رومیان 13 - کتاب مقدس به زبان لکی - گویش مرکزی

فِربوبَر صائای‌قدِرتَل

¹ کُل کسی باس فِربوبَر قدِرتَلی گه حکِمرونیَ مَهَن، بو، اَرِیَگه هُیچ قدِرتی نیَ مَر اژ جونِم خدا، ئو اونَلی گه هَن، اژ جونِم خدا نیریانَ.

² اِسَه اَوَه گه اَرضد قدِرتی هیزگِری، اَرضد اَ چیئَه گه خدا مَیِّن کِردیِ، هیزگِرتیِ؛ ئو کسَلی گه هُنَ مَهَن، داوریَ موئن.

³ اَرِیَگه دُریسکارَل زِلَئون اژ حکِمرونَل نِمَچو، مِنتائای خِلافکارَل زِلَئون اَژینونَ مَچو. آیا مِت زِلَت اژ صائای قدِرت نَچو؟ اِسَه اَوَه گه دُریسَ اَنجوم دَ گه تیَریفت اَژینَ مِهِه.

⁴ اَرِیَگه او خادم خداءَ اَرِه خِریَّت تو. مِنتائای اَرّ کار خِلاف بِهِین، زِلَت بِچو، اَرِیَگه او هِر اژ وِل شِمشیرَ سر قِ نیِ. اَرِیَگه او خادم خداءَ، تقاص‌کَری گه خَضو خداءَ ماریَ سر خِلافکارَل.

⁵ اِسَه آم باس فِربوبَر بو، نه فَخَد اَرِیَگه اژ خَضو خدا دویر بو، بلکِم وَه خاطر وِژدون‌یش.

⁶ اَرِیَگه اَژونَسَ مالیاتَ مِینو، اَرِیَگه صائای قدِرتَل خادمَل خدان، رَسیدَگیَ مَهَن اَر ایی چیئِلَ.

⁷ دِن مردِم اژ مِل ووژتون اِربارِن: اَرّ مالیاتَ، مالیات بیَن؛ اَرّ خِراجَ، خِراج بیَن؛ اَرّ اِتِرومَ، اِتِروم بِنِن؛ ئو اَرّ عزّتَ، عزّت بِنِن.

وَه جا آوِردِن شریعت وَه مِحبت

⁸ دِن کَستونِ مِل ناو بِخِر اژ یَگه یَکتِریتو دوس داشدوئی. اَرِیَگه هر کی یَکی‌تِر دوس داشدوئیتی، شریعت آوِردیَسیَ جا.

⁹ اَرِیَگه حکمَل ’زِنها نِهَه‘، ’آم نَکُش‘، ’دُزی نِهَه‘، ’طَمات ناآشدوئی‘، ئو هر حکمی‌تر، کُل، سَردِرَبِرَ ماو اِنوم ایی کلومَ گه «هُمسات هَر اِجور ووژِت دوس داشدوئی.»

¹⁰ مِحبت، گَنی اَر هُمسا ووژ نِمِهِه؛ اِسَه مِحبت، شریعت تمومِ‌کمال وَه اَنجومَ مَرَسِنی.

¹¹ هَمیش هُمَه مَذانینو گه هاینونِ چه زمونی‌کِر، گه هَراِسگَه سات رَسیَسی گه اژ خاو هیزگِرینو، اَرِیَگه نجاد ایمَه اِسگَه نزیکتِر اژ زمونی کَ گه ایمونمو آوِرد.

¹² شو دیری تمومَ ماو ئو روژ نزیکَ. اِسَه بورِن کارَل تیَریکی بنیمِ لا ئو زِری نُیر بِهِیمِ وَر.

¹³ بورِن هُنَ دُریس رفدار بِهِیم گه هَماری هایمون اِنوم روشتایی روژاِر نه اِنوم عِیاشی ئو مَسی، نه اِنوم بی‌عصمتی ئو خیزی، نه اِنوم جنگ ئو حَسوئی،

¹⁴ بلکِم شصخیت عیسی مسیح خداون اِجور جِنِکی بِهَنِ وَر ئو اَرِه جسم تیارِک نوئینِن تاگَه چیئَلی گه جسمَ مِیتی بارینونَ جا.