رومیان 15 - کتاب مقدس به زبان لکی - گویش مرکزی1 ایمَه گه قویَه دیریم، باس ضیَفَل کسَلی گه ضِیفِن بِگِریمِ کول، نه یَگه وَه دُم خَوشی ووژمونا بوئیمو. 2 هر کُم اژ ایمَه باس چی خوئی گه اِنوم هُمسا ووژَ موئینی، اَرِه اَوَه خَوشالا کِیتی تاگَه باعث تقویت ایمو بوتی. 3 اَرِیَگه مسیح‌یش وَه دُم خَوشی ووژا نوئی، هَرهُنَ گه اِنوم کِتاو زبور داوود نُیسیاءَ: «مذمت مذمت‌کَرَل تو، کَت اَررُی مِه.» 4 اَرِیَگه هر چی گه اژ قدیم نُیسیاءَ، اَرِه تیَلیم ایمَه بی تا وَه‌سونگَ پایاری ئو دلگُوئی‌ای گه نُسَخ مقدّسَ موئَشخی‌ئونمو، امیدمو داشدوئی. 5 اِسگَه خدای گه پایاری ئو دلگُوئیَ موئَشخی، یَه بوئَشخی‌ئونتو گه اَجورَ گه مِطابق خواس مسیحْ عیسیَ، وَه‌گَرد یَک هُم‌رِأ بوئینو، 6 تا وَه یِه دل ئو یِه زوئو، وَه‌گَرد یَک، خدا ئو باوَه خداونمو عیسی مسیح، جِلال دِینو. 7 اِسَه هَرهُنَ گه مسیح چیِ گِرد هُمَه، هُمِه‌یش بِچِنِ گِرد یَکتِری تاگَه خدا جِلال بِگِری. 8 اَرِیَگه موشِم‌ئونتو گه مسیح بیَ خادم ختینَه‌کَریائَل تاگَه راسی خدا نِشو دِ تاگَه وَدَه‌لی گه خدا دائیتیَ باوَه‌جدَلمو، تایید کِ. 9 ئو تاگَه قومَل خِرِیهود، خدا اَرِه ریَمَتی جِلال دَن. هَرهُنَ گه اِنوم نُسَخ مقدّس نُیسیاءَ: «وَه ایی خاطرَ، تون اِنوم قومَل خِرِیهود، شُگِرَ مَهَم، ئو اَرِه نُم تو دَنگ اِرَمارِم.» 10 هَنیَ موشی: «اِاِ قومَل وَه‌گَرد قوم او خَوشالی بِهَن!» 11 ئو هَمیشَ موشی: «اِاِ کُل قومَل، خداون ستائشت بِهَن! ئو اِاِ کُل ملتَل، جِلال دَنی!» 12 ئو اِدوارَه اِشعیا پِخَمَریشَ موشی: «ریشی یَسا مای، هَر اَوَه گه اَرِه حکِمرونی اَر قومَل خِرِیهود، هیزَمَگِری؛ ئو امید قومَل خِرِیهود هار او.» 13 اِسگَه خداءِ امید، هُمَه اژ کُل خَوشی ئو صُئل‌وسِلامتی اِنوم ایمو، پِرا کِ تاگَه وَه قویَت روح‌القدس، پِر اژ امید بوئینو. پولُس خادم خِرِیهودیَل 14 اِاِ بِرال، مِه ووژِم اِبارَه هُمَه اطمینو دیرِم گه هُمَه ووژتو پِر اژ خوئینو، ئو پِرینون اژ کُل شناخت ئو مَتونینو تیَلیم یَکتِری دِینو. 15 مِنتائای فِرَه جسارتِم کِرد، اِبارَه چَن چیم اَرِه هُمَه نُیسو، تاگَه بارمونَ ویرتو، وَه‌سونگَ اَ فیضَ گه خدا بَشخیَسی‌ئونِم 16 تاگَه خادم مسیحْ عیسی اَرِه خِرِیهودیَل بوئم ئو اِجور کاهنی اِ خِلمت انجیل خدا، تاگَه خِرِیهودیَل پیشکَشی باوِ دل خدا بوئن گه وَه‌سونگَ روح‌القدس تقدیس بیَ. 