رومیان 14 - کتاب مقدس به زبان لکی - گویش مرکزی

یَکتِری قضاوت نَهَن

¹ کسی گه ایمو ضِیفِ بِیلِنیِ گِرد، بی‌یَگه اِبارَه عخیدَه‌ل دَمَرَگَ کِینو.

² یَکی ایمو دیری گه مَتونی هر چی بیری، مِنتائای کسی گه ایمو ضِیفِ، فَخَد وَلگِ‌واشَ میری.

³ اَوَه گه کُل چیَ میری، نَباس اوئی گه نِمیری خوار کِ؛ ئو اَوَه گه کُل چی نِمیری، نَباس اوئی گه کُل چیَ میری قضاوت کِ. اَرِیَگه خدا او هُیشتیَسیِ گِرد.

⁴ تو کیئین گه خِلمتکار کسی‌تِر قضاوتَ مِهِین؟ پایار مَنِن یا کَتِنی وَه اَرباو ووژ مربوطَ. ئو او پایاریشَ مَمینی اَرِیَگه خداونَ مَتونی او پایارا کِ.

⁵ یَکی یِه روژ بیتِر اژ روژَلی‌تِرَ مَذانی؛ یَکی‌تِر، کُل روژَل وَه یِه جورَ مَذانی. هر کی باس اِ فگِر ووژ، کامل اطمینو داشدوئیتی.

⁶ اَوَه گه قُرپَ ماوژیَ روژ مصقوصی، وَه حرمت خداون هُنَ مِهِه. اَوَه گه میری، وَه حرمت خداونَ میری، اَرِیَگه شگِر خداءَ مِهِه، ئو اَوَه گه نِمیری، اویش وَه حرمت خداون نِمیری ئو شگِر خداءَ مِهِه.

⁷ اَرِیَگه هُیچ کُم اژ ایمَه اَرِه ووژ زِنِه‌ی نِمِهِه ئو هُیچ کُم اژ ایمَه اَرِه ووژ نِمَمِری.

⁸ اَرِیَگه اَرّ زِنِه‌ی بِهِیم، اَرِه خداون زِنِه‌یَ مِهِیم، ئو اَرّ بِمِریم، اَرِه خداونَ مَمِریم، اِسَه چه زِنِه‌ی بِهِیم چه بِمِریم، هِن خداونیم.

⁹ اَرِیَگه مسیح‌یش وَه ایی خاطرَ مِرد ئو زِنیا بی تاگَه خداون زِنیَل ئو مِردیَل بو.

¹⁰ اِسَه تو اَرّا بِرا ووژِت قضاوتَ مِهِین؟ یاگَه تو اَرّا بِرا ووژِت خوارَ مِهِین؟ اَرِیَگه کُل ایمَه موسیم اِبِرُوَر تخت داوری خدا.

¹¹ اَرِیَگه اِنوم کِتاو اِشعیا پِخَمَر نُیسیاءَ: «خداونَ موشی: وَه ژییاین ووژِم قسم گه هر زُنی اِبِرُوَر مِنَ مَچَمی ئو هر زوئونی اعترافَ مِهِئَه خدا.»

¹² اِسَه هر کُم اژ ایمَه حساو ووژَ خدا مِئِه دُما.

¹³ اِسَه، بورِن اَژیرِ دُما اَر یَکتِری قضاوت نِهِیم. بلکِم اِجالی، قَص بِهَن گه هُیچ کُچِکی گه پا گیر بِهِیتی اَری ئو باعث اَر زَمی کَتِن بو یا چیئی اَرنوم رئی بِراتو نَنِن.

¹⁴ مِه اِنوم عیسیِ خداونَ مَذانِم ئو قانی بیمَ گه هُیچی ووژ اَرِه ووژ نِجس نیَ. مِنتائای اَرِه کسی گه نِجسَ مَذانِتی، نِجسَ.

¹⁵ اَرِیَگه اَرّ بِرات وَه چیئی گه تونَ میرین اذیتَ ماو، دیَر وَه مِحبت رفدار نِمِهِین. وَه چیئی گه میرین، بِرا ووژِت گه مسیح وَه خاطر اوآ مِرد، نابود نِهَه.

¹⁶ اِسَه نِیلِن گَن بوشِنَ اَ چیئَه گه هُمَه خوءَ مَذانینونی.

¹⁷ اَرِیَگه پاتِشائی خدا هُاردِن ئو خُرّدائن نیَ، بلکِم صالح‌بیئین، صُئل‌وسِلامتی، ئو خَوشی اِنوم روح‌القدسَ.

¹⁸ هر کی هُنَ خِلمت اژ مسیح بِهِه، خدا قبولَ مِهِیتی ئو مردِم‌یش تاییدَ مَهَنی.

¹⁹ اِسَه بورِن وَه دُم چیئیکا بوئیمو گه باعث صُئل‌وسِلامتی ئو تقویت ایمو یَکتِریَ ماو.

²⁰ کار خدا وَه خاطر خوراک خِراو نِهَه! اِراسی کُل چی پاکَ، مِنتائای کار دُریسی نیَ گه یَکی وَه هُاردِن چیئی باعث کَتِن یَکی‌تِر بو.

²¹ خوءَ گه گوشد نیرین ئو شِراو خُرّ نِین یا کاری نِهِین گه باعث کَتِن بِراتَ ماو.

²² ایمونِت اِبارَه ایی چیئِلَ بِیل اَرتَک ووژت ئو خدا. خَوزگالَ کسی گه ووژَ خاطر اَ چیئَه گه تاییدَ مِهِه، قضاوت نِهِه.

²³ مِنتائای کسی گه چِرچَ میَریِ دل، اَرّ بیری مَکومَ ماو، اَرِیَگه وَه ایمو نَهُاردیَسی. اَرِیَگه هر چی گه اژ ایمو ناو، گناءَ.