رومیان 11 - کتاب مقدس به زبان لکی - گویش مرکزیباقیمَنیَل اسرائیل 1 اِسَه مَپِرسِم: آیا خدا قوم ووژ رد کِردیِ؟ اصِلا؛ اَرِیَگه مِه ووژِم اسرائیلیِم، اژ نسِل ابراهیم ئو اژ طائفَه بنیامین. 2 خدا قوم ووژ گه وِرِکار شناسیتی، رد نَهَردیَسی. مَر نِمَذانینو نُسَخ مقدّس اِبارَه ایلیا پِخَمَر چَه موشی؟ یَگه چطور اژ دس قوم اسرائیل اَرتَک خدا گِلِی کِردی ئو وِتی: 3 «اِاِ خداون، اونَل پِخَمَرَل تونو کُشتیَ ئو قُرونی‌گائَل تونو رِمونیَ. فَخَد مِه مَنِمَس اَر جا ئو هانِ کِر کُشتِن مِنا.» 4 مِنتائای خدا چَه جوواوئون دا؟ یَگه «مِه اَرِه ووژِم هفت هزار نفرِم ناسِ لا گه زُنیو نَنیا اَر وَر بِت بَعَل.» 5 اِسَه هَرهُنَ، اِ ایی زمون‌یشَ باقی‌مَنیَلی هَن گه اژ رئی فیض اِنتخاو بینَ. 6 مِنتائای اَرّ اژ رئی فیض بو، دیَر اژ کارَل نیَ؛ اَرّنَه فیض دیَر فیض نیَ. [مِنتائای اَرّ اژ کارَل بو، دیَر اژ فیض نیَ؛ اَرّنَه کار دیَر کار نیَ.] 7 اِسَه چَه؟ یَگه قوم اسرائیل اَ چیئَه گه وَه دُما بیتی، ناوِردیَ دس. مِنتائای اونَلی گه دیاری بینَ آوِردونَ دس ئو باقی، دِلو بیَ بَرد. 8 هُنَ گه اِنوم نُسَخ مقدّس نُیسیاءَ: «تاگَه ایمِرو خدا روحِ شیتی دائونو ئو چیَمَلی گه نوئینِن ئو گوشَلی گه نَشتوئِن.» 9 ئو داوود پِخَمَرَ موشی: «سِفِرَه‌ئو اَرِنو بوءَ دام ئو تِلَه ئو بوءَ کُچِکی گه پائلو گیرَ مِهِیتی اَری، ئو مَکُوئِن، ئو مِکافات. 10 چیَمَلو تارا بو تاگَه نتونِن بوئینِن، ئو قِئَلو اَرِه همیشَه بِچَمیا.» 11 اِسَه مَپِرسِم: آیا پائلو گیر کِرد ئو کَتِن اَر زَمی تاگَه اَرِه همیشَه بِکُوئِن؟ اصِلا! بلکِم وَه‌سونگَ کورفِربونی اُوُنا، نجاد بیَ نَصُی خِرِیهودیَل، تاگَه قوم اسرائیل باریَ سر خیرَت. 12 اِسگَه اَرّ کورفِربونی اونَل باعث دولَمَنی دنیاءَ ئو اَرّ شِکِسو باعث دولَمَنی خِرِیهودیِلَ، وخدی قوم یهود کامل نجاد بِگِری چَنی ویشتِر باعث دولَمَنیَ ماو؟ 13 اِسگَه دیرِمَ گَرد هُمَه خِرِیهودیَل قصَه مَهَم. اَرِیَگه مِه رسول خِرِیهودیَلِم، افتخارَ مَهَم اَر خِلمت ووژِم، 14 تاگَه هایتِر کسَلی گه وَه‌گَرد مِن اژ یِه تیرِ‌طائفَه‌ن، بارِم اَر سر خیرَت ئو بِری اَژینو نجاد دَم. 15 اَرِیَگه اَرّ رد بیئِن اونَل بیَ دوسی خداءَ گَرد دنیا، قبول بیئِنونَ ماوَ چَه، جز زِنیابیئِن اژ مِردیَل؟ 