17 اِسَه اِنوم مسیحْ عیسی، حخ دیرِم وَه خِلمت کِردِن ووژِم اَر خدا، بنازِم. 18 اَرِیَگه جورَت نِمَهَم اِبارَه چیئی قصَه بِهَم، بِخِر اژ اَ چیئَه گه مسیح وَه‌سونگَ مِه، اَنجوم داتی تاگَه وَه قصَه‌لِم ئو کارَلِم خِرِیهودیَل بِهَمَ فِربوبَر ایمو، 19 وَه قویَت نشونَه‌ل ئو مُجِزَه‌ل، وَه قویَت روحِ خدا، هُنَ گه اژ شیَر اورشلیم تا ایلیریکوم دورِم دا، خِلمت انجیل مسیحِم کامل وَه اَنجوم رَسو. 20 آواخدِم هَر یَه بیَسَ گه انجیل اِ جای موعظَه بِهَم گه تا اِسگَه نُم مسیحو نَشتَفتیَ، تاناخواد اَرسر بِناوَه کسی‌تِر، بسازِم، 21 بلکِم هَرهُنَ گه اِنوم کِتاو اِشعیا پِخَمَر نُیسیاءَ: «اونَلی گه خَوَرون اَژی ناآشد، موئینِن، ئو اونَلی گه نَشتَفتوئیو، مَفیَمِن.» 22 اَژونَسَ، چَن گِل نوام گیریا گه بام اِرَه تَکتو. نشخَه پولُس اَرِه یَگه روم بوئینی 23 مِنتائای اِسگَه، اَرِیَگه اِنوم ایی هیالِلَ، دیَر جای نَمَنیَ کار بِهَم، ئو وَه‌چوینا گه چَن سالَ شوق دیرِم بام اِرَه تَکتو، 24 امیدَوارِم اَر سر رئی اسپانیا، بام بوئینِمتو تاگَه دُما یَگه هُمَه‌م دی، مِنِ سفرم اِرَه اورَه یاری دِینو. 25 مِنتائای اِسگَه، میا بِچِم اِرَه اورشلیم تاگَه اَرِه ایمودارَل مسیح کمک نخدی بیَرِم، 26 اَرِیَگه کلیسائَل هیالَل مقدونیَه ئو اَخائیَه صِلائو دی گه اَرِه ایمودارَل ژار اورشلیم پیل رِ کَن. 27 اونَل ووژو صِلائو دی ایی کارَ بِهَن؛ ئو اِراسی دِن اونَل اِ مِلو بی، اَرِیَگه اَرّ خِرِیهودیَل اِنوم بِرَکتَل روحانی یهودیَل هُم‌بیَرا بینَ، یهودیَل‌یش باس هَرهُنَ اِنوم خِلمت بِرَکتَل مالی اونَل، هُم‌بیَرا بوئن. 28 اِسَه، وخدی ایی کارمَ تموم کِرد ئو چیئَلی گه جیَم بیَ رَسونمَ دَسو، اژ رئی هُمَه، مَچِم اِرَه اسپانیا. 29 مَذانِم گه وخدی بام اِرَه تَکتو، وَه بِرَکت کامل مسیحَ مام. 30 اِاِ بِرال، وَه خاطر خداونمو عیسی مسیح ئو مِحبت روح‌القدس، خواهشدتون اَژینَ مَهَم گه وَه‌گَرد مِه تقِلا بِهِینو ئو اِ درگا خدا، هَر بنیشِنَ دوعا اَرِه مِه، 31 تاگَه شر بی‌ایمونَل یهودیَه اژ مِه بِکُوءِ لا ئو خِلمتِم اِ اورشلیم وَه دل ایمودارَل اورَه بوءَ. 32 تاگَه وَه خواس خدا وَه خَوشی بام اِرَه تَکتو تاگَه گیونم اَر تَکتو تازه‌آ بو. 33 خداءِ صُئل‌وسِلامتی وَه‌گَرد کُلتو بو. آمین. |
@ 2024 Korpu Company