فیض خداونمو عیسی مسیحَ گَردتو بو. 21 هُمکارِم تیموتائوس سِلامتون‌ئونَ مَرَسِنی. قومَلِم لوکیوس، یاسون ئو سوسیپاتِروس‌یش سِلامَ مَرَسِنِن. 22 مِه، تِرتیوس، کسی گه ایی نُامَه نُیسونی، اِنوم خداون سِلامتون‌ئونَ مَرَسِنِم. 23 گایوس‌یش گه مِن ئو کُل کلیسا مِمونیمی، سِلامتون‌ئونَ مَرَسِنی. اِراستوس گه خزینَه‌دار شیَرَ، ئو بِرامو کوآرتوس سِلامتون‌ئونَ مَرَسِنِن. 24 [«فیض خداونمو عیسی مسیحَ گَرد کُلتو بو. آمین».] 25 اِسگَه جِلال اَر او گه مَتونی مِطابق انجیلی گه مِن اِبارَه عیسی مسیح موعظَه مَهَم، تقویتتو کِ، -مِطابق مِکاشفَه اَ رازَ گه اَرِه زمونَه‌ل دِریژی آشاریا مَنوئی. 26 ئو اِسگَه کَتیَسِ در ئو وَه‌سونگَ نُسَخ پِخَمَرَل، مِطابق حکِم خداءِ ابدی آشگارا بیَس اَر کُل ملتَل، تاگَه اونَل ایمو بارِن ئو اطاعت بِهَن- 27 وَه‌سونگَ عیسی مسیح تا ابد جِلال اَر او گه یَکونَه خداءِ دوناءَ! آمین. |
@ 2024 Korpu Company