16 اَرّ تیکُلُنجِه‌ی اژ حمیر گه اِجور نوبر پیشکَشَ ماو، مقدّسَ، اِسَه کُل اَ حمیرَ مقدّسَ؛ ئو اَرّ ریشی مقدّسَ، اِسَه پَلَل‌یش مقدّسِن. 17 مِنتائای اَرّ قِری اژ پَلَل بِریان ئو تو وَه‌یاآگه پَل زِتو وَشی بین، اِنوم پَلَلی‌تِر پِوَن بینَ قِ دار زِتونا ئو اِسگَه اژ شیرَه قویَت‌دار ریشی دار زِتو بیَردارین، 18 اَر اَ پَلِلَ قُراتی نِهَه. اَرّ هُنَ مِهِینَ، وَه ویرِت بو تو حُیا اَ ریشیَ نیئین، بلکِم ریشی حُیا تونَ. 19 اَسَه تونَ موشین: «پَلَل بِریانَ تاگَه مِه پِوَن بوئم.» 20 راسَ موشین. مِنتائای اونِلَ خاطر بی‌ایمونی بِریان ئو تو وَه ایمونَ گه پایارین. اِسَه قُراتی نِهَه بلکِم زِلَت بِچو. 21 اَرِیَگه اَرّ خدا ریَم نَهَردی اَر پَلَل طبیعی، ریَم اَر تونیش نِمِهِه. 22 اِسَه مِرِبونی ئو سخدگیری خدات اَر وَر چیَم بو؛ سخدگیری اَر کسَلی گه اژ ایمو کَتِنَ، مِنتائای مِرِبونی اَر تو، اَلوَت وَه شرطی گه بِمینین اِنوم مِرِبونی او؛ اَرّنَه تونیش قطَ موئین. 23 ئو اَرّ اون‌یش نَمینِن اِنوم بی‌ایمونیو، اِدوارَه پِوَنَ موئن، اَرِیَگه خدا مَتونی اِدوارَه پِوَنو دِ. 24 اَرِیَگه اَرّ تو اژ دار زِتو وَشی بِریاین ئو برعسک طبیعت پِوَن بینَ قِ دار زِتون اَهلیا، اِسَه چَنی ویشتِر پَلَل اصِلیَ مَتونِن پِوَن بوئنَ قِ دار زِتونی گه اَژی بِریانِ. نجاد قوم اسرائیل 25 اِاِ بِرال، نِمِم اژ ایی رازَ بی‌خَوَر بوئینو -ناخواد گُمو کِینو دونائینو- گه سنگدلی اَر بِری اژ قوم اسرائیل حکِمرونیَ مِهِه، تا وخدی گه شِمار خِرِیهودیَلی گه میا نجاد بِگِرِن، کاملا بو. 26 هِر اَژی جورَ کُل قوم اسرائیل نجادَ مَگِرِن. هَرهُنَ گه اِنوم نُسَخ مقدّس نُیسیاءَ: «نجاددهندَه اژ صَهیونَ مای ئو بی‌دینی اژ لون یعقوب هیزَمِ. 27 ئو یَه عَت مِنَ گَرد اونِلَ وخدی گه گنائَلو هیزدَم.» 28 اژ لِحاظ انجیل، وَه خاطر هُمَه، دشمنِن؛ مِنتائای اژ لِحاظ اِنتخاو خدا، وَه خاطر باوَه‌جدَلو، عزیزگرامی خدان. 29 اَرِیَگه خدا هرگِس پیشکَشیَل ئو دَوَت ووژ نِمَسینیِ دُما. 30 اَرِیَگه هَراَ جورَ گه هُمَه زمونی نِسوَتَ خدا کورفِربو بینو، مِنتائای اِسگَه وَه خاطر کورفِربونی یهودیَل ریَمَت خداتو گِرتیَ، 31 اِسَه اونَل‌یش اِسگَه کورفِربونا بینَ تاگَه وَه‌سونگَ ریَمَت خدا اَر هُمَه، اَر اونَل‌یش ریَم بو. 32 اَرِیَگه خدا کُل مردِم ناسیِ بَن کورفِربونیا، تاگَه ریَم بِهِه اَر کُل. 33 دولَمَنی ئو حکمت ئو علم خدا چَنی قویلَ؛ اژ داوریَلی نِماو سر اِربارین ئو رئیَلی نِماو درک کِین. 34 «اَرِیَگه کیَ گه فگِر خداون ذِناسدوئیتی یاگَه کیَ گه مُشیرَت کِردوئیتی؟» 35 «کیَ گه پیشکَشی‌ای بَشخیَسیَ خدا تاگَه بیَنی‌ئونَ دُما؟» 36 اَرِیَگه کُل چی اژ او، ئو وَه‌سونگَ او، ئو اَرِه اوءَ. جِلال اَر او تا ابد. آمین. |
@ 2024 Korpu Company