رومیان 12 - کتاب مقدس به زبان لکی - گویش مرکزیقُرونی زِنی 1 اِسَه اِاِ بِرال، وَه خاطر ریَمَتَل خدا، خواهشدتون اَژینَ مَهَم گه لارَلتون اِجور قُرونی زِنی ئو مقدّس ئو وَه دل خدا پیشکَش بِهَن گه عَبادت روحانی هُمَه هَر یَسَ. 2 نوئنَ هُم‌شکِل ایی دنیاءَ، بلکِم وَه نووآ بیئِن فگِرَلتو، عوض بوئن. اَسَه مَتونینو خواس خدا تشقیص دِینو؛ خواس خو، باوِ دل ئو کامل خدا. 3 اَرِیَگه وَه‌سونگَ فیضی گه بیَسَ نَصُی مِه، موشِمَ هر کُم اژ هُمَه گه ووژتو ویشتِر اژ اَ چیئَه گِ باس، نَذانِن، بلکِم هر کُم چَن ایمونی گه خدا بَشخیَسی‌ئونتو، وَه قضاوت دُریس فگِر بِهَن. 4 اَرِیَگه هَرهُنَ گه ایمَه اِنوم یِه لار، عضا فِرِه دیریم ئو کُل عضا کارون اِجور یَک نیَ، 5 اِسَه ایمَه وَه‌یاآگه فِرِه‌یم، اِنوم مسیح یِه لاریم ئو هر کُم یَک یَک، عضا یَکتِریئیمو. 6 اِسَه مِطابق فیضی گه اژ جونِم خدا بَشخیاس‌ئونمو، عطائَل جوراجوری دیریم. بورِن اونِلَ بیَریمِ کار: اَرّ نبوّتَ، چَن ایمونمو بیَریمیِ کار. 7 اَرّ خِلمتَ، اِنوم خِلمَتمو بیَریمِ کار؛ اَرّ تیَلیمَ، اِنوم تیَلیم دائِنمو بیَریمِ کار؛ 8 کسی گه تشویقَ مِهِه، اِنوم تشویق کِردِنی بیَریِ کار؛ کسی گه یاریَ مِ، وَه دسِ‌دلوازی بِهِه؛ کسی گه رَبَریَ مِهِه، وَه خیرَت اَنجوم دِ؛ کسی گه ریَمَ مِهِه، وَه خَوشالیا بِهِه. نشونَه‌ل مسیحی حخیخی 9 مِحبت باس خالص بو. اژ گَنی بیزار بوئن ئو سفدِسخد بچسبِنَ اَ چیئا گه خوءَ. 10 یَکتِریتون اِجور بِرا دوس داشدوئی. اِ عزّت نائن اَر یَکتِری، بیَن اَر قِ یَکا. 11 اِ خیرَت تَمَل نوئن؛ اِنوم روح گُر بوئن ئو خِلمت اژ خداون بِهَن. 12 اِ امید خَوشالی بِهَن، اِ سخدیَل طاختتو داشدوئی ئو یِمِجو دوعا بِهَن. 13 اِ زفتِ‌رفت هَوَجَه‌ل ایمودارَل مسیح هُم‌بیَر بوئن ئو هُن‌هاوو بوئن. 14 اَرِه کسَلی گه آزارتونَ میَن، بِرَکتتو بِ؛ بِرَکتتو بِ ئو نُئِر نَهَن! 15 وَه‌گَرد کسَلی گه خَوشالِن، خَوشی بِهَن، ئو وَه‌گَرد کسَلی گه مَگیرِن، بگیرِن. 16 وَه‌گَرد یَکتِری بسازِن! قُرات نوئن، بلکِم وَه‌گَرد آمَل ضِیف ئو سادَه هاتِن‌چیئینتو داشدوئی. هرگِس ووژتونَ دونا نَذانِن. 17 جوواو گَنی کسَ گَنیا نیَن، بلکِم حُواستونَ اَ چیئَه گه اژ نظر کُل مردِم عزّت دیری، بو. 18 اَرّ ماو، تا جای گه وَه هُمَه مربوطَ، وَه‌گَرد کُل کس اِ صُئل‌وصفا زِنِه‌ی بِهَن. 19 اِاِ عزیزَلِم، هرگِس ووژتو تَخاص نَهَن، بلکِم واگذار کَنی اَر خَضو خدا. اَرِیَگه اِنوم تورات نُیسیاءَ گه «خداونَ موشی: ”تَخاص هِن مِنَ؛ مِنِم گه سزاءَ میَم.“» 20 برعسک، «اَرّ دشمنِت وِرسِنیِ، خوراک بِیتی‌ئون! ئو اَرّ تینیِ، آو بِیتی‌ئون! اَرِیَگه اَرّ هُنَ بِهِین، هُنَ خجالتا مِهِینی بِگِر مِژ کوءَ مِهِینی اَر سراِرا.» 21 گَنیت اَری فائق ناو، بلکِم وَه خوئی، فائق بو اَر گَنی. |
@ 2024 Korpu Company